YEHISKIEL 16
16
Yerusalim Na Lutep Maya' Tuhan
1Kebala Tuhan negku, 2“O lemulun, mada' Yerusalim ratnan kekamendeh luk pelaba dat. 3Mada' Yerusalim ratnan bala Tuhan Allah nedeh:
“Iko tinganak déi' bawang Kanaan. Tamanmu ineh lun Amori, idi tinanmu lun Hiti. 4Kareb iko tinganak, abet puedmu na binulu', na iko diniu', na iko piniid ku tucu' idi na iko libin ku kibung. 5Na lun méi' namu pad ideh nganau' luk kudeng ineh. Kareb iko tinganak na lun méi' namu, idi ideh nenala' namu luun natad.
6“Kareb Ui nelemaba, Ui nekali' namu sigio bang dara'mu sebuleng. Iamo' sagan tu pana' iko medara', Ui mebpeng namu na maté. 7Ui nenganau' namu temubu' mepad kudeng aceh tibu luk do' ulun. Iko iuk-iuk metueh idi medita', pad iko mangun ku anak adi' decur. Iti'mu petap rayeh, idi abpukmu mekadang, iamo' iko lubpa.
8“Kareb Ui nelemaba namu sekua'teh, idi Ui nekali' iko temina' inan mawa. Ui nemapen bururmu luk lubpa ku kuyu'Ku, idi nepejani' mawa namu. Matu, Ui nepejani' namu, idi iko mangun ku pupuKu.” Kudeng ini bala Tuhan Allah.
9“Ui nengalap abpa', idi Ui nemaru' dara' rat luunmu. Ui nengumau luunmu ku umau saitun. 10Ui nengayung namu ku kuyu' luk tibaruh idi nemaré namu kasut luk ratnan kubil pung luk meluun do', idi pata ratnan kibung pu, idi kuyu' ratnan kibung luk mesalud. 11Ui nemarénamu leku' idi bané. 12Ui nemaré namu susing icung, abé, idi pata luk metaga luun uluhmu. 13Iko inayung ku amas idi pirak, idi kuyu'mu ratnan kibung pu luk tibaruh idi teh kibung luk mesalud. Iko nekuman ruti luk inau' ratnan banak luk meluun do' idi diru' idi umau saitun pana'. Iko pelaba do' taga idi teh iko mangun ku raca' decur. 14Iko mebala ku tagamu aput-aput tana'. Iko pelaba do' taga, ngaceku Ui ini luk nemudut namu.” Kudeng ini bala Tuhan Allah.
15“Iamo' iko merapet inan tagamu idi inan ngadanmu, pad iko pamung dengan idé-idé luk lemaba. 16Iko nengayung su luk inanmu sembayang ku kibungmu luk do' taga, idi su ineh iko mangun ku decur luk mesawa'. 17Iko nengalap amas idi pirak luk biréKu namu ku mudut akang deléi luk inanmu pasét. 18Iko nengalap kibung luk tibaruh luk biréKu namu ku ngayung akang ineh. Idi iko nemaré kuan akang-akang ineh umau saitun, idi umau luk do' buen luk biréKu namu. 19Ui nemaré akan namu, ieh ineh banak luk meluun do', umau saitun, idi duru', iamo' iko nemaré amung ineh ku baré, pad ngeruid niat amung akangmu ineh.” Kudeng ini bala Tuhan Allah.
20“Iko nengalap anakmu luk deléi idi decur luk tinganakmu kuanKu, idi nemaré nedeh ku baré kuan akang ineh. Naké sétmu petap dat teh? 21Iamo' iko ngeluun sala'mu, pad iko nemaré anak-anakKu ku baré kuan akangmu. 22Kareb iko bang ulunmu luk dat idi luk melutak, na tu iko nengerawé ulunmu kareb iko isuut, ieh ineh kareb iko lubpa idi sigio bang dara'mu sebuleng.”
Ulun Yerusalim Kareb Ieh Decur Mesawa'
23Kebala Tuhan Allah, “Mesusa' kuanmu! Mesusa' kuanmu! Kareb iko pangeh nenganau' amung kekamen luk dat ineh, 24iko nemudut su luk inanmu sembayang inan akang iring anid dalan pad iko pasét inan akang ineh. 25Iko nengedat tagamu. Iko nemaré bururmu kuan idé-idé luk lemaba idi sétmu iuk-iuk amé' mula'. 26Iko nenima' lun Masri, ieh ineh lun denganmu luk mepanu' ku lili, pasét namu, pad iko ngegio usehKu ku sétmu.
27“Nekini Ui natang ticu'Ku pian ngukum namu, idi nala' peruan luk biréKu namu. Ui pangeh nemaré namu kuan lun Pilistin luk megateh namu, ngaceku kekamenmu luk dat idi melutak.
28“Ngaceku lilimu na ugka' ku lun baken, iko nengerada' nelun Asur. Iko mangun ku decurdeh luk mesawa', iamo' lilimu na ugka' ku ineh teh. 29Iko mangun ku decur luk mesawa' kuan lun Babil, ieh ineh pupu luk pepua' ineh, iamo' nateh lilimu ugka' ku ineh.”
30Kudeng ini bala Tuhan Allah, “Iko nenganau' amung ineh mepad kudeng seburur decur luk mesawa' luk na migu'. 31Iko nemudut su luk inanmu sembayang inan akang iring anid dalan, pad iko pasét nedeh. Iamo' na iko mepad kudeng decur luk mesawa' luk nakap usin mo'. 32Iamo' iko mepad kudeng decur luk pasét nelun baken idi na mawa inan awanneh sebuleng. 33Decur luk mesawa' ngalap tabpar, iamo' iko nemaré baré kuan lemulun luk inanmu mawa, idi nemaré suap, pad ideh macing rat iapeh-iapeh-iapeh idi pasét namu. 34Iko decur luk mesawa' luk mebaken tu-tu. Na lun baken nengecuk namu pasét. Na iko nengalap tabpar. Iko nemaré tabpar nedeh! Matu, iko mebaken tu-tu.”
Ukum Allah Kuan Yerusalim
35O decur luk mesawa', ninger bala Tuhan.
36Kudeng ini bala Tuhan Allah: “Iko nengelebpa bururmu idi pasét nan lemulun luk inanmu mawa idi nan amung akangmu luk pelaba dat. Idi iko nengaté anak-anakmu ku baré kuan akangmu ineh. 37Ngaceku ineh Ui miak ngamung amung lemulun luk inanmu pasét ineh, do' luk inanmu mawa idi luk inanmu megateh pana'. Ui miak naped nedeh libut-libutmu, idi Ui ngelebpa bururmu, pad ideh kali' namu lubpa. 38Ui miak ngukum namu ngaceku pasét idi ngaté lemulun. Denga usehKu Ui ngukum namu macing maté. 39Ui maré namu bang paladdeh, idi ideh miak ngusag su luk inanmu pasét idi sembayang inan akang. Ideh miak ngalap ayungmu idi banému, pad iko lubpa.
40“Ideh miak ngegio useh lun mula', pad ideh mitung namu ku batu idi natek namu ku pelapetdeh. 41Ideh miak ngeseb amung ruma'mu, pad mula' decur nier ukumKu namu ineh. Ui ngagka' namu pad iko na pasét, idi pad iko na maré baré kuan lemulun luk inanmu mawa. 42Idi usehKu miak ugka' pad Ui mulai niat. Idi na Ui museh idi temaruh teh. 43Iko nekelupan do'Ku namu kareb iko isuut, idi iko nengegio usehKu ku amung kekamenmu luk dat. Ngaceku ineh Ui ngua' kekamenmu ineh. Ngudehké iko nengeluun sala'mu ku sét?” Tuhan Allah pangeh nepebala.
Anak Decur Mepad Kudeng Tinanneh
44Kebala Tuhan, “O Yerusalim, lemulun baken miak nganau' balé' ini ratnan namu: Anak decur mepad kudeng tinanneh. 45Matu, iko anak decur tinanmu. Ieh megateh inan awanneh idi anak-anakneh. Iko mepad kudeng kinanakmu luk decur luk megateh inan awandeh idi anak-anakdeh. Tinan muyuh ineh lun Hiti idi taman muyuh lun Amori.
46“Kinanakmu decur luk rayeh ineh Samaria luk pa tinueh busat aco dengan amung bawangneh. Kinanakmu decur luk isuut ineh Sodom luk pa kabing busat aco dengan amung bawangneh. 47Lilimu na ugka' kareb iko nemaya' lawédeh idi kekamendeh luk dat ineh. Idi iuk-iuk iko nenganau' kekamen luk meluun dat rat nedeh.
48“Ui ini Tuhan Allah luk mulun pebala: Kinanakmu Sodom dengan amung bawangneh na nenganau' luk dat mepad kudeng iko idi amung bawangmu. 49Sodom dengan anak-anakneh luk decur medita' niat ngaceku akandeh petap idi ideh do' udeng teh, iamo' na ideh méi' nelun masi' idi lun luk medereh pana'. 50Ideh medita' niat idi metueh niat idi nenganau' luk inanKu megateh pad Ui nengaté nedeh pa kiungmu.
51“Samaria na mula' sala' mepad kudeng iko. Iko nenganau' kekamen luk meluun dat ratnan kekamenneh ineh. Ayu sala' kinanak-kinanakmu isuut kudeng uen maad dengan kekamenmu. 52Na miak na iko migu' ngaceku sala' kinanak-kinanakmu isuut ratnan sala'mu. Do' iko migu' ngaceku kinanak-kinanakmu matu kudeng uen maad denganmu.”
Sodom Idi Samaria Uen Ngeperuan Baruh
53Kebala Tuhan ni Yerusalim, “Ui pian ngeperuan Sodom idi Samaria dengan amung bawangdeh baruh teh. Idi Ui ngeperuan Yerusalim teh. 54Kali' rungen iko migu', idi igu'mu ineh miak ngegala' peruan kinanak-kinanakmu. 55Ideh miak ngalap peruan teh, idi iko idi amung bawangmu miak uen nuneb. 56Naké' iko nesitunga ni Sodom kareb iko medita' niat, 57kareb nateh kekamenmu luk dat pangeh megala'? Nekini iko mepad kudeng Sodom. Lun Edom, lun Pilistin, idi lun denganmu luk megateh namu situnga namu. 58Na miak na iko mekaneh dereh, ngaceku kekamenmu luk dat idi melutak.” Tuhan pangeh nepebala.
Aceh Pejani' Luk Meruked
59Kebala Tuhan Allah, “Ui miak maré ukum luk petulu namu, ngaceku iko na nemaya' jani'mu, idi teh iko nengelaba bala. 60Iamo' Ui miak maya' jani'Ku namu kareb iko isuut. Idi Ui miak nganau' aceh jani' luk meruked kuanmu. 61Iko miak ngerawé kekamenmu pad iko migu' kareb kinanak decurmu luk rayeh idi luk isuut muli' amé' namu. Ui nima' nedeh mangun mepad kudeng anak decurmu, sagan pana' Ui na nepejani' nganau' kudeng ineh. 62Ui miak pejani' baruh pad iko kali' Ui ini Tuhan. 63Kareb Ui maré do' ratnan amung sala'mu, iko miak ngerawé sala'mu ineh pad iko ungeng ku igu'mu.” Tuhan Allah pangeh nepebala.
Currently Selected:
YEHISKIEL 16: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
