IBERANI 10
10
1Ukum lun Yahudi ineh baken aceh pinginud luk meriput, iamo' mepad kudeng lungung peruan luk miak macing. Idi Ukum ineh na tu-tu miak ngeligan lemulun luk amé' muneng dengan baré luk kereten imam-imam anid-anid lak. 2Kudeng lemulun luk sembayang inan Allah pangeh linigan tu-tu ratnan sala'deh, na ideh ngerawé sala'deh, pad ideh miak ugka' maré baré. 3Iamo' baré-baré ineh mangun ku aceh terawé ratnan sala' lemulun anid-anid lak. 4Ngaceku na tu-tu dara' sapi' idi amék miak ngiu' sala' lemulun.
5 #
Nani 40.6–8
Ini punneh kareb Keristus ineh nesemuet bang tana', idi kebalaNeh kuan Allah,
“Luk kereten idi baré na Iko pian,
iamo' Iko pangeh nenganau' temina' aceh burur kuanKu.
6Idi baré luk sabpen, idi baré ngaceku sala' na petulu kuanMu.
7Idi kebalaKu, ‘Siruh Ui pangeh nacing
pad nganau' luk pianMu, O Allah,
maya' kudeng luk inayud bang Surat Ukum ratnan Ui.’ ”
8Pun-pun Ieh nepebala, “Luk kereten, baré luk baken-baken, baré luk sabpen, idi baré ngaceku sala' na Iko pian idi na petulu kuanMu,” sagan pana' barén maya' Ukum. 9Pangeh ineh Ieh nepebala, “Siruh, Ui pangeh nacing sikal nganau' luk pianMu.” Idi baré luk mon pangeh tila' Allah pad até Keristus ngelibal ineh. 10Ngaceku Yésus Keristus nenganau' luk pian Allah kuanNeh, amung tau pangeh biru' ratnan sala', ngaceku baré bururNeh luk biré sekua' mo' macing ruked-ruked.
11 #
Pur 29.38
Anid-anid burur imam lun Yahudi tuped anid-anid aco nganau' kekamendeh, idi megéi' maré luk kereten ineh teh, luk na tu-tu miak ngiu' sala' lemulun. 12#Nani 110.1 Iamo' Keristus nemaré aceh baré luk meruked ngaceku amung-amung sala', idi pangeh ineh Ieh tudo pa tinueh Allah. 13Nekini Ieh nganét su ineh pad amung-amung bunu'Neh mangun ku tapin kukudNeh. 14Dengan sebuleng baré Ieh pangeh nengeligan amung-amung lemulun luk biru' ineh macing ruked-ruked.
15Idi Roh Meligan pana' maré kali' kuan tau' ngaceku pangeh bilaNeh,
16 #
Yer 31.33
“Ini pejani' luk barénKu nedeh muci, kebala Tuhan:
Ui sikal nuet ukumKu bang niatdeh,
idi ngayud ukum ineh bang terawédeh.”
17 #
Yer 31.34
Idi kebalaNeh, “Amung-amung sala' idi kekamendeh luk dat na teruayenKu peh.” 18Idi kareb ideh pangeh nengalap do' ratnan sala' ineh, na luk idi baré teh ngaceku sala' lemulun.
Do' Tau Amé' Muneng Nan Allah
19Ngaceku ineh, O kinanak-kinanakku, tau mekuu' semuet bang Su luk Meluun Ligan ngaceku dara' Yésus. 20Ieh nengukab kuan tau aceh dalan luk mebaruh idi luk mulun, maya' dicing, ieh ineh bururNeh. 21Tau inan seburur Imam Rayeh luk ngimet uang ruma' Allah. 22#Uk 8.30; Yeh 36.25 Ngaceku ineh do' tau amé' matun Neneh dengan niat luk matu idi dengan anu luk mela, idi niat tau linigan ratnan teruayen niat luk dat, idi burur tau biru' ku abpa' luk melio. 23Do' tau ngimet meraben amo rapet tau dengan na merapang, ngaceku Allah ine lutep maya' jani'. 24Do' tau ngerawé seburur dengan luk baken pad ngacing awa idi kekamen luk do'. 25Aleg tau ugka' tebubpun pad-pad, mepad kudeng luk inau' sebuang lemulun, iamo' mada' seburur dengan seburur, meluun teh ngaceku muyuh nier Aco Tuhan pangeh muneng.
26Ngaceku kudeng tau nganau' sala' dengan rungen muci ratnan tau pangeh nengiti ratnan luk matu ineh, idi na luk idi baré teh ngaceku sala'. 27#Yes 26.11 Iamo' luk ketecan, ieh ineh tot ratnan ukum luk macing, idi lau' apui luk miak ngeseb amung-amung lemulun luk sikal metueh ratnan Allah. 28#Bad 17.6; 19.15 Idé-idé luk ngelaba Ukum Musa ineh, maté pitayen dengan na inan méi', maya' luk bila dueh teluh burur lemulun luk nekali'. 29#Pur 24.8 Do' muyuh ngerawé kudeng apeh berat ukum luk petulu ruen kuan lemulun luk ngeradu' Anak Allah, idi luk mala dara' pejani' ineh melutak bang luk inanneh linigan ineh, idi luk situnga-situnga inan Roh luk lawa katu ineh. 30#Bad 32.35; Bad 32.36 Ngaceku tau ngiti Neneh luk nepebala, “Ui ini miak ngukum, Ui ini miak ngua'.” Idi teh, “Tuhan luk miak ngukum pupuNeh.” 31Idi pelaba dereh kudeng tau mebpeh bang palad Allah luk mulun.
32Do' ngerawé ratnan ulun muyuh bang kareb luk atun ineh. Kareb ineh muci ratnan acang Allah ngacang nemuyuh, muyuh pelaba dereh, iamo' na muyuh linaya' ku bunu' ineh. 33Rabpu'-rabpu' muyuh inan situnga pa kiung lun mula' idi pidereh, idi rabpu'-rabpu' muyuh perurum nelun luk pidereh kudeng ineh. 34Ngaceku muyuh pidereh dengan lemulun luk tinutup, idi dengan awang nait muyuh, muyuh nima' binaweh muyuh pinawen lemulun, ngaceku muyuh kali' inan binaweh luk meluun do' idi luk meruked teh. 35Ngaceku ineh aleg ngetutu' kuu' muyuh luk ngacing tabpar luk rayeh. 36Ngaceku ulai niat inan ulek kuan muyuh, pad muyuh miak nganau' luk pian Allah, idi ngalap jani' ineh. 37#Hab 2.3–4 Maya' kudeng luk inayud,
“Segageh teh, idi Tuhan luk miak macing sikal macing teh
dengan na nginiuk.
38PupuKu luk matu ineh miak mulun ngaceku anu;
iamo' kudeng ieh lemubed, na Ui mawang niat neneh.”
39Iamo' tau ini baken lemulun luk lemubed, pad ngalap ukum até, iamo' lemulun luk manu pad ngalap ulun.
Currently Selected:
IBERANI 10: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
