YEHISKIEL 13
13
Ukum Nabi Luk Mebalih
1Kebala Tuhan negku, 2“O lemulun, mada' ukum nabi lun Israil. Ngecuk lemulun luk mada' maya' terawédeh sebuleng, kebalamu, ‘Do' ninger bala Tuhan.’ ”
3Kudeng ini bala Tuhan Allah: “Nabi ini luk mebacé miak kumin! Ideh mada' ratnan terawédeh sebuleng idi siayu mada' ratnan luk sinierdeh. 4O lun Israil, nabi muyuh mepad kudeng bungalé luk tudo arang ruma'-ruma' luk inusag. 5Ideh na matar libung bawang déi' su luk na meraben, idi na ideh mudut libung baruh, pad Israil na miak uen ngedengan kareb bunu' macing kareb aco Tuhan. 6Luk sinierdeh na matu, idi luk bida'deh mebalih. Kebaladeh, ‘Ini bala Tuhan,’ iamo' na Ui nengecuk nedeh. Idi ideh merapet ku baladeh miak mangun. 7Kudeng ini balaKu, ‘Luk sinier muyuh na matu, idi luk bida' muyuh ratnan luk miak mangun ineh mebalih. Muyuh pebala, ieh ineh balaKu, iamo' na Ui nepebala nemuyuh.’ ”
8Idi kebala Tuhan Allah nedeh, “Bala muyuh ineh na matu, idi teh luk sinier, muyuh ineh mebalih. Ui mangun ku bunu' muyuh. 9Ui temina' ngukum nemuyuh lun nabi luk siayu ratnan luk sinier idi luk mebalih ratnan luk miak mangun muci. Kareb pupuKu mepamung, muyuh na idi arangdeh; ngadan muyuh na miak uen ngayud dengan ngadan lun Israil luk baken. Na tu-tu muyuh miak muli' ame' bawang muyuh, pad muyuh miak kali' Ui ini Tuhan.
10 #
Yer 6.14; 8.11 “Nabi-nabi ngeraruh pupuKu, kebaladeh, ‘Do', do',’ iamo' na ieh do'! PupuKu pangeh nenganau' libung ratnan batu luk inau' mo'-mo', idi nabi-nabi nengamut neneh ku tana' salit! 11Mada' nedeh, kebalamu, ‘Libung ini miak metabpa.’ Ui maré udan luk mula', pad ieh meketukan ku udan batu, idi bui luk metueh miak malid neneh. 12Libung ineh miak metabpa idi amung lemulun ngitun namu, ‘Anunké ulekneh tana' salit ineh?’ ”
13Kudeng ini bala Tuhan Allah, “Dengan usehKu Ui miak maré aceh bui luk metueh, udan luk mula', idi udan batu pad libung ineh mekusag. 14Ui pian ngusag libung luk imutdeh ineh, idi ngareg neneh, pad batu luk ku alen ineh melagan. Muyuh miak maté meritep ku tabpaneh ineh, pad amung lemulun miak kali' Ui ini Tuhan.
15“Libung ineh idi lemulun luk nengamut ineh ku tana' salit miak lai' usehKu luk metueh. Idi Ui miak pebala nemuyuh, Libung ineh na idi, idi teh lemulun luk nengamut neneh pana' na idi, 16ieh ineh nabi-nabi luk nemada' ni Yerusalim, kebaladeh, ‘Do', do',’ iamo' na ieh do'.” Tuhan Allah pangeh nepebala.
Ukum Nabi Decur Luk Mebalih
17Kebala Tuhan, “O lemulun, ngerawé decur arang pupumu luk mebalih ratna luk miak mangun. Mebpeng nedeh na mada', 18idi mada' nedeh ratnan luk belén Tuhan Allah nedeh.
“Muyuh decur miak kumin. Muyuh nerut gimet idi ngabet ineh luun ticu' muyuh, idi muyuh nganau' ucung ku gimet luun uluh muyuh, pad muyuh melalud ngedat nelun baken. Muyuh pian ku lalud ngulun idi ngaté pupuKu, pad muyuh ngalap utung. 19Muyuh ngedat Negku pa kiung pupuKu, pad muyuh ngalap sesuut ikun idi tuda'-tuda' balad ruti. Muyuh pian ngaté lemulun luk na petulu pitayen, idi ngulun lemulun luk na petulu uen ngulun, pad muyuh mebalih kuan pupuKu, idi ideh manu nemuyuh.”
20Kudeng ini bala Tuhan Allah: “Ui miak neka gimet luk luun ticu' muyuh luk ku ngaté idi ngulun. Ui nala' ineh pad pupu luk inimet muyuh miak mepuit. 21Ui miak nala' ucung muyuh pad pupuKu mepuit macing ruked-ruked, pad muyuh kali' Ui ini Tuhan.
22“Muyuh sikal metueh rat Negku. Muyuh ngesabeng lemulun luk matu ku balih muyuh, idi muyuh na nima' lemulun luk dat teketed ratnan sala'deh, pad ideh ngalap ulun. 23Idi nekini, luk sinier muyuh luk na matu, idi balih muyuh ratnan luk miak mangun, pangeh nabud. Ui muit pupuKu rat bang palad muyuh, pad muyuh kali' Ui ini Tuhan.”
Currently Selected:
YEHISKIEL 13: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
