BALA LUK LINIO 16

Bigan Useh Allah

1Idi ui neninger aceh arod rat bang ruma' Allah ineh luk pebala kuan tudu' melaikat ineh, “Do' muyuh amé' idi ngutang tudu' bigan useh Allah ineh luun tana'.”

2 # Pur 9.10 Melaikat luk pun-pun ineh iné', idi nengutang uang biganneh luun tana'; idi ieh mangun ku kimuh luk dat idi megalih kuan amung-amung lemulun luk inan etu pung ineh, idi luk sembayang inan akangneh ineh.

3Idi melaikat luk kedueh ineh nengutang uang biganneh bang abpa' rayeh; idi abpa' ineh misu' ku dara', mepad kudeng dara' lun naté, idi amung-amung luk mulun bang abpa' rayeh naté.

4 # Pur 7.17–21; Nani 78.44 Idi melaikat luk keteluh ineh nengutang uang biganneh bang amung-amung abpa' idi bued abpa', idi ideh misu' ku dara'. 5Idi ui neninger amung-amung melaikat luk ngimet abpa' ineh pebala, “Matu Iko luk idi nekini, idi Luk pangeh idi atun, idi Luk Meligan, ngaceku Iko pangeh nengukum kudeng ineh. 6Ideh nengutang dara' lun manu idi nabi-nabi teh, idi Iko pangeh nemaré nedeh ngirup dara'. Luk kudeng ineh petulu ku amung-amung luk pangeh kikemdeh!” 7Idi ui neninger aceh arod rat bubpun ineh luk pebala, “O Tuhan, Allah luk Melalud! Matu idi mesiri amung-amung ukumMu ineh!”

8Idi melaikat luk keapat ineh nengutang uang biganneh luun mateh aco, idi mateh aco ineh pangeh biré lalud ngeseb amung-amung lemulun ku apui. 9Idi lemulun neseb ku pelaba lau', idi ideh nenguyo ngadan Allah luk melalud pa luun amung-amung dereh ineh. Iamo' nateh ideh sikal uren pad maré rayeh kuanNeh.

10 # Pur 10.21 Idi melaikat luk kelimeh ineh pana' nengutang uang biganneh luun kerusi pung ineh, idi imetneh ineh medacem idi ideh ngatep-ngatep dila'deh anid-anid burur ngaceku mét, 11idi ideh nenguyo Allah luk déi' surga ngaceku étdeh idi kimuhdeh ineh. Iamo' nateh ideh sikal uren ratnan kekamendeh ineh.

12 # Yes 11.15 Idi melaikat luk keanem ineh nengutang uang biganneh bang abpa' rayeh, ieh ineh Abpa' Pirat, idi abpa' ineh pana' mekeket, pad nganau' temina' dalan kuan raca'-raca' rat pa busat aco. 13Idi ui nenier teluh ada' mepad kudeng atit ayudeh remuat rat bang tang galau, idi rat bang tang pung idi nabi luk mebalih ineh. 14Ngaceku diteluh ineh ada' sétan-sétan luk nganau' tuda'-tuda' tanu', idi luk amé' matun amung-amung raca' luk aput-aput tana' sikal ngamung nedeh miak pebunu' kareb aco luk rayeh ineh, ieh ineh Aco Allah luk Melalud.

15 # Mat 24.43–44; Luk 12.39–40; Lin 3.3 “Do' muyuh matar do'-do'! Ui ini macing mepad kudeng lun mano! Idi samal kuan lemulun luk matar do'-do' idi nginita ayungneh, pad ieh na nalan lubpa idi na migu' siren lemulun.”

16 # 2 Rac 23.29; Sek 12.11 Idi ada'-ada' ineh nengamung amung-amung raca' ineh tebubpun su luk titen dengan buri' Iberani Armagedon.

17Idi melaikat luk ketudu' ineh pana' nengutang uang biganneh déi' arang gawa', idi inan sebuleng tang luk rayeh neremuat rat bang ruma' Allah, ieh ineh ratnan kerusi ineh luk nepebala, “Amung-amung pangeh meriput!” 18#Lin 8.5; 11.13, 19 Idi mangun tuda'-tuda' kilep, arod, lalam, idi ruyuh tana' luk pelaba bura', idi nateh luk kudeng ineh mangun rat pun-pun lemulun inan bang tana', ieh ineh ruyuh tana' luk kudeng ineh idi luk kirayeh ineh teh. 19#Yes 51.17 Idi bawang luk rayeh ineh nekupa babpat teluh, idi amung-amung bawang metabpa, idi bawang Babil luk rayeh ineh na miak mekelupan pa kiung Allah. Ieh maré kuanneh sangkir usehNeh luk rayeh. 20#Lin 6.14 Amung-amung pulau netutu', idi pegkung-pegkung pana' na luk idi siren peh. 21#Pur 9.23; Lin 11.19 idi udan batu netemurun rat bang langit nengeritep lemulun idi beratneh tudu' ngepulu' limeh kati. Idi lemulun ineh pana' nenguyo Allah ngaceku ratnan dereh udan batu ineh, ngaceku dereh ineh pelaba rayeh.

Currently Selected:

BALA LUK LINIO 16: BLD

Highlight

Copy

Compare