YEHISKIEL 15
15
Aceh Pinginud Ratnan Uar
1Kebala Tuhan negku, 2“O lemulun, kudeng apehké uar uen maad ku lawa kayuh? Anunké ulek aceh angat anggur kudeng ieh uen maad ku kayuh luk bang pulung? 3Miakké iko mudut anun-anun ku ineh? Miakké iko nganau' ineh ku aceh luk inan ngacang? 4Na ulekneh! Angat ineh miak sabpen mo'. Kareb pekop papedneh neseb, idi unedneh mitem, miakké iko mudut anun-anun ku ineh? 5Kareb nateh angat ineh iseb na ulekneh. Idi kareb ieh neseb, ieh meluun dat.”
6Kudeng ini bala Tuhan Allah: “Mepad kudeng aceh uar lapen rat bang pulung idi sabpen, kudeng ineh teh Ui miak ngalap lemulun luk tudo déi' Yerusalim, 7pad Ui ngukum nedeh. Ideh nepuit ratnan apui, iamo' nekini, apui miak ngeseb nedeh amung. Kareb Ui ngukum nedeh, idi iko miak kali' Negku, Ui ini Tuhan. 8Ngaceku ideh na lutep maya' Negku, Ui miak ngisu' bawangdeh mangun ku su luk ali-ali.” Tuhan Allah pangeh nepebala.
Currently Selected:
YEHISKIEL 15: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
