KOLOSE 4

1 # Ep 6.9 O lun luk kuan demulun ineh, do' muyuh nganau' luk mesiri idi luk matu kuan demulun-demulun muyuh ngaceku kali' idi kuan muyuh pana' inan. Seburur luk kuan nemuyuh luk déi' surga.

Puar-Puar Bada'

2Do' muyuh lutep sembayang, idi matar bang amung ineh dengan maré ubur. 3Idi sembayang kuan kai teh, pad Tuhan miak ngukab aceh tanga' kuan kai mada' bala Tuhan, ieh ineh luk inalum ratnan Keristus. Ngaceku ineh punneh ui ini kiling teh. 4Mutuh kuanku pad ui miak ngegala' amung-amung ineh mepad kudeng luk petulu.

5 # Ep 5.16 Do' muyuh nalan dengan ileh pa kiung amung-amung lemulun luk na maya', idi makai anid-anid kareb. 6Do' bala muyuh megéi' do' pedingeren, idi do' muyuh kali' kudeng apeh maré or luk do' kuan anid-anid lemulun.

Tabi' Luk Kekiped

7 # Kek 20.4; 2 Tim 4.12 #Ep 6.21–22 Tikikus kinanak tau luk inan mawa ineh seburur demulun Tuhan luk lutep bang kekamenNeh, idi luk ngakem pad-pad denganku. Ieh miak maré kali' nemuyuh ratnan ui. 8Ineh punneh ui nengecuk neneh amé', nemuyuh, pad ieh ngawang niat muyuh dengan bala ratnan ulun amung kai. 9#Plim 10–12 Onesimus maya' neneh. Ieh ineh kinanak luk lutep idi luk ineh mawa, idi luk pamung sebawang dengan muyuh. Idi didueh ineh miak maré kali' nemuyuh ratnan amung-amung luk pangeh mangun tungé'.

10 # Kek 19.29; 27.2; Plim 24; Kek 12.12, 25; 13.13; 15.37–39 Tabi kuan muyuh rat ni Aristarkus, lun denganku luk pad-pad denganku bang tutup, idi rat ni Markus luk sepupu dengan Barnabas. (Idi rat neneh ineh muyuh pangeh nengalap ukum idi kudeng ieh macing nemuyuh do' ngalap neneh.) 11Idi Yosua luk titen Yustus ineh pana' maré tabi'. Idi amungdeh ineh luk ngimet adat sunat, idi ideh mo' luk ngakem pad-pad denganku bang Imet Allah, idi ideh teh luk pangeh mangun ku ubuk kuanku.

12 # Kol 1.7; Plim 23 Tabi' kuan muyuh rat ni Epapras luk pamung sebawang dengan muyuh, ieh ineh demulun Keristus Yésus. Ieh mekél sembayang kuan muyuh, pad muyuh lutep idi tuped meraben-bang Keristus dengan anu luk meriput, idi pad muyuk miak maya' amung-amung luk pian Allah. 13Ui maré kali' ratnan lemulun ineh. Ieh pelaba erur ngaceku muyuh, idi ngaceku amung-amung lun Laudikia idi lun Hirapolis. 14#2 Tim 4.10, 11; Plim 24 Tabi' kuan muyuh rat ni Lukas, lun ngubat luk inan mawa, idi tabi' rat ni Dimas pana'.

15Tabi' kuan amung-amung kinanak luk déi' Laudikia, idi kuan Nimpa, idi kuan sidang luk déi' ruma'neh. 16Kareb surat ini pangeh bica' muyuh, do' maca' ineh kuan sidang luk déi' Laudikia, idi muyuh maca' surat luk macing rat déi' Laudikia teh. 17#Plim 2

Idi maré kali' ni Arkipus, “Matar do'-do' ratnan kekamen luk pangeh ilapmu bang Tuhan pad miak ngeriput ineh.” 18Tabi' rat negku ini, Paulus. Ui ngayud surat ini ku ticu'ku sebuleng. Aleg kelupan negku luk kiling ini.

Idi do' katu Allah temurun idi ngedengan nemuyuh.

Currently Selected:

KOLOSE 4: BLD

Highlight

Copy

Compare