1 TESALONIKA 1

1 # Kek 17.1 Rat ni Paulus, Siluanus, idi Timotius — Kuan sidang lun Tesalonika luk mangun ku pupu Allah Taman, idi Tuhan Yésus Keristus:

Do' katu idi awang temurun kuan muyuh.

Ulun Idi Anu Lun Tesalonika

2Kai megéi' maré ubur kuan Allah ngaceku amung-amung muyuh, idi megéi' neten ngadan muyuh bang sembayang kai. 3Ngaceku kai ngerawé pa kiung Allah Taman tau ratnan kekamen muyuh luk dengan anu, idi kél muyuh luk dengan awa, idi letep niat muyuh luk merapet inan Tuhan tau Yésus Keristus. 4Kai kali' ratnan muyuh pangeh pinili', O kinanak-kinanakku luk inan Allah mawa. 5Ngaceku bada' kai ratnan Bala luk Do' pangeh icing kuan muyuh baken dengan bala mo', iamo' dengan lalud, idi Roh Meligan, idi dengan anu luk matu-matu. Muyuh kali' kudeng apeh ulun kai arang muyuh ngaceku muyuh. 6#Kek 17.5–9 Muyuh nenginud lawé kai idi lawé Tuhan teh; idi sagan pana' muyuh medereh, muyuh nengalap bala ineh dengan awang luk macing ratnan Roh Meligan. 7Pad muyuh mangun ku luk pinginud kuan amung-amung lemulun luk manu déi' Makedonia idi déi' Akaya teh. 8Ngaceku rat nemuyuh pangeh neremuat bala Tuhan, baken déi' Makedonia idi Akaya mo', iamo' bang anid-anid bawang, anu muyuh inan Allah pangeh nepiar, pad kai na miak mala anun-anun teh. 9Amung lemulun ineh mala ratnan kudeng apeh muyuh nenganak nekai kareb kai nengikak nemuyuh, idi kudeng apeh muyuh neteketed ratnan akang idi nelumi inan Allah, pelé muyuh miak mepicet inan Allah luk mulun idi luk matu ineh, 10idi nganét acing AnakNeh luk rat surga, luk pangeh tinui rat arang lun naté, ieh ineh Yésus luk nemuit netau ratnan useh luk miak macing teh.

Currently Selected:

1 TESALONIKA 1: BLD

Highlight

Copy

Compare