YEHISKIEL 12
12
Nabi Mangun Ku Lun Luk Neburo
1Kebala Tuhan negku, 2#Yes 6.9–10; Yer 5.21; Mrk 8.18 “O lemulun, iko tudo arang lemulun luk sikal metueh. Ideh inan mateh, iamo' na ideh nier. Ideh inan lalid, iamo' na ideh ninger, ngaceku ideh sikal metueh.
3“O lemulun, do' iko nipa mepad kudeng lemulun luk buro, idi nalan kareb aco macang. Nima' nelun baken nier namu nalan amé' su luk ulekmu. Kian, lun luk sikal metueh ineh miak kali' lek. 4Do' iko nipa kareb acang aco, idi nalan buro pa malem su siren matehdeh. 5Kareb ideh nier namu, do' nganau' aceh song bang alad ruma'mu, idi nguit babehmu maya' ineh. 6Nima' nedeh nier namu ngiding babehmu idi nalan kareb medacem dengan mapen kiungmu, pad iko na miak nier su ulekmu. Luk ruenmu ineh miak mangun ku bada' kuan lun Israil.”
7Ui nenganau' luk icuk Tuhan negku. Aco sineh ui nenipa mepad kudeng lemulun luk buro, idi kareb aco macep idi ui nenganau' aceh song bang alad ruma'ku. Ui nemabeh babehku kareb ideh nier negku.
8Idi kenebpa Tuhan nepebala negku. 9KebalaNeh, “O lemulun, nekini lun Israil ineh luk sikal metueh ngitun namu ratnan luk ruenmu. 10Do' mada' nedeh, kebalamu, ‘Kudeng ini bala Tuhan Allah: Bada' ini kuan raca' luk ngimet déi' Yerusalim idi kuan amung lun luk bang bawang ineh.’ 11Maré kali' nedeh, luk inau'mu ineh, ieh ineh aceh tanu' ratnan luk miak mangun kuandeh — ideh miak mangun ku lemulun luk buro idi tebanen. 12Raca' luk ngimet nedeh miak mabeh babehneh kareb medacem idi buro maya' song luk ruendeh bang alad ineh. Ieh miak mapen matehneh, pad na kali' su ulekneh. 13#2 Rac 25.7; Yer 52.11 Idi Ui miak malad rabatKu idi ngakem neneh. Idi Ui miak nguit neneh amé' bawang Babil, idi ieh maté su ineh dengan na kali' bawang ineh! 14Ui miak ngatad amung lun rayehneh, lun luk mada' neneh, idi lun luk matar neneh amé' iapeh-iapeh, pad lemulun nakap idi ngaté nedeh.
15“Kareb Ui ngatad nedeh arang pupu baken bang bawang luk mado, idi ideh miak kali' Ui ini Tuhan. 16Ui miak muit sebuangdeh ratnan bunu', iru', idi ét, pad arang pupu baken ineh ideh ngiti kekamendeh luk inan megani' idi ngamo Negku, Ui ini Tuhan.”
Tanu' Nabi Luk Megegker
17Kebala Tuhan negku, 18“O lemulun, do' iko megegker kareb iko kuman, idi megegker ku tot kareb iko ngirup. 19Mada' amung pupu ineh: Kudeng ini bala Tuhan Allah kuan lun Yerusalim luk ketecan bang bawang deh. Ideh miak megegker kareb ideh kuman, idi megegker ku tot kareb ideh ngirup. Bawangdeh miak uen ngaro, ngaceku amung-amungdeh luk tudo su ineh na maya' ukum. 20Bawang luk mepanu' ku lemulun nekini miak uen ngusag, idi tana'deh ineh mangun ku su luk ali-ali. Idi ideh miak kali' Ui ini Tuhan.”
Balé' Luk Megéi' Teruayen Idi Bala Luk Ngesusa' Niat
21Kebala Tuhan negku, 22“O lemulun, ngudehké lemulun megéi' ngerawé balé' mini, ‘Karebneh nepelaba idi luk bida' na mangun?’ 23Do' mada' nedeh, kebalamu: Kudeng ini bala Tuhan Allah, Ui miak ngagka' balé' ineh, pad ieh na miak badén bang bawang Israil teh. Mada' nedeh, kebalamu, ‘Karebneh pangeh nacing, idi luk bida' miak mangun.’
24“Luk siren idi luk badén luk na matu na miak mangun arang lun Israil. 25Ui ini Tuhan miak pebala nedeh, idi luk belénKu miak mangun, idi na mio teh. O muyuh luk sikal metueh, luk bida'Ku miak mangun kareb muyuh mulun. Ui ini Tuhan Allah pangeh nepebala.
26Kebala Tuhan negku, 27“O lemulun, lun Israil ngerawé luk siniermu idi luk bida'mu ineh miak mangun muci aco. 28Do' mada' nedeh, kebalamu, ‘Kudeng ini bala Tuhan Allah: Na mio teh Ui miak nganau' luk pangeh bida'Ku. Ui ini Tuhan Allah pangeh nepebala.’ ”
Currently Selected:
YEHISKIEL 12: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
