DANIEL 12
12
Kareb Luk Kekiped
1 #
Mat 24.21; Mrk 13.19; Lin 7.14; 12.7 “Kareb ineh, Mikail, melaikat luk rayeh ineh luk matar pupumu miak silagan. Idi kareb ineh inan mula' susa', luk meluun dat ratnan luk nekali' pupu ineh rat pun-pun. Kareb ineh amung pupumu, luk kuan ngadan inayud bang Surat Allah miak uen ngulun. 2#Yes 26.19; Mat 25.46; Yah 5.29 Mula' lemulun luk pangeh naré miak tumui baruh. Sebuangdeh miak mulun ruked-ruked, idi sebuangdeh miak ngalap igu' luk meruked. 3Lun luk mileh miak merasat mepad kudeng acang langit. Idi lun nemada' nelun baken nganau' luk matu, miak merasat mepad kudeng gituen macing ruked-ruked.
4 #
Lin 22.10
“Idi nekini, O Daniel, do' ngakeb surat ineh idi nganau' aceh etu luunneh, pad macing kareb luk kekiped. Idi kareb nateh kekipedneh mula' lemulun pian ngelio ratnan ilung luk mangun ineh.”
5Idi ui ini Daniel nekali' dueh burur lun baken luk tuped petutup abpa' ineh. 6Idi seburur nepebala nan lemulun luk ngayung ku kibung luk do', luk tuped pa dayeh sesuut, “Tuda' ioké pad macing kekiped amung luk inan mawa ini?”
7 #
Lin 10.5; 12.14 Idi lemulun luk ngayung ku kibung luk do' ineh nengiding dueh ticu'neh pa langit, idi nepebulung dengan ngadan Allah luk Meruked. Idi ui neninger balaneh, “Pangeh teluh lak setangal, kareb dereh pupu Allah ugka', amung luk inan mawa ini pangeh nangun.”
8Ui neninger balaneh ineh, iamo' na kali' ilungneh. Idi ui nengitun, kebalaku, “O tuan, kudeng apehké kekipedneh?”
9Idi kebalaneh, “Amé iko Daniel, ngaceku amung bala ini uen ngalum macing kareb luk kekiped. 10#Lin 22.11 Mula' lemulun miak uen ngeligan. Lemulun luk dat na miak kali' ilungneh, iamo' ideh miak nganau' luk dat mo'. Lemulun luk mileh miak kali' ilungneh.
11 #
Dan 9.27; 11.31; Mat 24.15; Mrk 13.14 “Rat kareb ideh nugka' maré baré luk pekalai, ieh ineh rat kareb Akang luk Nguyo, inan 1,290 aco. 12Samal kuan lemulun luk lutep pad macing 1,335 aco ineh mabud.
13“O Daniel, do' iko lutep macing kareb luk kekiped. Idi iko miak maté, iamo' iko miak tumui idi ngalap tabparmu kareb aco luk kekiped ineh.”
Currently Selected:
DANIEL 12: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
