YEHISKIEL 19
19
Nani Luk Inan Dat Niat
1Allah nengecuk negku menani aceh nani luk inan dat niat kuan dueh raca' Israil.
2Tinanmu ineh balang.
Ieh nengasa' anakneh arang anak balang deléi.
3Ieh nengasa' sebuleng anakneh, idi nemada' neneh nakap akan,
pad ieh nakap lemulun kenenneh.
4Amung pupu neninger balaneh,
idi nengabang neneh bang lubang.
Ideh nenganau' neneh bang belalung,
idi nenguit neneh amé' Masir.
5Tineh ineh na inan rapet teh.
Idi ieh nengasa' sebuleng anakneh teh,
pad ieh mangun ku balang luk mesangit.
6Kareb ieh rayeh ieh nemaya' balang baken amé' nakap akan.
Ieh nesibada' nakap akan, pad ieh kuman lemulun.
7Ieh nengusag tuda'-tuda' bawang luk
linibung idi bawang rayeh pana'.
Lemulun bang bawang ineh pelaba tot
kareb ieh ngeku.
8Amung pupu nepamung pian munu' neneh;
lemulun nacing rat iapeh-iapeh.
Ideh nemalad rabatdeh,
idi nengakem neneh ku abpungdeh.
9Ideh nenganau' neneh bang belalung,
idi nenguit neneh kuan Raca' Babil.
Ideh nematar neneh,
pad na lun ninger neneh ngeku teh,
luun amung surud déi' bawang Israil.
10Tinanmu mepad kudeng anggur,
luk tinibu tangeb arur.
Ngaceku petap abpa',
idi mula' don idi bua'neh.
11Angat-angat anggur ineh metueh,
pad ideh mangun ku rukud raca'.
Idi lawa anggur netemubu' macing nan laput,
Amung lemulun kali' neneh mula' don idi medita'.
12Iamo' ieh binubput ku gateh
idi talan luun tana'.
Bui rat pa busat aco nengekering bua'neh.
Angatneh pana' tinutu'
pad ideh tekering idi sabpen.
13Nekini ieh pangeh tinibu déi' su luk ali-ali
ieh ineh luun tana' luk tekering idi luk na abpa'.
14Lawaneh nekaneh ku apui
pad angatneh idi bua'neh pana' neseb.
Idi angatneh pana' na metueh teh
pad na mangun ku rukud raca'.
Ini aceh nani luk inan dat niat luk megéi' uen menani.
Currently Selected:
YEHISKIEL 19: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
