YEREMIA 17
17
Sala' Idi Ukum Lun Yahuda
1Kebala Tuhan, “O lun Yahuda, sala' muyuh pangeh inayud ku pén belawan. Ieh pangeh inayud luun niat muyuh ku batu intan luk mesilo, idi inarit luun anid lidung bubpun luk inan muyuh maré baré luk sabpen. 2Anak-anak muyuh kali' amung bubpun idi ulung luk tiped kuan akang Asera luk muneng anid kayuh luk mebata' luun surud, 3idi luun pegkung. Ui miak maré bunu' muyuh ngalap amung binaweh muyuh, ngaceku sala' luk inau' muyuh aput bawang muyuh. 4Na miak na muyuh necan tana' luk biréKu nemuyuh. Idi Ui miak nganau' nemuyuh mangun ku demulun bunu' muyuh bang aceh bawang luk nateh nekali' muyuh, ngaceku usehKu mepad kudeng apui luk mulun ruked-ruked.”
Tuda'-Tuda' Bada'
5Kebala Tuhan,
“Ui miak ngukum lemulun luk teketed rat Negku,
idi luk merapet ku tueh lemulun
idi ulun tana' ini.
6Ieh mepad kudeng aceh kayuh luk isuut déi' su luk ali-ali,
luk mulun luun tana' luk tekering idi mepaci',
su luk na lemulun.
Idi na luk do' miak macing neneh.
7“Iamo' Ui ngeperuan lemulun luk merapet Negku.
8 #
Nani 1.3
Ieh mepad kudeng aceh kayuh luk tinibu tangeb abpa',
uatneh macing bang abpa'.
Na ieh matot ku rikan
ngaceku donneh megéi' mebata'.
Sagan tu pana' na mudan,
ieh miak kebua' kidi-kidi.
9“Idéké luk miak kali' niat lemulun?
Ieh ineh luk naluk meluun ratnan luk anun-anun.
Ieh mebura' ét, idi na miak uen ngedo'.
10 #
Lin 2.23; Nani 62.12 Ui ini Tuhan nutun terawé idi niat lemulun.
Ui ngukum anid burur lemulun
maya' lawéneh idi luk ruenneh.”
11Lemulun luk ngalap usin dengan naluk
mepad kudeng suit luk mamut terur suit baken.
Idi kareb ieh mangun ku lun do',
amung luk ilapneh metutu';
kekipedneh ieh mangun ku lun mebacé.
12Ruma' Allah tau mepad kudeng kerusi rayeh,
luk pinudut luun pegkung luk medita' rat pun-pun.
13Tuhan, Ieh ineh rapet lun Israil;
idi amung lemulun luk necan Neneh miak uen ngigu'.
Ideh miak metutu' mepad kudeng ngadan luk inayud luun tana',
ngaceku ideh pangeh nenecan Tuhan,
ieh ineh, bued abpa' luk do'.
Yeremia Mutuh Pedengan Ratnan Tuhan
14O Tuhan, ngedo' negku, pad ui do' ulun, idi muit negku pad ui na inan susa'. Iko mo' luk burenku!
15Kebala lun mula' negku, “Kudeng apehké bala ratnan Tuhan ngukum netau? Do' Ieh ngacing ukum ineh nekini!”
16Iamo' Tuhan, na ui nemutuh Namu ngukum nedeh. Idi na ui mawang niat kudeng inan susa' macing nedeh. O Tuhan, Iko kali' amung ineh, idi teh Iko kali' luk pangeh bilaku. 17Aleg Iko mangun ku luk katot kuanku. Iko luk inanku sigapung kareb inan susa'. 18Do' ngigu' nedeh luk ngedereh negku, iamo' ngulun negku. Do' ngatot nedeh, iamo' aleg ngatot negku. Ngacing susa' kuandeh idi mila' nedeh.
Ratnan Maya' Ukum Aco Luk Inan Mudeng
19Kebala Tuhan negku, “O Yeremia, amé' tuped munung Tanga' Lemulun, su inan raca'-raca' Yahuda semuet idi remuat, kareb ideh nalan rat Yerusalim, idi do' iko amé' tuped munung amung tanga' Yerusalim luk baken teh. 20Ngecuk amung raca' idi amung lun Yahuda, idi amung lemulun luk tudo déi' Yerusalim idi luk maya' tanga' ini, ninger luk belénKu. 21#Neh 13.15–22 Do' mada' nedeh, kudeng ideh ngerawé ulundeh, aleg ideh mabeh kareb Aco luk inan Mudeng. Aleg ideh mabeh anun-anun maya' tanga' Yerusalim. 22#Pur 20.8–10; Bad 5.12–14 Idi aleg ideh nguit anun-anun remuat rat bang ruma'deh kareb Aco luk inan Mudeng. Aleg ideh, ngakem kareb Aco luk inan Mudeng. Ngaceku aco ineh meligan kuandeh, mepad kudeng luk icukKu kuan tepundeh. 23Tepundeh na neninger idi nemaya' balaKu. Iamo' ideh metueh niat, idi na pian maya' Negku idi sibada' rat Negku.
24“Ngecuk lemulun ini maya' amung balaKu. Aleg ideh mabeh anun-anun maya' tanga' bawang ini kareb Aco luk inan Mudeng, pad Aco luk inan Mudeng mangun ku aco luk meligan kuandeh. Idi na tu-tu ideh ngakem kareb ineh. 25Idi raca'-raca' idi penguludeh miak semuet maya' tanga' Yerusalim dengan amung lalud raca', mepad kudeng Raca' Daud. Ideh miak nalan maya' keréta idi kuda dengan lun Yahuda idi lun Yerusalim pana', pad bawang Yerusalim megéi' inan mula' lemulun. 26Lemulun miak macing rat bawang-bawang Yahuda idi ruma'-ruma' libut-libut bawang Yerusalim. Ideh miak macing rat babpat tana' Beniamin, rat surud-surud, rat pegkung-pegkung, idi rat Negeb pana'. Ideh miak nguit baré luk sabpen idi luk kereten, dengan baré luk kenen idi umau luk do' buen, dengan baré ubur, amé' bang ruma'Ku. 27Iamo' do' ideh maya' balaKu. Do' ideh ngerawé Aco luk inan Mudeng mepad kudeng aco luk meligan idi na mabeh anun-anun maya' tanga' Yerusalim bang aco ineh. Kudeng ideh ngelaba ukum Aco luk inan Mudeng, Ui miak ngeseb amung tanga' Yerusalim. Idi amung-amung ruma' raca' déi' Yerusalim miak sabpen ku apui ineh, idi seburur pana' nateh miak ngaté apui ineh.”
Currently Selected:
YEREMIA 17: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
