YEREMIA 18
18
Yeremia Déi' Ruma' Lun Luk Mileh Mipi' Kuden
1Kebala Tuhan negku, 2“Amé' ruma' lun luk mileh mipi' kuden, idi Ui miak mada' balaKu namu.” 3Idi ui iné' déi', idi nenier lun ineh mipi' kuden. 4Idi kareb aceh kuden luk inau'neh na do' tu, ieh miak ngalap tana' kuden ineh idi muar neneh baruh teh idi nganau' kuden baruh teh.
5Idi kebala Tuhan negku, 6“Kali' rungen Ui miak nganau' kuan muyuh lun Israil, mepad kudeng luk inau' lun luk mileh mipi' kuden. Muyuh idi bang paladKu, mepad kudeng tana' kuden luk bang palad lun luk mileh mipi' kuden. 7Kudeng idan-idan Ui pebala, Ui sikal mubput, ngaro, idi ngusag aceh pupu idi aceh bawang, 8idi pupu ineh uren ratnan amung-amung datdeh, idi Ui miak ngisu' terawéKu, pad Ui na miak nganau' luk bilaKu. 9Iamo', kudeng Ui pebala, Ui miak nibu idi ngeletep aceh pupu idi bawang, 10idi pupu ineh nganau' luk dat, Ui miak ngisu' terawéKu, pad Ui na miak nganau' luk bilaKu. 11Ngaceku ineh do' mada' nelun Yahuda idi lun Yerusalim, kebalamu, ‘Ui ini Tuhan luk mileh mipi' kuden. Ui temina' ku ukum kuan muyuh. Do' muyuh uren ratnan kekamen muyuh luk dat idi ngisu' lawé idi kekamen muyuh.’ 12Iamo' ideh miak pebala, ‘Na ulekneh mada' nekai! Kai sikal maya' terawé kai sebuleng. Kai miak maya' pinian burur kai sebuleng idi maya' niat kai luk dat.”
Lun Israil Necan Tuhan
13Kebala Tuhan,
“Do' ngitun amung-amung pupu,
Inanké luk kudeng ineh mangun atun?
Lun Israil pangeh nenganau' luk pelaba dat!
14Miakké salju luk luun Pegkung Lebanon ubpa'?
Miakké arur luk luun pegkung ineh mekeket?
15Iamo' pupuKu pangeh nekelupan Negku.
Ideh ngeseb umau luk do' buen kuan akangdeh.
Ideh netebaceng maya' dalan luk matu,
idi na ideh maya' dalan luk meruked,
iamo' ideh maya' dalan luk na rapi'.
16Ideh nenganau' bawang ini mangun ku luk katot,
idi uen ngedat ruked-ruked.
Idi amung lun luk lemaba,
megagap ku luk sirendeh,
idi ideh siguling uluh idi mawa.
17Ui miak matad pupuKu pa kiung bunu'deh;
mepad kudeng kipu luk mepalid ku bui rat pa busat aco.
Ui miak teketed rat nedeh.
Na Ui ngedengan nedeh kareb susa' ineh macing.”
Gayam Lun Dat Luk Sikal Metueh Rat Ni Yeremia
18Idi kebala lun mula', “Do' tau nala' ni Yeremia! Inan teh imam-imam luk miak mada' netau, idi lun mileh luk ngubuk netau, idi nabi-nabi luk miak mada' bala Allah. Do' tau ngadu' neneh, idi aleg ninger bada'neh.”
19Idi kesembayang Yeremia, “O Tuhan, ninger balaku, idi ninger adu' bunu'ku negku. 20Miakké luk do' uen ngua' ku luk dat? Ideh pangeh nengukat aceh lubang kuanku. Do' ngerawé ratnan sembayangku kuandeh pa kiungMu kareb ui nemutuh Namu aleg museh nedeh. 21Iamo' nekini Tuhan, nima' anakdeh maté ku lau. Nima' nedeh pitayen bang bunu'. Nima' decurdeh patad ratnan awandeh idi anakdeh. Nima' amung deléi maté ku ét, idi amung anak adi' deléi pitayen bang bunu'. 22Ngecuk aceh baweh ngaro ruma'deh denak-denak pad ideh ngitang idi matot. Ideh pangeh nengukat aceh lubang kuanku idi nenganau' abpung pad ideh ngakem negku. 23Iamo' Tuhan, Iko luk kali' gayamdeh luk sikal ngaté negku. Aleg Iko maré do' ratnan dat idi sala'deh. Do' nala' nedeh! Ngukum nedeh kareb Iko museh!”
Currently Selected:
YEREMIA 18: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
