IBERANI 11

Anu

1Idi anu, ieh ineh lutep ratnan amung-amung luk inan merapet, idi gala' ratnan amung-amung luk na siren. 2Ngaceku ratnan anu, lun rayeh-rayeh ineh pangeh inubur Allah.

3 # Pud 1.1; Nani 33.6, 9; Yah 1.3 Idi ratnan anu, tau kali' amung tana' ini pangeh pinudut dengan bala Allah, pad amung-amung luk siren tau pangeh pinudut ratnan luk na miak siren.

4 # Pud 4.3–10 Ratnan anu teh, Abil nemaré kuan Allah aceh baré luk meluun do' rantan baré Kain. Idi teh ngaceku anuneh ineh Allah nengamo neneh selemulun luk matu, ngaceku Allah sebuleng mawang niat ku baréneh. Ngaceku anuneh Abil pebala-pebala teh, sagan pana' ieh pangeh naté.

5 # Pud 5.21–24 Ratnan anu Enok na naté. Iamo' ieh kinikit Allah, pad ieh na sinier lemulun, ngaceku ieh kinikit Allah. Idi pangeh inayud, kareb nateh Enok kinikit, ieh nengawang niat Allah. 6Seburur pana' na miak ngawang niat Allah kudeng na luk idi anu. Ngaceku lemulun luk amé' matun Allah ineh na miak na manu ratnan Allah ineh idi, idi Ieh maré tabpar kuan lemulun luk nakap Neneh.

7 # Pud 6.13–22 Ratnan anu teh, Noh neninger bada' Allah ratnan luk miak mangun, sagan pana' ineh na miak sirenneh. Idi ieh nenganau' temina' aceh alud rayeh pad miak ngulun amung uang tetek ruma'neh. Dengan luk kudeng ineh Noh nengesala' tana' ini, idi ieh nengalap ratnan Allah babpat luk matu luk macing ratnan anu ineh.

8 # Pud 12.1–5 Ratnan anu teh Ibrahim nemaya' tawar Allah, pad ieh neremuat amé' nan bawang su luk pijani' Allah kuanneh. Idi ieh nenecan bawangneh sebuleng dengan na kali' iapeh luk ulekneh. 9#Pud 35.27 Ratnan anu teh ieh tudo bang tana' luk pijani' Allah ineh mepad kudeng bang tana' dulun. Ieh mudeng bang lepo dengan Isak idi Yakub, luk pad-pad nengalap babpat denganneh bang pejani' Allah teh. 10Ngaceku ieh nenginulat aceh bawang luk inan diri luk meraben ineh, luk tinui idi luk pinudut Allah.

11 # Pud 18.11–14; 21.2 Ratnan anu teh Ibrahim idi Sara nengalap tueh pad miak nginul sagan pana' didueh pelaba ngered, ngaceku Ibrahim manu inan Allah luk lutep maya' jani'Neh. 12#Pud 15.5; 22.17; 32.12 Ineh punneh ratnan seburur lemulun, luk mepad kudeng maté, pangeh neremuat tuda'-tuda' lemulun, luk mepad kudeng gituen déi' langit, idi mepad kudeng bada tangeb abpa' rayeh luk na miak uen ngiap.

13 # Pud 23.4; 1 In 29.15; Nani 39.12 Amungdeh ineh pangeh naté bang anu dengan na ngalap jani' ineh, iamo' pangeh sinierdeh idi ilapdeh rat mado. Ideh nengamo bururdeh lun sakai idi lemulun luk tudo segageh bang tana' ini. 14Lemulun luk pebala kudeng ini ngegala' ratnan bawangdeh sebuleng luk tekapendeh. 15Kudeng lemulun ini pangeh nengerawé ratnan bawang luk iratdeh, kali' rungen ideh sikal lemubed. 16Iamo' setuneh ideh geregan ku aceh bawang luk meluun do', ieh ineh luk déi' surga. Ineh punneh Allah na migu' tetanen Allahdeh, ngaceku Ieh pangeh nenganau' temina' aceh bawang kuandeh.

17 # Pud 22.1–14 Ratnan anu teh Ibrahim ineh nemaré Isak, kareb ieh tinutun Allah. Ibrahim ineh pangeh nengalap amung-amung jani', iamo' na ieh ara' ngeseb anak bulengneh, 18#Pud 21.12 sagan pana' pangeh bila Allah neneh, “Ratnan Isak inulmu miak tetanen.” 19Ibrahim nengerawé Allah melalud nui lemulun, sagan pana' ratnan até' idi ratnan luk kudeng ineh Ibrahim nengalap ni Isak muli' mulun.

20 # Pud 27.27–29, 39–40 Ratnan anu teh Isak nengeperuan ni Yakub idi Esau petulu dengan maung luk miak macing.

21 # Pud 47.31—48.20 Ratnan anu teh Yakub, kareb ieh lélé maté, nengeperuan anak-anak Yusup. Ieh nesembayang idi netekunal luun paped rukudneh.

22 # Pud 50.24–25; Pur 13.19 Ratnan anu teh Yusup, karebneh lélé maté, nemada' ratnan pupu Israil miak remuat rat Masir, idi ieh neperiteteng ratnan butungneh.

23 # Pur 2.2; Pur 1.22 Ratnan anu teh taman-tinan Musa nengapung neneh teluh bulan kinioneh, kareb ieh pangeh tinganak, ngaceku didueh nenier anak ineh do' taga, idi na didueh matot ku ukum raca'.

24 # Pur 2.10–12 Ratnan anu teh Musa, kareb ieh pangeh rayeh, ara' tetanen ku anak kuan anak decur raca' Masir. 25Ieh meluun pian ku dereh pad-pad dengan pupu Allah ratnan awang luk macing ratnan sala' idi luk segageh mo' kinioneh. 26Ngaceku bang terawéneh kediman ngaceku Keristus meluun rayeh raganeh rantan amung-amung binaweh Masir, ngaceku ieh nengerawé tabpar luk miak macing.

27 # Pur 2.15 Ratnan anu teh Musa nenecan tana' Masir dengan na matot ku useh raca' ineh, ngaceku ieh lutep, ayu-ayu ieh nenier Allah luk na sinier ineh. 28#Pur 12.21–30 Ratnan anu teh ieh nenganau' adat Paska, idi adat ngisak dara', pad melaikat até na ngaté amung-amung anak lun Israil luk atun.

29 # Pur 14.21–31 Ratnan anu teh lun Israil neguta Abpa' Pisui#11.29 Abpa Pisui, ieh ineh Abpa' luk Mesia'. mepad kudeng maya' tana' luk tekering; idi lun Masir luk nenutun nganau' kudeng ineh pangeh nened.

30 # Yus 6.12–21 Ratnan anu teh ar bawang Yeriko netabpa, kareb pangeh linibut lun Israil tudu' aco kinioneh. 31#Yus 6.22–25; Yus 2.1–21 Ratnan anu teh Rahab, decur luk mesawa' ineh na pinaté dengan amung-amung lemulun luk nengelaba ukum, ngaceku ieh nenawar lemulun luk iné' nier bawang dengan awang.

32 # Ngu 6.11—8.32; Ngu 4.6—5.31; Ngu 13.2—16.31; Ngu 11.1—12.7; 1 Sem 16.1—1 Rac 2.11; 1 Sem 1.1—25.1 Idi anunké luk miak belénku teh? Ngaceku na luk idi karebneh ui miak mada' ratnan Gidion, Barak, Samson, Yepta, Daud, Semuil, idi amung-amung nabi ineh. 33#Dan 6.1–27 Ratnan anu teh ideh nengelaya' tuda'-tuda' bawang, idi nenganau' luk matu. Ideh nengalap luk pijani' Allah, idi neniep tang balang. 34#Dan 3.1–30 Ideh nengilep budung apui, idi nepuit ratnan tadem pelapet. Ratnan laya' ideh pangeh mangun metueh. Ideh meluun sangit bang bunu'. Ideh nemasut baweh-baweh lun pupu baken pad ideh neburo. 35#1 Rac 17.17–24; 2 Rac 4.25–37 Ratnan anu teh tuda'-tuda' decur nengalap nelun luk naté bang tetek ruma'deh muli' mulun.

Idi luk baken pangeh pidereh, idi na ideh sikal puatin, pad ideh miak ngalap tui luk meluun do'. 36#1 Rac 22.26–27; 2 In 18.25–26; Yer 20.2; 37.15; 38.6 Lun baken pangeh tinutun dengan situnga idi bibal, idi teh kiling idi tinutup. 37#2 In 24.21 Ideh binitung ku batu, rinadi', idi pinaté ku pelapet. Idi ideh lawé-lawé dengan ayung kubil dumba idi kubil amék. Ideh masi', pidereh, idi inurat. 38Tana' ini na petap do' kuandeh. Idi ideh lawé-lawé déi' su luk ali-ali idi luun surud idi bang lubang batu idi lubang tana' pana'.

39Idi lemulun ini na nengalap luk pijani' ineh, sagan pana' ideh pangeh inubur ngaceku anudeh. 40Ngaceku Allah pangeh nengeletep luk meluun do' kuan tau, pad lemulun ineh na miak uen ngeligan kudeng na pad-pad dengan tau.

Currently Selected:

IBERANI 11: BLD

Highlight

Copy

Compare