MARKUS 10
10
Yésus Mada' Ratnan Ngelagkan Awan
(Mat 19.1–12; Luk 16.18)
1Yésus nenecan bawang ineh, idi iné' tana' Yudia idi neguta Abpa' Yarden, idi mula' lemulun iné' Neneh teh, idi Ieh nemada' nedeh mepad kudeng luk pekalai teh.
2Lun Parisi nacing sikal nutun Neneh, idi ideh nengitun Neneh, “Miakké seburur lemulun ngelagkan awanneh?”
3Idi Yésus nengor baladeh dengan aceh itun, “Anunké luk pangeh icuk Musa nemuyuh?”
4 #
Bad 24.1–4; Mat 5.31 Idi keburi'deh, “Musa nenima' lemulun ngayud surat patad, pad miak ngelagkan awan.”
5Kebala Yésus nedeh, “Ngaceku ratnan tueh niat muyuh idi Musa nengayud ukum ini kuan muyuh. 6#Pud 1.27; 5.2 Iamo' rat pun-pun tana' ini, maya' kudeng luk inayud, ‘Allah nenganau' lemulun deléi idi decur. 7#Pud 2.24 Ngaceku ineh do' lemulun necan taman-tinanneh idi pamung dengan awanneh, 8idi didueh ineh mangun ku sebuleng burur peh,’ pad didueh ineh baken dueh burur peh, iamo' sebuleng burur mo'. 9Ngaceku ineh, luk pangeh tinutup Allah, aleg seburur lemulun matad peh.”
10Kareb ideh nacing déi' ruma', idi anak-anak sekola' Yésus nengitun Neneh ratnan ineh. 11Idi kebalaNeh nedeh, “Idé-idé luk ngelagkan awanneh idi ngaweh decur baken, ieh ineh pasét pa kiung awanneh, 12#Mat 5.32; 1 Kor 7.10–11 idi kudeng seburur decur ngelagkan awanneh, idi ngaweh deléi luk baken, ieh pana' pasét teh.”
Yésus Ngeperuan Anak-Anak
(Mat 19.13–15; Luk 18.15–17)
13Idi lemulun nenguit anak-anak luk isuut iné' Neneh, pelé Ieh miak ngakem nedeh. Iamo' anak-anak sekola'Neh nemebpeng nedeh. 14Kareb Yésus nekali' ratnan ineh, idi Ieh museh, kebalaNeh, “Nima' anak-anak luk isuut amé' Negku, idi aleg mebpeng nedeh, ngaceku lemulun luk kudeng ini luk kuan Imet Allah. 15#Mat 18.3 Ngerawé do'-do'! Idé-idé lukna ngalap Imet Allah ineh mepad kudeng anak luk isuut, na ieh miak semuet bang ineh.” 16Idi Yésus nengapel anak-anak ineh, idi Ieh nengerareng ticu'Neh luundeh idi nengeperuan nedeh.
Seburur Lun Do'
(Mat 19.16–30; Luk 18.18–30)
17Kareb Yésus negugkang nalan, inan seburur lemulun luk nupun idi netekeradung pa kiungNeh, idi nengitun Neneh keburi'neh, “O Guru luk do', anunké luk miak ruenku, pelé ui miak ngalap ulun luk meruked?”
18Idi Yésus nepebala neneh, “Anunké punneh iko mala Negku do'? Seburur pana' na luk do', inan Sebuleng mo', ieh ineh Allah. 19#Pur 20.12–16; Bad 5.16–20 Kali' rungen iko pangeh kali' ukum-ukum Allah: ‘Aleg iko ngaté lemulun, aleg iko pasét, aleg iko mano, aleg iko mangun ku lun nekali' luk mebalih, aleg iko naluk lemulun, ngedita' taman-tinanmu.’ ”
20Idi ieh nepebala nan Yésus, “O Guru, amung ini ui pangeh nemaya' rat kareb ui suut.”
21Idi Yésus nenutong lemulun ineh dengan mawa neneh, kebalaNeh, “Sebuleng mo' luk nateh inau'mu, muli' iko idi masui amung binawehmu, idi maré kuan lun masi', pad iko miak ngalap binaweh déi' surga; idi amé' maya' Negku.” 22Iamo' ieh tekedamut ku bala ineh, idi eh nuli' dengan mesusa' niatneh, ngaceku ieh mula' binaweh.
23Yésus nenier libut-libutNeh idi nepebala kuan anak-anak sekola'Neh, “Mikat tu-tu kuan lemulun luk mula' binaweh semuet bang Imet Allah!”
24Idi anak-anak sekola'Neh mawa ngaceku bala ineh. Iamo' kebala Yésus kuandeh teh, “O anak-anakKu, miak tu-tu semuet bang Imet Allah! 25Meluun malé aceh pung unta semuet bang lubang pinu' ratnan seburur lemulun luk mula' binaweh semuet bang Imet Allah.”
26Idi anak sekola' Yésus pelaba awa idi nengitun seburur dengan seburur, “Kudeng pieh kudeng ineh, idéké luk miak ngalap ulun?”
27Idi Yésus nenutong nedeh idi nepebala, “Kuan lemulun ini na miak mangun, iamo' baken kudeng ineh kuan Allah, ngaceku kuan Allah luk amung-amung miak mangun.”
28Idi kebala Pétrus Neneh, “Kai ini, panegh nenecan luk amung-amung pad maya' Namu.” 29Kebala Yésus nedeh, “Ui pebala nemuyuh, na luk idi seburur lemulun pana' luk pangeh nenecan ruma'neh, kinanakneh deléi idi decur, taman-tinanneh, anak-anakneh, idi tana'neh, ngaceku Ui idi ngaceku Bala luk Do' ineh teh, 30iamo' ieh miak ngalap meratu kua' kinula'neh kareb ieh bang tana' ini, ieh ineh ruma', kinanakneh deléi idi decur, tinan idi anak-anak, idi tana', idi teh dereh; iamo' bang kareb luk macing muci ieh miak ngalap ulun luk meruked. 31#Mat 20.16; Luk 13.30 Idi mula' lemulun luk pa atun miak amé pa muci, idi luk pa muci ineh amé' pa atun.”
Yésus Mada' Seketeluh Kua' Teh Ratnan AtéNeh
(Mat 20.17–19; Luk 18.31–34)
32Kareb ideh nalan amé' déi' Yerusalim, idi Yésus pana' nenalan pa atun, idi ideh merapang, idi lemulun luk nemaya' nedeh ineh pana' matot. Kareb ineh teh Ieh nenguit pulu' dueh anak sekola'Neh, idi nengimun mada' nedeh ratnan amung-amung luk miak mangun kuanNeh. 33KebalaNeh, “Nekini tau amé' déi' Yerusalim, idi Anak-Lemulun miak barén bang palad imam-imam rayeh idi guru-guru Ukum. Ideh miak ngukum Neneh pitayen, idi miak maré Neneh bang palad lun pupu baken. 34Idi teh ideh miak situnga Neneh, ngelica' Neneh, mebal Neneh, idi ngaté Neneh, iamo' pangeh teluh aco idi Ieh miak tumui teh.”
Putuh Yakub Idi Yahya
(Mat 20.20–28)
35Yakub idi Yahya luk anak Sabdi nacing Neneh, idi nepebala, “O Guru, inan luk pian kai Namu.”
36Idi kebala Yésus nedidueh, “Anunké luk pian medueh Negku?”
37Idi kebala didueh, “Do' maré nekai tudo seburur pa tinueh idi seburur pa kabing bang ImetMu luk rayeh.”
38 #
Luk 12.50
Iamo' kebala Yésus nedidueh, “Medueh na kali' luk pinutuh medueh. Miakké medueh ngirup ratnan sangkir derehKu ini? Idi miakké medueh rerebpen maya' lawé rerebKu?”
39Idi keburi' didueh, “Miak.”
Idi Yésus nepebala nedidueh, “Matu medueh miak ngirup ratnan sangkir derehKu, idi medueh miak rerebpen maya' lawé rerebKu teh. 40Iamo' ratnan tudo pa tinueh idi pa kabingKu ineh na Ui melalud maré kuan medueh. Iamo' babpat ineh pangeh tinina' kuan lemulun luk pangeh pinili' Allah.”
41Kareb pulu' burur anak sekola' ineh neninger ratnan luk kudeng ineh, idi ideh museh ni Yakub idi Yahya. 42Idi Yésus nenawar nedeh amé' Neneh, idi kebalaNeh, “Muyuh kali' lemulun luk titen lun luk ngimet lun pupu baken meteh ngimet nedeh, idi lun rayeh-rayehdeh ngimet lalud arangdeh. 43#Luk 22.25–26 Iamo' muyuh ini baken kudeng ineh. Kudeng idé luk sikal mangun rayeh rat arang muyuh, do' ieh mangun ku lun ngasa' nemuyuh. 44#Mat 23.11; Mrk 9.35; Luk 22.26 Idi idé-idé luk rat arang muyuh sikal mangun ku lun rayeh, do' ieh mangun ku demulun kuan amung-amung. 45Ngaceku Anak-Lemulun pana' na nacing pad uen ngasa', iamo' Ieh pian ngasa' idi maré ulunNeh mangun ku uli' kuan amung-amung lemulun.”
Yésus Ngedo' Bartimius Luk Mebuser
(Mat 20.29–34; Luk 18.35–43)
46Idi ideh nacing déi' Yeriko. Kareb Yésus nenalan rat Yeriko dengan anak-anak sekola'Neh idi pelaba ula' lemulun nemaya' nedeh, idi inan aceh anak Timius, luk ngadan Bartimius luk mebuser, tudo iring dalan mutuh usin. 47Kareb ieh neninger ratnan Yésus lun Nasarét idi, ieh nengitang, keburi'neh, “O Yésus Anak Daud, méi' negku!”
48Idi lun mula' ineh museh neneh idi nengecuk neneh pirud, iamo' meluun rayeh tangneh keburi'neh, “O Anak Daud, méi' negku ini!”
49Idi Yésus nugka', kebalaNeh, “Nawar neneh.”
Idi ideh nenawar lun mebuser ineh, keburi'deh, “Do' iko mawang niat idi tumui. Ieh nawar namu.”
50Idi ieh nenecan tarubneh ineh, idi netuped idi iné' matun Yésus.
51Idi kebala Yésus neneh, “Anunké luk pianmu Negku?”
Idi keburi' lun mebuser ineh Neneh, “O Guru, ui mutuh miak nier.”
52Idi Yésus nepebala neneh, “Nalaniko, anumu pangeh nengedo' namu.”
Idi petacu ieh miak nier peh, idi nemaya' Yésus bang lawéNeh.
Currently Selected:
MARKUS 10: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
