1 Koríntyan 7
7
Bǎmbím kyi-kim ne Dyibé ebé
1Kántîk, n-ta ng byiraa ḿbyí ben ba/sáng kyi-kim ne mbyí.
Kyi-kyú u chwǒm ńkyí kyinong, â onyinchéng o*da/bé dyibé*. 2Nké ké bubwô-byibî echi kyi-kim ne banet erí bii/jê chwóó, onyinchéng nang orá okyú ne onyi mú emen, ne onyinyi nang orá okyú ne otyép mú emen. 3Onyinchéng okûchi bǎmkpóngé emen wǎ otyép, onyinyi okûchi ḿbé emen wǎ onyi, ne mbé ashí afee bakûkye barî ńkyí óbe mu o-ryuu ng. 4Onyi oo*chi oyén-enyam-byiko emen* nké otyép emen nké mu oyén. Ké bukwóp ámbu bubónge, otyép to oo*chi oyén-enyam-byiko emen* nké onyi emen nké mu oyén. 5*Da n̂g echi ba-né barî byiko enen ekye* éné ké bukwóp ḿbú ben baa/bwóp kpá kashú ba/fu, ba-chi i éné ké kaǎnyín-nkéré, eringe nyí ben badakúng kyikim-nkéré ba-fé nshwam. Nké ké nkéré baa/man, bwa n̂g esim ba-kyú ne barî wǎ otyép ne onyi, eringe nyí baa*ba/chi ba-róng ké okan mú Sátan* ké ebóng, ba*fí ba-man n ekám byiko enen*.
6Me n*fí n-sét ng běn ńkyín wǎ mu n-chi i běn ké busa* nké mu n-sét ng běn degere wǎ chwǒm ńkyí n/kabe ké dyityém ejí n/fu, nkyi kanong. 7Ké ntûntû, kyi/mû kyi/chi kyi-nyîn mě, â ben ashí amúmú ba/mû wǎ eringe nyí me mu. Nké nang yeě nang yeě mu ne eyáré nyí emen nyí Osówo o/kye ǎ. Onet obónge ne eyáré ńnyín, mú áku ne ekíri.
8Kántîk, me mu n-sét ng banet-akpe ne banyǐnkú ńkyín. Kyi/chi kyi-nwa kyi-shwôm ne ben ńkyí badakyú kǎnchí, wǎ eringe nyí me mu. 9Nké â baa*man ecíp dyityém* ca n̂g kashú ba-bé dyibé. Kyi-nwa ng ńkyí onet odabé dyibé kyi-shwôm ńkyí onet odakyú ké bafip.
10Kyi-kim ne banet ḿbé baa/bé abé, me mu ne kyije ńkyí nda běn ekye. *Chí kyije ńkyí ejí me oyén* nké ńkyí Otu Kyítá. Onyi oo*man o-mîng otyép emen*. 11Â o/mîng otyép emen, o-man o-kyú dyikpe. Â oo*man ekyú dyikpe* obwa esim dyibé ne otyép emen. Ne otyép o*dachi o-man dyibé ne onyi emen*.
12Me mu n-sét ng banet ḿbé kwán me oyén, *chí Otu Kyítá* n/fu, â onet mú o/bángê ké Karâs mu ne onyi mú o*da/bángê ké Karâs* ne onyi emen ámu mu o-ryuu ng o/fu, nyǐ o-bé ng ǎ nyǐ o-ca kashú, otyép emen o*dachi o-né ǎ*. 13Ne â onyinyi mú o/bángê ké Karâs mu o-bé ng onyinchéng mú o*da/bángê ké Karâs* ne mú onyinchéng ámu mu o-ryuu ng o/fu, nyǐ o-bé ng ǎ o-câ kashú, onyi emen o*dachi o-né ǎ*. 14Ké ebóng, Osówo o-koo ng otyép mú o*da/bángê ké Karâs* ké bubwô-ocibi mú o/cibi ne onyi emen, ne o-koo ng to onyi mú o*da/bángê ké Karâs* ké bubwô-ocibi mú o/chi ne otyép emen mú o/bángê ké Karâs. Â ńkyín kyi/mû kyi*fí éné* bwǎn ebe ba/mû ba/chi ba-kyú wǎ bwǎn ḿbé banet ḿbé ba*fí ba-fâ Osówo*. Nké nkyi éné, Osówo o-koo ng kámbé. 15Nké â onet mú o*da/bángê ké Karâs* mu o-ryuu ng o/fu, nyǐ o-mîng ng otyép emen nang onyi emen mú o/bángê ké Karâs, onet ámu o-man n echi éné. Ké bukwóp ámbu, onet mú o/bángê ké Karâs, nang otyép nang onyi o-man n emîng orî. Ké ebóng, Osówo oo/kó běn o/fu, ben bakyú ké bunyîn-dyityém. 16Wo a-cen n nǎ ne a-nyît, ǎ onyi-otyép mú o/bángê ké Karâs, a/fu, wo aa*nyii otyép eyên*. Ne wo a-cen n to nǎ kâng ne a-nyît, ǎ otyép mú o/bángê ké Karâs, a/fu, wo aa*nyii onyi eyên*.
Kyú n̂g wǎ eringe nyí Osówo oo/kó Běn
17Nang yeě nang yeě okyú u o-câ kashú wǎ eringe nyí Otu Kyítá o/kye ǎ eyáré, ne eringe nyí o/mû ké nkéré Osówo o/kó ǎ. Nyín kyije ńkyí mu n-kyâ ké kángkáng byise-ékwâbashi nyí Karâs. 18Â onet mú oo/cên, o/bángê dyikô ńdyí Osówo o/kó ǎ, o*dachi o-kan o/fu, nyǐ o-fîm m ekap nyí ba/cên ǎ*. Â onet mú o*da/cên* o/bángê dyikô ńdyí Osówo o/kó ǎ, o*dachi o-fu, nyǐ o-da ng ecên*. 19Ké ebóng, nang a/cên nang a*da/cên* kyi*da/byí chwǒm*. Ńkyí nkyi kiǐtí kyi*da/shwôm byije-Osówo etî*. 20Nang yeě nang yeě owaa wǎ eringe nyí nyǐ o/mû ké nkéré mú o/bángê dyikô ńdyí Osówo o/kó ǎ. 21Ben ba/mû básóng ké nkéré Osówo o/kó běn? *Da n̂g ekérê*. Nké â ben ba/ri bukwóp ḿbú badachi ne baa*kyú to básóng* chi n̂g kámbú. 22Ké ebóng, ósóng mú Otu Kyítá oo/kó ǎ o/firi mú Otu Kyítá ké byiko emen. Ké bukwóp ámbu bubónge, onet mú o*fí ósóng* mú Karâs oo/kó ǎ, o-chi i ósóng mú Karâs. 23Osówo o/ré běn o-kye Wǎn emen. Ké bubwô ámbu, *da n̂g echi ba-bírî ba-firi básóng ḿbé byibî-banet*. 24Bwǎn-bané ejí, nang yeě owaa ne Osówo, wǎ eringe nyí o/mû ne Osówo ké nkéré mú Osówo o/kó ǎ.
Bǎmbím kyi-kim ne Banet-Akpe ne Banyǐnkú
25Kántîk, kyi-kim ne banet-akpe. Me n*da/koo kyije ne Otu Kyítá* nké me mu n-kyâ běn okabe mú ejí wǎ onet, mú ké dyityém ecángê ńdyí Otu Kyítá, o/kwárê mú adafé dyityém ne nyǐ.
26Â onet o/kabe bafip ḿbé kántîk, me n/kabe n/fu, kyi-nwa ng kyi-shwôm ńkyí onet odakyú wǎ eringe nyí nyǐ mu. 27Wo amu ne onyi dí. Â amu ne mǔ, *dakan kâng a/fu, wo a-ró ng ǎ*. Wo amu dyikpe dí. Â amu dyikpe, *dachi a-kyé onyi mú adabé*. 28Nké â a/bé, a*da/chi kyibî*. Ne â nang onyinyi mú mu dyikpe nké o/bé otyép, o*da/chi kyibî*. Nké me mu n-ryuu ng n/fu, n-chi i běn ba-fem ké kángkáng afaníkong nyí banet ḿbé ba/bé abé ba/chi ba-ri.
29Ńkyí mu n-raa ng kyi/byí něen, ǎ bwǎn-bané ejí. Nkéré o*da/chîjê* ne kyi-fím kántîk kyi-ca kashú, banet ḿbé baa/bé abé, bakyú wǎ banet ḿbé ba*da/bé*. 30Banet ḿbé mbe ba-tii ng, bakyú wǎ banet ḿbé ba*fí ké bafip* ḿbé mbe ba-jwó ng, bakyú wǎ ḿbé ba*fí ké bunyîn-dyityém* ḿbé mbe ba-ré ng byěm, bakyú wǎ ḿbé ba*fí ne chwǒm ńkyí ba/ré*. 31Banet ḿbé mbe ne abwô ké byěm ké ejíí, bakyú wǎ ḿbé ba-jang ng e*fí ne abwô ké mbyí*. Ké ebóng, ejíí ńnyín, wǎ eringe nyí kántîk, ee*ba/chi e-chîrí ka-bwon*.
32Me mu n-ryuu ng n/fu, ben ba*dachi ba-kûkye byiko enen afaníkong*. Onyinchéng mú mu dyikpe o-kúng ng dyityém emen o-tî ké bǎmkpóngé ḿbé Otu Kyítá echi, ké ebóng, nyǐ mu o-kan n o/fu, nyǐ o-chi i Otu Kyítá o-firi ké bunyîn-dyityém ne nyǐ. 33Nké onyinchéng mú mu ne onyi o-kúng ng dyityém emen o-tî ké byěm ḿbyí ké ejíí ńnyín, ké ebóng, nyǐ mu o-ryuu ng o/fu, onyi emen okyú ké bunyîn-dyityém. 34Ké bubwô ámbu kâng, nyǐ o-kyú u ne atyém afee. Onyinyi mú o*fí ne otyép* ne mú o*da/nyît ne onyinchéng* o-kúng ng dyityém emen o-tî ké bǎmkpóngé ḿbé Otu Kyítá echi, ké ebóng, nyǐ mu o-ryuu ng o/fu, nyǐ o-tî ng enyam-byiko ne dyityém emen kanong. Nké onyinyi mú mu ne otyép o-kúng ng dyityém emen o-tî ké byěm ḿbyí ké ejíí ńnyín, ké ebóng, nyǐ mu o-ryuu ng o/fu, otyép emen okyú ké bunyîn-dyityém.
35Me mu n-raa ng ńkyín, ké ebóng, me mu n-ryuu ng n/fu, n-chwáp ng běn. N*fí n-kan n n/fu, n-fâ běn byije ké byiko*. Nké mu n-ryuu ng n/fu, ben bachi ńkyí nkyi ké bukwóp ḿbú bunong, ba-kúng atyém enen kángkáng ba-kye ké bǎmkpóngé ḿbé Otu Kyítá echi.
36Kyi-kim ne banet ḿbé ba/mû baa/kám barî búkyî, ḿbé ba/fu, mbé baa*bé barî* â mú onyinchéng o/kabe o/fu, nyǐ o*fí o-chi i mú wǎn-onyinyi kanong*. Â mu o-nyît ng o/fu, nyǐ o*fí o-man n ecíp dyityém* ne mu o-kabe ng o/fu, kyi-nwa ng ńkyí nyǐ odabé dyibé, kyi-nwa ng ńkyí badabé barî, wǎ eringe nyí mú onyinchéng mu o-ryuu ng. Kyibî kyi*fí ké kafâ*. 37Nké â onyinchéng mú ba*da ǎ etírîng otíríng* o/kabe ké dyityém emen kanong kanong o/fu, nyǐ oo*bé to dyibé* â o/man eníbî dyityém emen ne oo/kabe ké dyityém emen ńkyí nyǐ o/chi o-chi, kyi/chi kyi-nwa, â o*da/bé wǎn-onyinyi ámu*. 38Ké bubwô ámbu kâng, onyinchéng nang orá nké o/bé ókyî emen o/chi kanong, nké mú o*da/bé ókyî emen* o/chi o-chi ńkyí kyi/bwa kyi-nwa kyi-shwôm.
39Onyinyi mú oo/bé otyép oo*man ekyú ké byiko emen* tete otyép emen o-kpú. Nké â otyép emen o/kpú, o-man n ebé kâng nang onyinchéng orá mú mu o-nyîn n ǎ.
Nké kyi-man kyi-kyú dyibé ne onyinchéng mú o/bángê ké Karâs. 40Nké onyinyi ámu kâng o-bwa ng o-kyú ké bunyîn-dyityém o-shwôm, â o*da/chîbé otyép okíri*. Ányi okabe mú ejí, ne mu n-kabe ng n/fu, me to mu ne Busun-Osówo ké dyityém.
Currently Selected:
1 Koríntyan 7: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
