लूका 6
6
ङेम्सिमुनेमकु ङाचो़ येशू
(मत्ती १२:१-८; मर्कूस २:२३-२८)
1कोलेम ङेम्सिमु नेम येशू जेप्सेर-येभाल लक्तोङा बेम्डिलो उनी सीसिपामिमका जेप्सेर प्रो़ड्मिडिमा ल्वाडा नात्तो पेम्डी।#व्य २३:२५ 2ओराम ल्वाम्डिमा फरिसीमिमगोडाम याङ-याङका येशूनुङ र्वाम्डी, “इकी डु़म्लाका ङेम्सिमुनेम मेबेनी र्वाक्ताम खारी गानी हेङा बोनी?”
3येशूका मेर्मिमलाई र्वाम्डी, “दाऊद नुङ उमा ङोप्सो़मिम क्रु़म सिम्डिम थारीका दाऊदका हाम बु़डु़, हाम गानी मेराम ल्वा डाट्निम मिबु?#१ शमू २१:१-६ 4गु माम्चु़नीकु सो़रलोले बेखोपगोनो हुङडामा माम्चु़नीकु नङ बेम्मा सो़बेम थास्तु़मा पु़रु़, मा उ ङोप्सो़मिमलाई वो ग्वाक्तु़मी। मेराम सो़बेम डु़म्लाचो़मिमका कोङङा पेसी नु़पा बाइडा।”#लेवी २४:९ 5येशूका आथावो मेर्मिमलाई र्वाम्डी, “ङेम्सिमुनेम वो साखाम थो़पा ङाचो़ मिनीचो़ सो़।”#६:५ मिनीचो़ र्वाक्मा: खोत्ले मु़चु़काम लागि सेल्पा दु़म्मु माम्चु़नीका गुमीलाई थुट्मिडिम बु र्वाक्पा रेम्बोमु येशूका उनी त्वापलाई ङा र्वाम्डिम नङ (दानिएल ७:१३-१४)।
येशूका ल्वा साट्पा मु़चु़लाई सबेट्मिडिम
(मत्ती १२:९-१४; मर्कूस ३:१-६)
6मेरामकु चङडाम ङेम्सिमु नेम येशू घ्रो़म्दीनेमगोनो हुम्डिमा सीट्मिडी। मेकोतिलो मेसिन्डा उ जो़प ल्वा साट्पा कोले मु़चु़ वो बाइडा। 7येशूका मेराम मु़चु़लाई सबेट्मिडी माला ङेम्सिमुनेम खारी बेसी मेनु़पाकु दुथाम उनी बुइडला उन्मु लागि यहूदीमिमकु डु़म्ला सीपा पातु़म्रीमिम नुङ फरिसीमिमका चो़पा बेम्थाम्डिम बाइडा। 8लावो गुमीका मेर्मिमकु न-गोडाम ल्वा थेसिथेट्मिडी, मा मे ल्वा साट्पा मु़चु़लाई र्वाम्डी, “बका, मा खोत्लेकु ङादोडा येम्सा।” मेकोतिमा मेराम बक्ता, मा येम्स्ता।
9मेकोतिमा येशूका मेर्मिमलाई र्वाम्डी, “गो गानीनुङ हिला बेउ, ङेम्सिमु नेम जो़पा बोमु डे मेजो़पा बोमु, सिमुलामका सेल्मु डे सेन्मु, हाम बोमु डु़म्लानुङ घ्रो़म?”
10गुमीका खोत्लेथो़ रेप्तो मेराम मु़चु़लाई र्वाम्डी, “इमा ल्वा हम्डा!” गुका उ ल्वा हम्डु़, मा मेरामकु ल्वा ङादोम होप्मामङा नु़ल्याड्डा। 11ओराम ल्वाम्डिमा यहूदीकु डु़म्ला सीपा पातु़म्रीमिम नुङ फरिसीमिमकाम छो़म उनी छोक्चो बक्ता, मा येशूलाई हे बिइ र्वाक्साका उनी त्वाप-त्वापडा र्वाबोमु चो़म्मिडी।
येशूका को-नले (१२) थु़र्मामिमलाई थुट्मिडिम
(मत्ती १०:१-४; मर्कूस ३:१३-१९)
12मेमबिलि येशू सो़म्दी बेप्डा पोप्चङथो़ लम्डी, मा नेमसोसोसम्म माम्चु़नीडा सो़म्दी बेम्डी। 13नेम सोङ्डाम चङडा गुमीका उनी सीसिपामिमलाई उनीमाडा येट्मिडिमा मेर्मिमगोडाम को-न (१२) सीसिपामिमलाई छेट्मिडी, मा गुमीका मेर्मिमलाई थु़र्मा र्वाक्पा नङ बाबेट्मिडी। मेर्मिम: 14सिमोन, येशूका मेरामकु नङ पत्रुस बाबेट्मिडी, सिमोनकु ल्वाक अन्द्रियास, याकूब, यूहन्ना, फिलिप नुङ बारथोलोमाइ, 15मत्ती, थोमा, अल्फयसकु तारापाचो़ याकूब नुङ सिमोन, मेरामलाई रोमीमिमकु कोर्थो़लाम बक्पा दलगोडाम र्वाम्थाल्मिडी। 16याकूबकु तारापाचो़ यहूदा, मा यहूदा इस्करियोत, मेरामका ङा चङडा येशूलाई भ्रेड्डु़म बाइडा।
येशूका जि नुङ वाइतो बेट्मिडिम
(मत्ती ४:२३-२५; ५:१-१२)
17येशू उनी थु़र्मामिमनुङ पोप्चङडलामका धाली धेब्दे बाययु़ योम्डी। मेसिन्डा बाङमिम सेर्पा उनी सीसिपामिम नुङ खोत्ले यहूदिया नुङ यरूशलेम शहरलामका, मा दिरिदिनकु सो़पडाम टुरोस नुङ सीदोन शहरलामका रोक्पा सेर्पा मु़चु़मिम बाम्डी। 18मेर्मिम येशूकु सिजेम थो़प्डा नुङ सोमोरीलाम समु लागि मेसिन्डा रोम्डिम बाइडा। मुनाङपेलका दु़खा ग्वाक्पा मु़चु़मिमलाम मुनाङपेल लुम्डिमा लम्डी। 19मे सेर्पा मु़चु़मिमका येशूलाई लु़म्मु माल्मिडी, हेङालोने खोत्लेलाई सबेट्पा यु़म गुमीलामका लुक्तोङा लेड्डु़। 20मेकोतिमा गुमीका उनी सीसिपामिमथो़ रेप्तो र्वाम्डी:
“इनी हाम वो मेबाट्पा मु़चु़नी गानी आलाकाम सो़,
हेङालोने माम्चु़नीकु किब्दी इनीमा ङा सो़।
21ओम्लो क्रु़मसिपा मु़चु़नी, गानी आलाकाम सो़,
हेङालोने गानी इनी गोतिम्सिनी।
ओम्लो ख्रापा मु़चु़नी, गानी आलाकाम सो़,
हेङालोने गानी रिमु ल्वानी।
22मिनीचो़डला थो़र लु़न्निमका मु़चु़मिमका मेद्वानिमी,
सामालामका ख्लुनिमी, मा रिन्सानिमी,
मेम्मा मेजो़पा मिम्मिमा गानीलाई डक्साका जेमी माला
गानी आलाकाम सो़।#१ पत्र ४:१४
23“मेकोतिलो इनी न भ्रसीबेट्नीमा गेर्सिद्वाक्तो छो़म्नी, हेङालोने पाह्रीला गानी डोक्पु पुरस्कार ल्वानी। मेर्मिमकु उनी ङाउ-खुउका माम्चु़नीलाम-जेपामिमलाई मेम ङा बेम्डिम बाइडा।#२ इति ३६:१६; थु़र्मा ७:५२
24लावो गानी खाप्चीचो़मिम ने हाउरेमा!
हेङालोने गानी इनी त्वाकु नसीहोम बोमु दु़म्निम बु।
25ओम्लो गानी खोहोम पोमु ल्वापामिमलाई हाउरेमा!
हेङालोने गानी दिफु क्रु़मसिपा दु़म्नी।
ओम्लो रिपामिम ने हाउरेमा!
दिफु गानी इनी नडा मेभ्रन्सिनिमा ख्राम्नी।
26इनीमा ने हेल्लो लोवो खोत्ले मु़चु़का नङ कोमी,
गानी ने हाउरेमा!
हेङालोने मेर्मिमकु ङाउ-खुउमिमका
माम्चु़नीलाम-जेपा लिसिक्पामिमलाई वो मेमङा बेम्थाल्मिडी।
स्वाक्चिमो मु़चु़लाई रिखाम बेनी
(मत्ती ५:३८-४८; ७:१२)
27“लावो गानी सिजेम थो़पा खोत्लेलाई र्वाङु, इनी स्वाक्चिमो मु़चु़लाई रिखाम बेनी, मा सु़का गानीलाई मेद्वानी मेर्मिमलाई जो़पा बेनी। 28सु़का गानीलाई वाइतो बेनी मेर्मिमलाई जि ग्वाक्निमी, सु़का गानीलाई मेजो़पा बोनी, मेर्मिमकाम लागि सो़म्दी बेनी। 29कोङनिमका गानीलाई कोलेलाममिम इनी फोसु़डा याल्नी माला कोङमी फोसु़ वो देन्साट्नी, मा इनी हुम-ये लमु माल्पामिमलाई माक्ते वो ग्वान्सोट्नी। 30गानीनुङ बिपा मु़चु़मिम खोत्लेलाई ग्वाक्नी, मा मु़चु़लाई ग्वाक्निम खाप्ची चङडा मेरनी। 31वाङमिम मु़चु़का इनीमा लागि हाम बोमिमिम गानी द्वानी, गानी वो मेर्मिमनुङ मेमङा बेनी।#मत्ती ७:१२
32“सु़का गानीलाई रिखाम बोमी मेर्मिमलाई कोङङा गानी रिखाम बोनिमी माला हाम मेम बोनिमिमका गानीलाई जो़पा दु़म मा? हेङालोने छु़लचो़मिमका वो उनी त्वापलाई रिखाम बेपालाई मेर्मिमका रिखाम बोमी। 33सु़का गानीलाई जो़पा बोनिमी मेर्मिमलाई कोङङा गानी वो जो़पा बोनी माला हाम मेम बोनिमिमका गानीलाई जो़पा दु़म मा? हेङालोने छु़लचो़मिमका वो मेमङा बोमी। 34सु़का गानीलाई चङडा खउलुङ ख्लोन्सानी मेर्मिमलाई कोङङा खउलुङ लोखा ग्वानी माला मेम बोनिमिमका गानीलाई जो़पा दु़म मा? हेङालोने चङडा मेकोतिङा ल्वापा नका छु़लचो़मिमका छु़लचो़मिमलाई खउलुङ लोखा ग्वामी। 35लोवो इनी स्वाक्चिमो मु़चु़मिमलाई रिखाम बेनी, मेर्मिमलाई जो़पा बेनी। चङडा मेर्मिमलाम मेख्लोक्पा नका मेर्मिमलाई लोखा ग्वाक्नी। मेम्मा गानी डोक्पु पुरस्कार ल्वानी, मा गानी खोत्लेडाम घ्ल्वापा माम्चु़नीकु चो़-चु़सु़ दु़म्नी, हेङालोने माम्चु़नीका आला-तोमा मान्थिम मु़चु़ नुङ मेजो़पा मु़चु़डला वो न-थो़म रेम्बोमी। 36इकीमा माम्चु़नी छो़म न-थो़मनुङमा बुमी, मा गानी वो मेप्माम न-थो़मनुङमा ङा दु़म्नी।
सु़काम वो निया मेबेनी
(मत्ती ७:१-५)
37“सु़काम वो निया मेबेनी, मा माम्चु़नीका इनीमा निया मेबोमी। सु़लाई वो मुमा मेबेट्नी, मा माम्चु़नीका गानीलाई मुमा मेबेनिमी। मु़चु़मिमलाई पाचो ग्वाक्निमी, मा माम्चु़नीका गानीलाई वो पाचो ग्वानिमी। 38मु़चु़मिमलाई ग्वाक्निमी, मा माम्चु़नीका गानीलाई वो ग्वानिमी। सोङसा-सोङसाका, हल्लेबेसा-बेसाका लहोम, सिड्डा रोगेमिमसम्म कोले थो़मसङका इनीमा फाजीडा हिसिमिमसम्म गानी ल्वानी। हेङालोने गानी वाङमिमलाई उहेम थो़मसङका ग्वानी, मेराम थो़मसङका ङा माम्चु़नीका गानीलाई ग्वानिमी।”
39गुमीका मेर्मिमलाई ओराम सीसि-सो़म्दी वो र्वाम्डी: “हाम उ मिक्सीका मेल्वापा मु़चु़का कोङमी मिक्सीका मेल्वापा मु़चु़लाई ङा क्रिमु चाप्सु़? हाम मेर्चिप निफिङा पोलु़मगोयु़ मेझार्ची मा? 40सीपा मु़चु़ हापा नेप्चीनुङमा दु़म, मे सीसिपा मु़चु़ मेप्माम मेदु़म, लावो खोत्ले ल्वा सीम्सिमु दु़म्सु़मिम चङडा गुलाई सीपा मु़चु़ होप्मामङा दु़म।#मत्ती १०:२४-२५; यूह १३:१६; १५:२०
41“गानी हेङा इनीमा वा-ल्वाककु मिक्सीडाम कति कल्पा सप्लेप्ता हुपा ल्वानी, इनीमा त्वाकु मिक्सीडा कार्तासिट्पा डोक्पु सङ ने हेङा मेल्वानी? 42गानी इनी त्वाकु मिक्सीडा कार्तासिट्पा डोक्पु सङ ने मेल्वानी माला हेसाका इनी त्वाकु वा-ल्वाकलाई, ‘ए छारी, इमा मिक्सीडाम कति कल्पा सप्लेप्ता गो थान्सानिनी’ र्वामु चाम्नी? गानी मु़चु़कु ङादोडा जो़पा लिसिक्पा मु़चु़नी, ङादो इनी मिक्सीडा कार्तासिट्पा डोक्पु सङ ख्लुक्निमा पार्नी, मेम्मा इनी वा-ल्वाककु मिक्सीडा बाट्पा कति कल्पा सप्लेप्ता जो़होमका ल्वानिमा पार्सामु चाम्नी।
धक्सा नुङ मेरामकु मा
(मत्ती ७:१६-२०; १२:३३-३५)
43“जो़पा धक्साडा मेजो़पा मा मेसिडु़, मा मेजो़पा धक्साडा जो़पा मा मेसिडु़। 44मेराम धक्साडा सिडु़मिम मालामका हेप्माम धक्सा रेछा र्वाक्साका छेडी। हेङालोने चु़कु धक्सालामका सु़का वो बैससीकु मा मेप्रो़सु़, मा चु़कु धक्सालाम अङ्गूरकु मा वो मेप्रो़सु़।#मत्ती १२:३३ 45जो़पा मु़चु़का उ न-गोडा जु़ल्थाडु़मिमलाम जो़पा ल्वा जे। मेजो़पा मु़चु़का उ न-गोडा जु़ल्थाडु़मिम मेजो़पा ल्वा जे। हेङालोने हेप्माम ल्वा उ न-गोडा कुर्थाडु़मिम बु, मेराम मु़चु़का मे ङा जे।#मत्ती १२:३४
नक खालकाम नेमकु सीसि-सो़म्दी
(मत्ती ७:२४-२७)
46“गो र्वाङुमिम होम्साका मेबोनी माला, गानी हेङा गोलाई ङाचो़, ङाचो़, र्वानी? 47उहेम मु़चु़ आमाडा रो, मा आमा सिजेम थो़सु़, मेम्मा मेराम होम्साका खारी बु़, मेराम आरेप्माम मु़चु़ सो़, 48उहेमका हापा धालीसम्म धायु़मा हेल्लो वो मेदोपा डोक्पु लुङ गड्डु़मा मेरामडला नेम बनेबु़डु़। मेराम नेमडला होङकोर्माका याक्तु़ लोवो मेराम नेम जो़होमका बनेबेम्मामिमका हेवो मेदु़म्सावा। 49लावो उहेमका आमा सिजेम थो़सु़मा वो मेराम होम्साका खारी मेबेपा मु़चु़ ने आरेप्माम सो़, उहेमका नेमकु फारगोयु़म डोक्पु लुङ मेगसाका क्वाडला नेम बनेबु़डु़। मेकोतिमा होङकोर्मा योक्तामा मेराम नेम याक्तु़। मेकोतिलो मेराम नेम झार्स्ल्याड्डा, मा खोत्लेङा स्याकारिस्ता।”
Currently Selected:
लूका 6: THUL
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
