YEREMIA 48
48
Ratnan Usag Moab
1 #
Yes 15.1—16.14; 25.10–12; Yeh 25.8–11; Am 2.1–3; Sep 2.8–11 Kebala Tuhan luk Melalud ratnan Moab,
“Mesusa' kuan lun Nebo —
bawangdeh inusag!
Kiriataim pangeh ilap,
idi libung batuneh luk rayeh inusag,
pupuneh pana' inigu' peh,
2amung ubur Moab pangeh netutu'.
Déi' Hesbon bunu'neh pegayam,
‘Do' tau ngusag bawang Moab.’
Bawang Dibon miak pirud,
ngaceku tuda'-tuda' baweh ngerieng neneh.
3Idi lun Horanaim ngitang
‘Inan susa' idi bunu' luk rayeh!’
4“Moab pangeh inusag,
ninger amung anak nangi'.
5Ninger ilung tangi'deh,
ruked dalan amé' Luhit,
ninger aroddeh ngaceku mesusa',
ruked dalan amé' Horonaim.
6‘Miket! Upun buro!’ kebaladeh.
‘Upun, mepad kudeng keladai luk meliput
déi' su luk ali-ali!’
7“O Moab, iko merapet inan tueh idi do'mu,
iamo' nekini iko miak lapen,
idi allahmu Kemos miak tebanen
dengan amung pengulu idi imamneh.
8Aceh bawang pana' nateh luk na inusag.
Amung ruan idi raked miak sagen.
Ui ini Tuhan pangeh nepebala.
9Nganau' aceh batu ku terawé ratnan Moab,
ngaceku bawang ineh uen ngusag.
Amung ruma'neh pana' miak uen ngusag,
idi seburur pana' nateh luk tudo su ineh teh.”
(10Kediman kuan lemulun luk na nganau' kekamen Tuhan dengan amung niatneh! Kediman kuan lemulun luk na ngaté nelun ku pelapetneh!)
Amung Bawang Moab Inusag
11Kebala Tuhan, “Macing nekini Moab na inan susa', idi teh na tiban. Moab mepad kudeng abpa' anggur luk neketecan bang rubi, idi na inutang bang rubi baken. En na mekisu', énneh mepad kudeng luk atun.
12“Iamo' tarekneh miak macing kareb Ui ngecuk lemulun ngutang Moab mepad kudeng abpa' anggur. Ideh miak nala' abpa' anggur idi mila' rubi ineh. 13Kareb ineh lun Moab dat niat inan allahdeh Kemos, mepad kudeng lun Israil dat niat inan Baitel, aceh allah luk inandeh merapet.
14“O lun Moab, ngudehké muyuh mala
nemuyuh lun luk mebala,
lun luk mesangit bang bunu'?
15Moab idi amung bawangneh inusag,
idi anak adi'deh luk deléi luk do' taga pangeh pinaté.
Ui ini, Raca', Tuhan luk Melalud,
idi Ui pangeh nepebala.
16Ukum Moab malé macing,
idi ieh malé uen ngusag.
17“Do' muyuh temido ni Moab,
O muyuh luk tudo muneng ku bawang ineh,
amung muyuh luk pangeh nekali' uburneh.
Kebala muyuh, ‘Imetneh luk melalud pangeh inugka';
ubur idi laludneh pangeh netutu'.’
18O muyuh luk tudo déi' Dibon,
temurun ratnan kerusi ubur muyuh,
idi tudo luun tana'.
Lun luk ngusag Moab pangeh nacing,
idi pangeh nengusag amung libungneh.
19O muyuh luk tudo déi' Arur,
do' tuped iring dalan idi nganét.
Ngitun nelun luk buro anun luk mangun.
20‘Moab pangeh netabpa,’ miak beléndeh,
‘Do' temido neneh. Ieh pangeh inigu'.
Mada' nelun luk tudo tangeb Abpa' Arnon, Moab pangeh inusag!’
21“Ukum pangeh nacing kuan amung bawang luk luun raked: luun Holon, Yasa, Mepat, 22Dibon, Nebo, Bait Diblataim, 23Kiriataim, Bait Gamul, Bait Mion, 24Keriot, idi Bosra. Ukum pangeh nacing kuan amung bawang Moab, luk mado idi luk muneng pana'. 25Lalud Moab pangeh linaya', idi tuehneh pangeh inusag. Ui ini Tuhan pangeh nepebala.
Moab Miak Uen Ngebeneh
26“Ngabuk ni Moab, ngaceku ieh sikal metueh rat Negku luk Tuhan. Moab miak silubid luun uta'neh, pad lemulun miak meriruh. 27O Moab, ngerawé kudeng apeh iko nesitunga nelun Israil? Muyuh nesitunga nedeh mepad kudeng muyuh nesitunga nelun luk kikem arang lun mano.
28“O muyuh luk tudo déi' Moab, necan bawang muyuh! Amé' tudo luun pegkung batu! Do' muyuh mepad kudeng sukur luk nganau' ararneh bang lubang pegkung batu ineh. 29Moab pelaba dita' niat! Ui pangeh nekali' dita' niat idi sido' niat muyuh. Idi Ui kali' nemuyuh megéi' ngerawé burur muyuh sebuleng. 30Ui ini Tuhan kali' dita' niat lun Moab. Baladeh luk medita' na ulekneh idi kekamendeh na meruked. 31Ngaceku ineh, Ui miak nangi' nelun Moab idi lun Kir Heres. 32Ui miak nangi' nelun Sibma, meluun ratnan lun Yaser. O bawang Sibma, iko mepad kudeng aceh lawa anggur, idi angatmu macing déi' dipar Takung luk Mepaci', idi macing Yaser pana'. Iamo' nekini amung bua'mu idi anggurmu pangeh inusag. 33Na luk idi awang niat idi do' ria bang tana' Moab luk mebaleng. Idi abpa' anggur pana' na manud rat bang su luk inan ngeradu' bua' anggur ineh. Na lemulun luk nganau' abpa' anggur idi luk ngitang ku awangdeh.
34“Lun Hesbon idi lun Elila ngitang, idi tangdeh pedingeren macing Yahas, idi teh pedingeren lun Soar, idi macing Horonaim idi Eglat luk Mebaruh. Idi Arur Nimrim pana' nekeket. 35Ui miak ngagka' nelun Moab, pad ideh na maré luk sabpen luun su luk inandeh sembayang, idi pad ideh na maré luk kereten kuan allahdeh. Ui ini Tuhan pangeh nepebala.
36“Idi niatKu mesusa' ngaceku Moab idi lun Kir Heres. Ui mepad kudeng lemulun luk ngiup suling mangun ku aceh tido, ngaceku amung binawehdeh na idi. 37Amung-amungdeh pangeh nengiki uluhdeh idi teh ideh nemingit buluh tangdeh. Ideh nengurat ticu'deh idi amung-amungdeh nenacung. 38Luun amung apo ruma' lun Moab idi déi' luun amung natad pana' na luk baken, lun temido mo', ngaceku Ui nemila' Moab mepad kudeng aceh rubi luk na pian lun. Ui ini Tuhan pangeh nepebala. 39Moab pangeh inusag! Do' muyuh ngitang! Ngaceku Moab pangeh inigu'. Ieh pangeh inusag, idi amung pupu libutneh situnga neneh.
Moab Na Miak Mepuit
40“Ui ini Tuhan pangeh nepejani': Aceh pupu miak ngeladai luun Moab mepad kudeng aceh kanui. 41Amung bawangneh idi libung batu miak lapen. Idi bang aco sineh amung baweh Moab miak matot mepad kudeng decur luk mét nenganak. 42Moab miak uen ngusag, pad na ieh mangun ku aceh pupu teh, ngaceku ieh sikal metueh rat Negku. 43Inan tot, lubang, idi abpung temina' kuan lun Moab. Ui ini Tuhan pangeh nepebala. 44Idé-idé luk sikal buro ratnan luk katot miak mebpeh bang lubang. Idi idé-idé luk manad sikal remuat rat bang lubang ineh miak mekaneh abpung, ngaceku Ui pangeh nengeletep aceh kareb luk inan Moab uen ngusag. Ui ini Tuhan pangeh nepebala. 45Lemulun luk buro nakap pedengan déi' bawang Hesbon. Iamo' Hesbon, bawang luk inimet Raca' Sihon atun uned meseb. Amung raked idi pegkung lun Moab luk pian pebunu' pangeh neseb. 46Mesusa' kuan lun Moab! Lemulun luk nesembayang inan Kemos pangeh pinaté, idi anakdeh luk deléi idi decur pangeh tiban.
47“Iamo' muci aco, Ui miak ngeperuan ni Moab baruh.” Ieh ineh ukum Tuhan kuan Moab.
Currently Selected:
YEREMIA 48: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
