PUDUT 11
11
Pudut Luk Medita' Dei' Babil
1Idi pun-pun lemulun bang aput tana' inan sebuleng buri' mo' idi baladeh mepad mo'. 2Idi bang aceh kareb ideh nenalan amé' pa busat aco, idi ideh nenier patar luk rayeh déi' tana' Sinar, idi ideh netudo déi'. 3Idi kebaladeh seburur dengan seburur, “Do' tau nganau' tana' mangun ku batu bata idi ngeseb ineh do'-do'.” Idi batu bata ineh mangun ku libal batu idi amut mangun ku libal tana' salit. 4Idi teh kebaladeh, “Do' tau mudut aceh bawang idi aceh pudut luk medita', idi budukneh macing déi' langit, idi ratnan ineh tau miak mebala, pad tau na mepatad bang aput tana' ini.”
5Idi Tuhan netemurun sikal nier bawang idi pudut luk medita' luk inau' lemulun ineh. 6Idi kebalaNeh, “Siruh, amung-amung lemulun ini mepad, idi amung-amungdeh mepad buri' teh! Idi ini luk pun-pun inau'deh; idi nekini na luk mebpeng nedeh na nganau' anun-anun luk piandeh. 7Do' Tau temurun idi ngeraruh buri'deh déi', pad seburur pana' na kali' bala lun denganneh.” 8Idi Tuhan nematad nedeh rat déi' amé' aput-aput bang tana'. Idi ideh nugka' ratnan kekkamen mudut bawang ineh. 9Idi ngaceku ineh, ngadan bawang ineh titen Babil, ngaceku déi' Tuhan nengeraruh bala amung-amung lemulun bang tana'. Idi rat déi' Tuhan nematad nedeh bang aput-aput tana'.
Inul Sem
10Idi ini inul Sem. Kareb ulun Sem 100 lak, idi ieh nenginul Arpaksad, ieh ineh dueh lak pangeh ereb ineh. 11Muci ratnan ineh, Sem mulun 500 lak, idi nenginul tuda'-tuda' anak teh.
12Kareb ulun Arpaksad 35 lak, idi ieh nenginul Sila. 13Muci ratnan ineh Arpaksad mulun 403 lak, idi ieh nenginul tuda'-tuda' anak teh.
14Kareb ulun Sila 30 lak, idi ieh nenginul Iber. 15Muci ratnan ineh Sila mulun 403 lak, idi ieh nenginul tuda'-tuda' anak teh.
16Kareb ulun Iber 34 lak, idi ieh nenginul Peleg. 17Muci ratnan ineh Iber mulun 430 lak, idi ieh nenginul tuda'-tuda' anak teh.
18Kareb ulun Peleg 30 lak, idi ieh nenginul Ru. 19Muci ratnan ineh Peleg mulun 209 lak, idi ieh nenginul tuda'-tuda' anak teh.
20Kareb ulun Ru 32 lak, idi ieh nenginul Serug. 21Muci ratnan ineh Ru mulun 207 lak, idi ieh nenginul tuda'-tuda' anak teh.
22Kareb ulun Serug 30 lak, idi ieh nenginul Nahor. 23Muci ratnan ineh Serug mulun 200 lak, idi ieh nenginul tuda'-tuda' anak teh.
24Kareb ulun Nahor 29 lak, idi ieh nenginul Tira. 25Muci ratnan ineh, Nahor mulun lak 119 lak, idi ieh nenginul tuda'-tuda' anak teh.
26Kareb ulun Tira 70 lak, idi ieh nenginul Abram, Nahor, idi Haran.
27Idi ini anak inul Tira. Tira nenginul Abram, Nahor, idi Haran. Idi Haran nenginul Lut. 28Haran ineh naté atun ratnan tamanneh Tira, bang bawang luk inanneh tinganak, ieh ineh Ur Kasdim. 29Idi Abram dengan Nahor pana' nengaweh. Idi ngadan awan Abram ineh Sarai. Idi ngadan awan Nahor ineh Milka, ieh ineh anak Haran luk taman Iska pana' 30Idi Sarai ineh na anak.
31Idi Tira ineh nenguit anakneh Abram, idi mupunneh Lut, luk anak Haran, idi ibanneh Sarai, ieh ineh awan Abram ineh, idi ideh nepura' rat Ur Kasdim iné' bawang Kanaan. Idi ideh nacing dei' Haran, idi tudo déi'. 32Idi ulun Tira 205 lak, idi ieh naté déi' bawang Haran ineh.
Currently Selected:
PUDUT 11: BLD
Highlight
Share
Copy
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.