BALA LUK LINIO 14

Nani Lun Luk Inuli'

1 # Yeh 9.4; Lin 7.3 Idi ui nenier Anak Dumba ineh netuped luun Pegkung Sion, idi pad-pad denganNeh inan 144,000 lemulun luk inayud ngadan Anak Dumba idi ngadan TamanNeh nan madu'deh. 2Idi ui neninger aceh arod rat bang langit, mepad kudeng beri rueb luk medita', idi mepad kudeng uni lalam luk rayeh. Idi arod luk pindengerku ineh mepad kudeng uni giula' luk tetagken lun luk nateg giula'deh. 3Idi ideh menani aceh nani luk mebaruh pa kiung kerusi ineh, idi pa kiung apat pudut luk mulun idi amung-amung lun rayeh ineh. Idi seburur pana' na miak sibada' nani ineh, iamo 144,000 lemulun luk inuli' rat bang tana' ini mo', 4ieh ineh lemulun luk nateh nengelutak bururdeh ku decur, ngaceku ideh anak luk pun mebaruh; idi ideh ini lemulun luk maya' Anak Dumba ineh iapeh-iapeh pana' ulekNeh. Idi ideh pangeh inuli' rat arang lemulun mangun ku bua' luk atun kuan Allah idi kuan Anak Dumba ineh. 5#Sep 3.13 Rat mon ideh na mebalih idi na sala' teh.

Teluh Burur Melaikat

6Idi ui nenier aceh melaikat baken luk temulud déi' arang gawa', idi ieh inan Bala luk Do' luk meruked luk miak badén kuan amung-amung lemulun luk tudo bang tana' ini, ieh ineh kuan anid-anid pupu, babpat, buri', idi inul. 7Ieh nengitang, “Do' matot inan Allah idi ngerayeh Neneh, ngaceku pangeh nacing karebNeh ngukum lemulun! Do' sembayang neneh luk nemudut langit, tana', idi abpa' rayeh dengan amung bued abpa' teh!”

8 # Yes 21.9; Yer 51.8; Lin 18.2 Melaikat luk kedueh nemaya' melaikat luk pun-pun ineh, kebalaneh, “Pangeh netabpa, pangeh netabpa bawang Babil luk rayeh, luk nemaré abpa' anggur rupen amung-amung pupu, ieh ineh useh Allah, ngaceku sawa'neh.”

9Melaikat luk keteluh nemaya' nedidueh luk atun ineh, idi nengitang, “Kudeng idé lemulun luk sembayang inan pung ineh dengan akangneh, idi ngalap tanu' nan madu' idi ticu'neh, 10#Yes 51.17; Pud 19.24; Yeh 38.22 idi ieh teh miak ngirup ratnan abpa' anggur, ieh ineh useh Allah luk tinina' dengan na pinuar bang sangkir usehNeh ineh. Lemulun ineh miak uen ngedereh ku apui idi batu apui pa kiung melaikat-melaikat luk meligan, idi pa kiung Anak Dumba ineh. 11#Yes 34.10 Rabpun apui luk ngedereh nedeh ineh miak umak amé' dita' ruked-ruked. Ideh na miak ugka' medereh tebaco kedangan, ieh ineh lemulun luk sembayang inan pung idi akangneh ineh, idi luk nengalap etu ngadanneh ineh.”

12Ngaceku ineh, na miak na pupu Allah tuman idi manu, ieh ineh lemulun luk lutep maya' ukum-ukum Allah idi lutep manu inan Yésus.

13Idi ui neninger aceh arod rat bang langit luk nepebala, “Do' ngayud kudeng ini: Samal kuan lemulun luk pangeh naté, ieh ineh luk naté bang Tuhan rat pad sini!”

“Matu,” kebala Roh ineh, “Ideh miak ucu' ratnan amung erurdeh; ngaceku kekamendeh luk do' maya' nedeh.”

Pinginud Ratnan Ngeranih Bang Tana' ini

14 # Dan 7.13 Idi ui nenier inan aceh laput luk mebuda', idi luun laput ineh inan Seburur Lemulun luk tudo, ayuNeh mepad kudeng lemulun, idi inan pata amas nan uluhNeh, idi bang paladNeh inan aceh aling luk metadem. 15#Yo 3.13 Idi aceh melaikat luk baken neremuat teh rat bang ruma' Allah, luk nengitang kuan Lemulun luk tudo luun laput ineh, kebalaneh, “Ngeruat alingMu idi ngeranih, ngaceku karebneh ngeranih pangeh nacing, ngaceku perinien tana' ini pangeh melak!” 16Idi Lemulun luk tudo luun laput ineh pana' nengimet alingNeh déi' bang tana', idi tana' ineh rinanihNeh peh.

17Idi teh aceh melaikat luk baken neremuat rat bang ruma' Allah luk déi' surga. Ieh teh inan aceh aling luk metadem.

18Idi aceh melaikat nacing teh rat bubpun, idi ieh luk inan lalud ratnan apui. Ieh nengitang kuan melaikat luk ngimet aling luk metadem ineh, kebalaneh, “Do' ngeruat alingmu luk metadem idi ngamung amung-amung runguh bua' anggur luk bang tana', ngaceku bua'neh pangeh melak!” 19Idi melaikat ineh nenguit alingneh idi nengeranih bua' anggur luk bang tana' ini, idi nengerareng ineh bang su luk inan rumik luk rayeh, ieh ineh useh Allah. 20#Yes 63.3; Tid 1.15; Lin 19.15 Idi bua' anggur ineh rinik lemulun mado rat ku bawang; idi dara'deh pana' manud rat bang su luk inan rumik ineh limeh kaki kidalemneh, idi kiadoneh 200 batu.

Currently Selected:

BALA LUK LINIO 14: BLD

Highlight

Copy

Compare