HOSIA 1
1
1 #
2 Rac 15.1–7; 2 In 26.1–23; 2 Rac 15.32–38; 2 In 27.1–8; 2 Rac 16.1–20; 2 In 28.1–27; 2 Rac 18.1—20.21; 2 In 29.1—32.33; 2 Rac 14.23–29 Surat ini ngegala' bala luk biré Tuhan ni Hosia Biri kareb Raca'-raca' Usia, Yotam, Akas, idi Hesekia pesua ngimet bawang Yahuda, idi kareb Raca' Yerebom Yoas ngimet bawang Israil.
Awan Idi Anak-Anak Hosia
2Kareb Tuhan pun-pun pebala nelun Israil dengan tang Hosia, idi kebalaNeh neneh, “Pupu bang bawang ini na lutep Negku idi ideh sembayang inan allah baken. Ngaceku ineh do' iko ngaweh aceh decur luk na lutep namu muci; pad iko inan anak rat neneh.”
3Ngaceku ineh Hosia nengaweh ni Gomer Diblaim. Idi ieh mali' idi nenganak aceh anak deléi. 4#2 Rac 10.11 Kebala Tuhan ni Hosia, “Do' nganau' ngadanneh, ‘Yesril' ngaceku na mio teh ui miak ngukum raca' Israil ngaceku tepunneh Yihu nengaté tuda'-tuda' lemulun déi' Yesril. Idi Ui miak ngagka' imet inul Yihu déi' Israil. 5Idi kareb ineh, Ui miak ngusag baweh lun Israil, luun Raked Yesril.”
6Sekua' teh Gomer mali' idi ieh nenganak aceh anak decur. Idi kebala Tuhan ni Hosia, “Do' nganau' ngadanneh, ‘Na Inan Méi',’ ngaceku Ui na miak méi' idi maré do' nelun Israil teh. 7Iamo' Ui miak méi' nelun Yahuda. Ui ini Tuhan Allahdeh miak ngulun nedeh, iamo' baken ku bunu', pelapet, binor, kuda, idi lun luk maya' kuda pana'.”
8Kareb Gomer nugka' niti' “Na Inan Méi',” idi ieh mali' teh idi nenganak aceh anak deléi teh. 9Kebala Tuhan ni Hosia, “Do' nganau' ngadanneh, ‘Baken PupuKu,’ ngaceku muyuh ini, Israil, baken pupuKu, idi Ui ini baken Allah muyuh.”
Israil Miak Uen Ngedo'
10 #
Rum 9.26
Lun Israil miak mepad kudeng bada déi' tangeb abpa' rayeh, ieh ineh na mekiap. Pangeh bila nedeh, “Muyuh ini baken pupuKu,” iamo' muci bala ini miak belén nedeh, “Muyuh ini anak-anak Allah lun mulun!” 11Idi lun Yahuda idi lun Israil miak uen ngamung. Ideh sebuleng miak mili' seburur lun ngimet, idi teh ideh miak amé' mula' idi uen ngeperuan. Matu, aco Yesril ineh aco rayeh!
Currently Selected:
HOSIA 1: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
