1 YAHYA 4
4
Ratnan Ngiti Roh Luk Matu
1O amung-amung luk inanku mawa, aleg muyuh manu ku bala anid-anid lemulun luk ngamo neneh pangeh nengalap Roh Allah, iamo' do' muyuh nutun nedeh, pad muyuh kali' kudeng roh luk ilapdeh ineh macing ratnan Allah. Ngaceku mula' nabi luk mebalih pangeh neremuat iné' iapeh-iapeh. 2Kudeng ini lawéneh muyuh miak ngiti Roh Allah: idé-idé luk ngamo Yésus Keristus nacing mepad kudeng lemulun, ieh ineh ratnan Allah; 3idi idé-idé luk na ngamo Yésus ineh, baken ieh nengalap roh luk ratnan Allah, iamo' roh ineh bunu' Keristus. Muyuh pangeh neninger ratnan acingneh, idi nekini ieh idi bang tana' ini.
4O anak-anakku, muyuh ini ratnan Allah. Muyuh pangeh nengelaya' nabi luk mebalih ineh ngaceku Roh luk bang nemuyuh meluun lalud ratnan Roh luk bang lemulun luk bang ulun tana ini. 5Ideh pebala ratnan tana' ini, idi tana' ini neninger baladeh, ngaceku ideh ratnan tana' ini. 6Iamo' tau ini ratnan Allah, idi lemulun luk miti Allah ieh luk ninger bala tau. Idi lemulun luk baken ratnan Allah na ieh ninger bala tau. Ratnan luk kudeng ineh tau miak ngiti Roh luk matu, idi roh luk ngeraruh ineh.
Allah Ineh Awa
7O amung-amung luk inanku mawa, do' tau mawa seburur kuan seburur; ngaceku awa ineh ratnan Allah. Idé-idé luk inan awa, ieh ineh tinganak ratnan Allah idi ngiti Allah. 8Lemulun na mawa ineh na ieh ngiti Allah ngaceku Allah ineh awa. 9Kudeng ini lawéneh Allah nengegala' awaNeh kuan tau: Ieh pangeh nengecuk AnakNeh luk sebuleng semuet bang tana' ini pad rat Neneh ineh tau miak ngalap ulun. 10Kudeng ini awa ineh: baken ngaceku tau mawa inan Allah, iamo' ngaceku Allah mawa netau, idi nengecuk AnakNeh mangun ku baré pedo' ratnan amung-amung sala' tau.
11O amung-amung luk inanku mawa kudeng Allah panegh mawa netau kudeng ineh, idi petulu tau ini pana' mawa seburur dengan seburur. 12#Yah 1.18 Seburur lemulun pana' nateh nenier Allah. Kudeng tau mawa seburur dengan seburur idi Allah mulun bang netau, idi awaNeh ineh riniput bang netau.
13Ratnan luk kudeng ini tau kali' tau mulun bang Allah idi Allah pana' mulun bang netau, ngaceku Ieh pangeh nemaré RohNeh kuan tau. 14Kai pangeh nenier, idi maré kali', ratnan Taman ineh pangeh nengecuk AnakNeh mangun ku Lun Nengulun tana' ini. 15Idé-idé luk ngamo idi Yésus ineh Anak Allah, idi Allah ineh mulun bang neneh idi ieh pana' mulun bang Allah. 16Tau ini pangeh nekali' idi manu ratnan awa Allah bang netau.
Allah ineh awa, idi lemulun luk mulun bang awa mulun bang Allah, idi Allah mulun bang neneh. 17Dengan luk kudeng ineh awa ineh uen ngeriput bang netau, pad tau mekuu' kareb Aco Ngukum, ngaceku mepad kudeng Keristus, kudeng ineh teh tau bang tana' ini. 18Bang awa na luk idi tot, iamo' awa luk meriput nala' amung-amung tot, ngaceku tot ineh ngacing ukum, idi lemulun luk matot nateh riniput bang awa.
19Tau mawa ngaceku Allah pun-pun mawa netau. 20Kudeng idé lemulun luk pebala, “Ui mawa inan Allah,” iamo' ieh megateh inan kinanakneh, idi lemulun ineh mebalih, ngaceku lemulun luk na mawa inan kinanakneh luk sirenneh, idi na ieh miak mawa inan Allah luk nateh sinierneh. 21Ukum ini pangeh biré Keristus kuan tau: lemulun luk mawa inan Allah, na miak na mawa inan kinanakneh teh.
Currently Selected:
1 YAHYA 4: BLD
Highlight
Copy
Compare
Share
Want to have your highlights saved across all your devices? Sign up or sign in
BALA LUK DO' Lun Bawang Bible © The Bible Society of Malaysia 1982, Second Edition 1998.
