1 Koríntyan 6
6
Banwet esáng ba-kye Barî-Banet ké Esuk ḿbé ba/bángê ké Karâs
1Â onet obónge ké burwám enen mu ne kyiraa ne orî-onet mú o/bángê ké Karâs, o-cen n nǎ ne o-da-bwom ké bushú ḿbú bampan bampan ḿbé ba/bángê ké bakye esháng, ńkyí o/mû o/chi o-mîng banet-Osówo ba-nap kyiraa ánkyi. 2Ben ba*fí ba-nyît ng ba/fu, banet ḿbé Osówo ba/chi ba-pan ejíí mpan dí*. Â nkyi éné kâng ńkyí ben ba/chi ba-pan ejíí mpan, ben ba*da/kwárê mú badanap booraa ḿbú bu*da/rêe*? 3Ben ba*fí ba-nyît ng ba/fu, be byi/chi byi-pan barím mpan dí*. Kyi-cen n nǎ kâng ne be bii*man epan mpan kyi-kim ne byěm ḿbyí dyikpen ńdyí ké ejíí*. 4Â azong-byěm ányi a/chi kâng, ben ba-yip ng kányí ba-ca ké kyikit ńkyí banet ḿbé ba*fí ne busa ké ékwâbashi nyí Karâs* ba/fu, bapan? 5Éshwân ne ben ké ntûntû. Onet oo*kaa ké burwám enen nang obónge mú mu ne bubong* ḿbú odaman etóbê kyiraa ńkyí kyida běn eróng ne barî*. 6Ńkyí ba/mû ba/chi ba-tóbê barî, orî-onet obónge mu o-fâ óbe ké esuk, o-mîng ng banet ḿbé ba*da/bángê ké Karâs* ba-pan n kámbé kyiraa.
7Ńkyí ben bamu ne kyiraa ké esuk ne barî nkyi kyi-tông ng kyi/fu, ben baa/róng kanong kanong. Kyi/mû kyi*da/nwa kyi-shwôm ńkyí banet bada běn ekûkyé byiraa*? Kyi/mû kyi*da/nwa kyi-shwôm ńkyí banet bada běn ejii kajii*? 8Nké ben bayén ba/bwa bamu ba-kyé ng barî byiraa, ba-jii ng barî kajii, cibicibi ne bwǎn-bané enen. 9Ben bamu ba-nyît ng ké ntûntû ba/fu, bambên atyém baa*ba/chi ba-nung ké Butu ḿbú Osówo*. *Da n̂g echi ba-nîm byiko enen*. Banet ḿbé mbe ba-rí i ne barî ḿbé ba*da/bé dyibé* nang mbe ba-sháng ng bakye nang mbe ba-chi i byinam nang mbe banet ḿbé onyinchéng mu o-rí i ne óbe-onyinchéng, onyinyi o-rí i ne óbe-onyinyi 10nang mbe ba-jii ng kajii nang mbe ba-shwam m byěm nang mbe ba-bwóm m bato nang mbe ba-shú u barî-banet nang mbe banjii bujii, onet o*fí ké burwám-banet ḿbén mú o/chi o-koo Butu ḿbú Osówo*. 11Banet bakíri ké burwám enen ba/mû éné. Nké ben baa/soo běn byibî. Baa/kúng běn ba-kye Osówo. Osówo oo/két mpan o-nwa běn ké bubwô-dyizîn ńdyí Jisos Karâs, Otu Kyítá eten ne ké ḿbú Busun-Osówo eten.
Kúng n̂g Byiko Enen ba-tî ké Akpee nyí Osówo
12Onet obónge o-fu ng o/fu, me m-man n echi nang ebóng ńkyí kyi/nyîn mě. Nkyi éné, nké *chí kángkáng byěm nké byidanwa ne ben*. Me m-man n efu n/fu, me m-man n echi nang ebóng ńkyí kyi/nyîn mě, nké me mm*man ekúng byiko ejí byi-firi ósóng mú chwǒm nang kyibónge*. 13Onet okíri o-fu ng o/fu, byiryíng byi/já dyifít, dyifít dyi-já byiryíng. Nkyi éné, nké Osówo o/chi o-chi kámbyí byimúmú bii*kyú to*. Enyam-byiko nyí onet baa*kúng kányí ba-tî ké bukwóp ḿbú byibî-byěm echi kyi-kim ne banet erí*. Nké ba-kúng ng kányí ba-kûkye Otu Kyítá ofê, ne Otu Kyítá mu o-kyâ enyam-byiko-onet ofê. 14Osówo o/jwóbê Otu Kyítá ké bukyû, ne o/chi o-jwóbê bě to ké busa emen.
15Ben bamu ba-nyît ng ba/fu, enyam-byiko enen e-chi i byipang-enyam-byiko nyí Karâs. Me m-man n ekúng kyipang-enyam-byiko nyí Karâs n-chi kánkyí kyi-firi kyipang-enyam-byiko nyí onet-akpara? Kii*nwa echi*. 16Katô ben ba*fí ba-nyît ng ba/fu, onyinchéng mú mu o-cibi ng enyam-byiko emen ne onyinyi-akpara o-firi ng enyam-byiko ebónge ne onyinyi ámu*. Ejá-Osówo nyí ba/sáng kyísí e/sét ńkyín wááng e/fu, mbé ashí afee ba/chi ba-firi enyam-byiko ebónge. 17Nké nang yeě nké mu o-cibi ng byiko emen ne Otu Kyítá, onet ámu o-firi ng onet obónge ne nyǐ ké dyityém.
18Mîng n̂g kyibî echi ńkyí badarí ne banet ḿbé ba*da/bé ne dyibé*. Kyibî nang kyirá kyikíri ńkyí onet mu o-chi i kii*bên enyam-byiko emen*. Nké onyinchéng mú mu o-chi i kyibî kyi-kim ne banyinyi erí mu o-chi i kyibî o-bât ng enyam-byiko emen. 19Ben ba*fí ba-nyît ng ba/fu, enyam-byiko enen e-chi i kyise-kyifen echi ńkyí Busun-Osówo*? ḿbú mbu běn ké byiko*? ne ḿbú Osówo o/kye běn*? Ben ba*da/já byiko enen* nké Osówo nké o/já běn. 20Osówo o/ré běn o-kye enyam-byiko nyí Wǎn emen. Ké bubwô ámbu kâng, kúng n̂g enyam-byiko enen ba-tî ké akpee nyí Osówo.
Currently Selected:
1 Koríntyan 6: BKY
Highlight
Copy
Compare
Share
Want to have your highlights saved across all your devices? Sign up or sign in
Published by the Bible Society of Nigeria @ 1985
