YEHISKIEL 18
18
Lemulun Luk Nganau' Sala' Ineh Miak Maté'
1Kebala Tuhan negku, 2#Yer 31.29 “Anunké balé' luk megéi' beléndeh déi' bawang Israil?
‘Amung-amung taman pangeh nekuman bua' anggur luk malam,
idi lipen anak-anakdeh melaya' peh.’ ”
3Kebala Tuhan, “ui ini Allah luk mulun. Idi aleg muyuh mada' balé' ini teh déi' bawang Israil. 4Ulun taman-tinan idi ulun anak pana' Ui kuan. Lemulun luk nganau' sala' ineh miak maté.
5“Ngerawé ratnan lemulun luk do', idi matu idi mesiri. 6Ieh na sembayang inan akang lun Israil idi na ieh kuman luk biré luun bubpun luk bibpeng. Na ieh pasét nan decur dulun, idi na ieh pamung rudap dengan awanneh kareb ieh macing bulan. 7Na ieh naluk nelun baken, idi na ieh mano teh. Ieh nguli' luk biré lun luk ngiceh ku dudukneh. Ieh maman lemulun luk melau idi ngayung lemulun luk lubpa. 8Ieh na maré usin kebiten lun pad ieh ngalap utung. Ieh ara' nganau' luk dat idi megéi' mutut ukum luk mesiri. 9#Uk 18.5 Ieh maya' amung ukumKu idi ngimet amung bada'Ku. Kali' rungen ieh miak mulun ngaceku ieh matu.” Kudeng ini bala Tuhan Allah.
10“Iamo' ngerawé ratnan anakneh, Ieh mano idi ngaté lemulun, idi nganau' 11luk na tu-tu inau' tamanneh. Ieh kuman luk biré luun bubpun luk bibpeng, idi ieh pasét nan decur dulun. 12Ieh naluk nelun masi' idi mano. Ieh ngimet luk biré lun luk ngiceh ku dudukneh. Ieh sembayang inan akang idi nganau' luk dat. 13Ieh maré usin kebiten lun, pad ieh ngalap utung. Miakké ieh mulun? Na tu-tu! Ieh pangeh nenganau' amung kekamen luk dat ini, idi ieh miak maté ngaceku ineh. Ieh maté ngaceku sala'neh sebuleng.
14“Idi ngerawé ratnan anak lemulun ini teh. Ieh nier amung-amung sala' luk inau' tamanneh, iamo' na ieh maya' lawéneh. 15Na ieh sembayang inan akang lun Israil idi na ieh kuman luk biré luun bubpun luk bibpeng ineh. Na ieh pasét nan decur dulun. 16Na ieh ngedereh nelun, idi na ieh mano teh. Ieh nguli' luk biré lun luk ngiceh ku duduk. Ieh maman lemulun luk melau idi ngayung lemulun luk lubpa. 17Ieh ara' nganau' luk dat. Idi na ieh maré usin kebiten lun pad ieh ngalap utung. Ieh maya' amung ukumKu idi ngimet amung bada'Ku. Ieh na maté ngaceku sala' tamanneh. Kali' rungen ieh miak mulun. 18Tamanneh nenaluk nelun idi nemano teh, idi megéi' ngedat nelun baken. Idi ieh naté ngaceku sala'neh.
19“Iamo' kebalamu, ‘Ngudehké anakneh na kumin ngaceku sala' tamanneh?’ Ngaceku anakneh megéi' nganau' luk matu idi luk do'. Ieh nengimet ukumKu idi nemaya' amung-amung bada'Ku. Idi kali' rungen ieh miak mulun. 20#Bad 24.16 Lemulun luk nganau' sala' ineh miak maté. Anak na miak kumin ngaceku sala' tamanneh. Idi taman na miak kumin ngaceku sala' anakneh. Lemulun luk do' miak uen ngeperuan ngaceku kekamenneh luk do'. Idi lemulun luk dat miak kumin ngaceku kekamenneh luk dat.
21“Kudeng lemulun luk dat ugka' nganau' sala', pad ieh ngimet ukumKu kudeng ieh nganau' lu matu idi do', na ieh maté; kali' rungen ieh mulun. 22Ieh miak ngalap do' ratnan amung-amung sala'neh, pad ieh mulun, ngaceku ieh nenganau' luk matu.” 23Kebala Tuhan Allah, “Miakké Ui mawang niat ku até lemulun luk dat? Na tu! Ui meluun pian neneh uren idi mulun.
24“Iamo' kudeng lemulun luk matu ugka' nganau' luk do' idi ngimun nganau' kekamen luk dat mepad kudeng lemulun luk dat, miakké ieh mulun? Na tu! Kekamenneh luk do' pana' na miak uen ngerawé. Ieh miak maté ngaceku na lutep idi ngaceku sala'neh.
25“Iamo' kebala muyuh, ‘Luk ruen Tuhan ineh na matu.’ Ninger balaKu, O muyuh lun Israil. Kian, muyuh ngerawé ukumKu na matu. Setuneh kekamen muyuh luk na matu. 26Kudeng lemulun luk matu ugka' nganau' luk do', pad ieh maté, setuneh ieh maté ngaceku kekamenneh luk dat. 27Kudeng lemulun luk dat ugka' nganau' sala', idi ngimun nganau' luk matu idi do', ieh ngulun bururneh sebuleng. 28Ieh kali' sala'neh idi ugka' nganau' luk dat, pad ieh na maté. Ieh miak mulun. 29Idi kebala muyuh lun Israil, ‘Luk ruen Tuhan ineh na matu.’ Muyuh ngerawé ukumKu na matu. Setuneh kekamen muyuh luk na matu.
30“Ui ini, Tuhan Allah, ngukum nemuyuh lun Israil maya' kekamen muyuh. Do' teketed ratnan kekamen muyuh luk dat, idi aleg nima' sala' muyuh ngaté nemuyuh. 31Do' muyuh ugka' ratnan kekamen muyuh luk dat, idi do' ngalap terawé idi niat luk mebaruh. Ngudehké muyuh lun Israil pian maté?” 32Kebala Tuhan Allah, “Na Ui mawang niat ku até lemulun. Do' ugka' nganau' sala' idi mulun.”
Currently Selected:
YEHISKIEL 18: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
