BALA LUK LINIO 21

Langit Luk Mebaruh idi Tana' Luk Mebaruh

1 # Yes 65.17; 66.22; 2 Pét 3.13 Idi ui nenier aceh langit luk mebaruh idi tana' luk mebaruh; ngaceku langit luk pun-pun idi tana' luk pun-pun ineh pangeh netutu', idi abpa' rayeh na luk idi peh. 2#Yes 52.1; Lin 3.12; Yes 61.10 Idi ui nenier aceh bawang luk meligan, Yerusalim luk mebaruh, netemurun rat surga ratnan Allah, inayung mepad kudeng seburur decur luk ngaweh inayung pad miak papu' awanneh. 3#Yeh 37.27; Uk 26.11, 12 Ui neninger aceh arod luk rayeh rat bang kerusi ineh kebalaneh, “Ngerawé do'-do'! Su luk inan Allah mudeng nekini idi pad-pad dengan lemulun! Ieh miak tudo pad-pad dengan lemulun idi ideh miak amngun ku pupuNeh. Allah sebuleng miak tudo dengandeh, idi mangun ku Allahdeh. 4#Yes 25.8; Yes 35.10; 65.19 Ieh miak miid amung-amung abpa' mateh ratnan matehdeh. Idi na luk idi até kuandeh teh: tido, tangi', idi ét pana' na luk idi. Amung-amung luk mon pangeh netutu'.”

5Idi Ieh luk tudo luun kerusi ineh pana' nepebala, “Siruh, Ui nganau' amung-amungneh mebaruh.” Idi kebalaNeh teh, “Do' ngayud, ngaceku bala ini lutep idi matu.” 6#Yes 55.1 Idi teh kebalaNeh, “Pangeh neriput! Ui ini Urup luk Pun-pun idi Urup luk Kekiped, ieh ineh Luk Pun-pun idi Luk Kekiped. Kuan lemulun luk meparing Ui miak amré neneh ngirup ratnan bued abpa' luk mulun ineh dengan mo'-mo'. 7#2 Sem 7.14; Nani 89.26–27 Lemulun luk metueh miak ngalap ineh rat Negku Ui ini miak mangun ku Allahneh, idi ieh mangun ku anakKu. 8Iamo' kuan lun luk matot, idi lun luk na manu, lun luk melutak, lun luk ngaté, lun luk pasét, lun luk mangun idi sembayang inan akang, idi lun luk mebalih, babpatdeh ineh inan déi' bang takung luk mebudung ku apui idi batu apui, ieh ineh até luk kedueh.”

Yerusalim Luk Mebaruh

9Idi seburur rat arang tudu' melaikat luk ngimet tudu' bigan ineh luk panu' ku tudu' dereh luk kekiped ineh nacing, idi nepebala negku, “Amé tungé', ui miak mada' sirenmu Decur luk sikal ngaweh ineh, ieh ineh awan Anak Dumba ineh.” 10#Yeh 40.2 Ui tigio Roh, idi melaikat ineh nenguit negku umak luun pegkung luk medita', idi nemada' sirenku Yerusalim, Bawang luk Meligan ineh, luk netemurun rat surga ratnan Allah, 11idi luk macing ku rayeh Allah. Idi acangneh mepad kudeng batu luk meluun raga, mepad kudeng batu luk mebirar, mesor mepad kudeng gelas luk pelaba do'. 12#Yeh 48.30–35 Idi bawang ineh inan ar luk rayeh idi medita', idi inan pulu' dueh tanga', luk pitarin pulu' dueh melaikat, idi ngadan pulu' dueh pupu Israil pangeh inayud luun tanga'-tanga' ineh. 13Pa busat aco inan teluh tanga', pad tinueh busat aco inan teluh tanga', pa kabing busat aco inan teluh tanga', idi pa acep aco inan teluh tanga' teh. 14Ar bawang ineh pinudut luun pulu' dueh batu, idi pangeh inarit luun batu ineh ngadan pulu' dueh rasul Anak Dumba ineh.

15 # Yeh 40.3 Melaikat luk nepebala negku ineh ngimet aceh luk pinari, ieh ineh rukud amas, sikal nari bawang ineh dengan tanga'neh idi arneh. 16Bawang ineh inan apat lebping, idi kadangneh mepad rayeh dengan pipangneh. Idi dengan tari ineh ieh nenari bawang ineh, ieh ineh 1,500 batu; kadangneh, pipangneh, idi dita'neh mepad mo'. 17Idi teh melaikat ineh nenari ar bawang ineh, teluh ngepulu' anem depeh, maya' kudeng tari lemulun, luk pikai melaikat ineh. 18#Yes 54.11–12 Arneh ineh inau' ratnan batu luk mebirar, idi bawang ineh inau' ratnan amas luk meluun do' luk mesor mepad kudeng gelas luk pelaba do'. 19Idi amung-amung batu tapin ar bawang ineh inayung ku puar-puar batu luk meraga. Batu tapin luk pun-pun ineh batu luk mebirar, idi luk kedueh, batu luk bata' langit, idi luk keteluh, batu luk sia' merirem, idi luk keapat, batu luk bata' uduh, 20idi luk kelimeh, batu luk mebarit, idi luk keanem, bau burur, idi luk ketudu', batu luk mebudi, idi luk kewaluh, batu luk bata' melaco, idi luk keiwa', batu luk mebirar, idi luk kepulu', batu luk mebata', idi luk kepulu' aceh, batu luk bata' abpa' rayeh, idi luk kepulu' dueh, batu luk merirem. 21Idi pulu' dueh tanga' ineh, ieh ineh pulu' dueh ngilung bau mutiara, anid-anid tanga' ineh inau' ratnan sengilung bau mutiara. Idi dalan bawang ineh amas luk meluun do' luk mesor, mepad kudeng gelas luk pelaba do'.

22Idi ui nenier na luk idi ruma' Allah bang bawang ineh, ngaceku Tuhan Allah luk Melalud, idi Anak Dumba ineh, mangun ku ruma'neh. 23#Yes 60.19–20 Idi bawang ineh na makai mateh aco idi bulan pana', ngaceku rasat Allah luk ngacang neneh, idi Anak Dumba ineh mangun ku lapungneh. 24#Yes 60.3 Idi pupu-pupu pana' miak nalan bang acangneh, idi raca'-raca' bang tana' ini nguit do'deh amé' bang bawang ineh. 25#Yes 60.11 Idi tanga'-tanga'neh na tu-tu initek tebaco-tebaco ngaceku dacem na luk idi déi' peh. 26Idi rayeh idi dita' ratnan amung-amung pupu miak iten semuet bang bawang ineh. 27#Yes 52.1; Yeh 44.9 Iamo' na tu-tu luk melutak miak semuet bang neneh, idi lemulun luk nganau' luk bibpeng idi mebalih pana' na miak semuet, iamo' lemulun luk inayud ngadandeh bang surat ulun Anak Dumba ineh mo' miak semuet bang bawang ineh.

Currently Selected:

BALA LUK LINIO 21: BLD

Highlight

Copy

Compare