लूका 5
5
येशूका येट्मिडिम ङादोम उनी सीसिपामिम
(मत्ती ४:१८-२२; मर्कूस १:१६-२०)
1 #
मत्ती १३:१-२; मर्क ३:९-१०; ४:१ कोलेम येशू गनेसरेत दिरिदिनकु सो़पडा येम्तासिट्मिडिम बाइडा। मेकोतिलो छो़म सेर्पा मु़चु़मिम माम्चु़नीकु सिजेम थो़मु लागि उनीमा होनोलाम आथो़लाम क्र्वाङ-क्र्वाङ उन्बेत्तो लेट्मिडिम बाइडा। 2गुमीका दिरिदिनकु फार्डा नले कुबी-बोक्सा ल्वाम्डी। लावो पालुङचो़मिम कुबी-बोक्सालामका पाखा लुम्डिमा उनी पालुङ सो़ल्त्तोङा लेट्मिडी। 3मे नले कुबी-बोक्साचिपडा कोले ने सिमोन पत्रुसकाम बाइडा। मेराम कुबी-बोक्साडा येशू हुम्डिमा दिरिदिनकु सो़पलामका किचो़ होनोक्थो़ गुलाई लबेट्मिडी। गुमी मे कुबी-बोक्साडला गन्मिडिमा सेर्पा मु़चु़मिमलाई सीमु चो़म्मिडी।
4गुमी जेमु दु़म्मिडिमा सिमोनलाई र्वाम्डी, “ङो चु़म्मु लागि घ्लु़म्पा कु बाट्पाथो़ कुबी-बोक्सा लडामा इ पालुङ ओप्साका ङो सेडा।”
5लावो सिमोनका र्वाक्ता, “ङाचो़, गुकु नेमसोसोसम्म छो़म छो़त्तोकोमा पालुङ ओप्तोको लोवो कोले वो ङो सेन्मु मेचाप्कुवा। मेम ङा लोवो गानी र्वानिमिम होम्साका गो पालुङ ओपु।”#यूह २१:३
6मेकोतिमा मेर्मिमका पालुङ ओप्मिडी मा छो़म ङो सेट्मिडी, मा मेर्मिमकु पालुङ र्वाप्डा आ़स्ता।#यूह २१:६ 7मेर्मिमका कोङमी कुबी-बोक्साडा बाट्पा उनी ङोप्सो़मिमलाई वो उनी ल्वाका येट्मिडिमा ख्लो़ला सो़सिम्डी, मा मेर्मिम बिम्डिमा ङो थाट्मिडिलो नले ङा कुबी-बोक्सा ङोका देम्स्तामका र्वाप्डा कुगोयु़ हुङडा।
8ओराम ल्वास्तु़मा सिमोन पत्रुसका येशूकु खेल चु़म्डु़मा र्वाक्ता, “ए ङाचो़, गो ने छु़लचो़ सो़। मेम्मिमका आमा फार्डा मेबानी।” 9मेर्मिमका छो़म ङो सेट्मिडिम ल्वाम्डिमा सिमोन पत्रुस नुङ उमा ङोप्सो़मिम छो़म ङाङाया दु़म्मिडी। 10मेम्साका ङा जब्दियाकु तारापाचो़ याकूब नुङ यूहन्ना वो ङाङाया दु़म्ची। मेर्चिप सिमोन पत्रुसनुङ कोयोङा ङो सेट्पा मु़चु़चिप बाच्ची।
येशूका सिमोनलाई र्वाम्डी, “मेङिसा, आथाडा आनो गाना ङो मेएँ मु़चु़मिमलाई आमाडा रेट्पा दु़म्ना।” 11मेकोतिमा मेर्मिमका उनी कुबी-बोक्सा दिरिदिनकु सो़पडा फिट्मिडी, मा मेर्मिमका खोत्ले ङेट्मिडिमा येशूनुङ लाम्दिम्डी।
येशूका जोन बेट्पा मु़चु़ सबेट्मिडिम
(मत्ती ८:१-४; मर्कूस १:४०-४५)
12कोलेम येशू कोले शहरडा बाम्डी, मेसिन्डा जोन बेट्पा कोले मु़चु़का येशूलाई ल्वास्तु़मिमा उनी खेल चु़म्डु़। मेम्मा र्वाक्ताम-र्वाक्ताम ङा बु़डु़, “ए ङाचो़, गानी न बोनी माला गोलाई सबेन्मु चाम्ङिनी।”#५:१२ सबेन्मु।
13येशूका मे जोन बेट्पा मु़चु़थो़ ल्वा हम्मिडिमा र्वाम्डी, “गो न बेउ, गाना सनानु़” र्वाक्तो मेरामलाई लु़प्मिडी, मा मेरामकु जोन हेम्ल्यासिड्डा।
14मेकोतिमा गुमीका मेराम मु़चु़लाई र्वाम्डी, “ओरामकु दुथाम गाना सु़नुङ वो मेसो़या वो! लावो डु़म्लाचो़काडा लक्सा, मा गुका गानालाई रेम्नानु़। मेम्मा जोन बेट्पामा सपा मु़चु़का सासेन्मु बासी र्वाक्साका मोशाकु डु़म्लाका र्वाक्ताम होङङा बे।#५:१४ यहूदीमिमगोडा जोन बेट्पा मु़चु़मिमलाई उनी त्वापनुङ कोदेप बुमु उनी डु़म्लाका मेग्वाक्थालु़वा। मेम्मिम जोन बेट्पा मु़चु़ सस्ताम रेम्बोमु ङादो डु़म्लाचो़का गुलाई रेमु, छाम्मु बास्थाल्ला, मेम्मा कोङङा गु वो वाङमिम यहूदीमिमनुङ कोदेप बुमु ल्वास्थाल्लु़। आरे बोनामा खोत्ले मु़चु़का गाना सन्ना मा इमा जोन हेम्सिड्डा र्वाक्पा ल्वामी।”#लेवी १४:१-३२
15मेमङा लोवो येशूकु दुथाममिम ल्वा खोत्लेथो़ आथावो हापा फोन्सिड्डा। मेम्मिमका छो़म सेर्पा मु़चु़मिम उनीमा सिजेम थो़प्डा नुङ सोमोरीलाम सेल्सिमु लागि मेसिन्डा रोम्डी। 16लावो गुमी ने सु़का वो मेल्वाखोपडा लम्डिमा सो़म्दी बेम्थाल्मिडी।
येशूका उ ल्वा-खेल सोक्पा मु़चु़लाई सबेट्मिडिम
(मत्ती ९:१-८; मर्कूस २:१-१२)
17कोलेम येशूका मु़चु़मिमलाई सीत्तोङा लेट्मिडिम बाइडा। गालील नुङ यहूदियाडाम खोत्ले देलडाम मा यरूशलेमलामका रोक्पा फरिसीमिम नुङ यहूदीकु डु़म्ला सीपा पातु़म्रीमिम मेसिन्डा रोम्डिमा गन्तासिट्मिडिम बाइडा। मेकोतिलो नो़पामिम सबेट्पा यु़म माम्चु़नीका येशूलाई ग्वाम्डिम बाइडा। 18मु़चु़मिमका ल्वा-खेल सोक्पा कोले मु़चु़लाई उ प्लाननुङङा कुर्मिडिमा मेसिन्डा रेट्मिडी। मेर्मिमका गुलाई नेमगोनो येशूकु ङादोडा लमुमा आम्मु माल्मिडी। 19छो़म सेर्पा मु़चु़ बाम्डिमका मेराम मु़चु़लाई नेमगोनो लमु मेचाम्मिवा। मेम्मा मेर्मिम नेमडला लम्डी, मा मुड्खुम होट्मिडिमा सेर्पा मु़चु़ बाट्पा येशूकु ङादोडा मेराम मु़चु़लाई उ प्लाननुङङा वाखावा डम्डी।
20येशूका मेर्मिमकु थो़र ल्वाम्डिमा मे नो़पा मु़चु़लाई र्वाम्डी, “ए छारी, इमा छु़ल हेम्सिड्डा।”
21लावो येशूका आरे र्वाम्डिम थो़म्डिमा मे यहूदीकु डु़म्ला सीपा पातु़म्रीमिम नुङ फरिसीमिमका उनी नड्डा आरे र्वाक्पा मिम्मु चो़म्मिडी, “माम्चु़नीलाई डक्साका जेपा ओराम मु़चु़का उ त्वापलाई सु़ र्वाक्पा मिम्सी? माम्चु़नीका कोङङा छु़ल हेम्मु ने चाम्मी।”
22मेर्मिमका उनी नड्डा हाम मिम्तोङा लेन्मी र्वाक्पा ल्वा येशूका चम्डिमा र्वाम्डी, “गानी हेङा इनीमा नगोडा आरेप्माम मिम्सिनिमिम? 23‘इमा छु़लमिम हेम्स्तामका गाना बकामा लाम्दिया’ र्वामु मेझाम मा? 24लावो मिनीचो़नुङ सुबुडाम मु़चु़कु छु़ल हेप्साक्पा साखाम बु र्वाक्साका गो गानीलाई रेम्बेनिनी।” मेकोतिमा येशूका मेराम ल्वा-खेल सोक्पा मु़चु़लाई र्वाम्डी, “गो गानालाई र्वाङु बका, मा इ प्लान फकामा नेम लक्सा।” 25मेकोतिलो खोत्ले मु़चु़का रेप्मिडी होङङा मेराम मु़चु़ हुबक्लेड्डा, मा उमा प्लान कुर्डु़मा माम्चु़नीकु नङ कोक्तो नेम लस्ता। 26मेम्मा खोत्ले मु़चु़मिम छो़म ङाङाया दु़म्मिडिमा माम्चु़नीकु नङ कोम्डी। मेकोतिमा ङित्तो आरे र्वाम्डी, हेल्लो वो मेल्वाम्मा ल्वा गुइ आनेप ल्वास्ती।
येशूका गुमीनुङ लाम्दिमु लेवी येट्मिडिम
(मत्ती ९:९-१३; मर्कूस २:१३-१७)
27येशू मे शहरलामका पाखा लुम्डिमा लक्तोङा बेम्डिलो कोले लेवी नङकाम कर फक्पा मु़चु़ कर फखोपडा गन्तासिट्पा ल्वाम्डी। येशूका मेरामलाई र्वाम्डी, “गोनुङ लाम्दिया।” 28मेम्मिमका लेवीका खोत्ले ङेड्डु़मा गुमीनुङ लाम्दीडा।
29मेकोतिमा लेवीका येशूलाई उमा नेमडा ग्रुला पेप्डा येड्डु़मी। मेसिन्डा कर फक्पा मु़चु़मिम नुङ वाङमिम सेर्पा बोच्चो़मिम वो पेप्डा गन्मिडिम बाइडा। 30लावो फरिसीमिम नुङ यहूदीमिमकु डु़म्ला सीपा पातु़म्रीमिमका येशूकु सीसिपामिमकु कोर्थो़लाम आरे र्वाक्तो छो़म सु़म्बुर्मा किन्मु चो़म्मिडी, “कर फक्पामिम मा वाङमिम छु़लचो़मिमनुङ गानी हेङा कोदेप पोनी डुनिमिम?”#लूक १५:१-२
31लावो येशूका मेर्मिमलाई र्वाम्डी, “मेनो़पा मु़चु़लाई डाक्टर मेबासी लावो नो़पालाई चाहेदु़म। 32माम्चु़नीकु न-गो होप्माम लिसिक्पा मु़चु़लाई गो येड्डा योङडोम मेएँ, लावो माम्चु़नीकु न-गो होप्माम मेबाट्पा छु़लचो़मिमकु न ख्लोसिनु़ र्वाक्साका योङडोम सो़।”
उपास बुमुकु दुथाम हिलाहिसी
(मत्ती ९:१४-१७; मर्कूस २:१८-२२)
33कोलेम मेर्मिमका येशूलाई र्वाम्डी, “कु-रु़दु़म ग्वाक्पा यूहन्नाकु सीसिपामिमका हेल्लो लोवो सो़म्दी बोमी, मा उपास बुमी। फरिसीमिमकु सीसिपामिमका वो मेमङा बोमी। लावो इनीमा सीसिपामिमका ने हेङा पोमी डुमी कोङङा।”
34येशूका मेर्मिमलाई आरे र्वाम्डी, “लालीकुन्दाकाम थारीका लारेपा मेर्मिमनुङ बुमिमसम्म हाम जन्तीमिमलाई उपास बुबेन्मु चाम्नी? 35लावो आरेप्माम वो थारी रो मेर्मिमनुङ बाट्पा लारेपालाई मु़चु़मिमका फ्वामिमा लमी, मा मेनेम मे जन्तीमिम उपास बुमी।”
36मेकोतिमा गुमीका मेर्मिमलाई सीसि-सो़म्दी र्वाम्डी, “सु़का वो चेम्पामा भ्रो़ट्पा येडला जो़पा येका मेफिरु़। फिरु़ माला ने मे जो़पा ये आ़सी। मे जो़पा ये चेम्पामा भ्रो़ट्पा येनुङ मेघ्रेडु़। 37सु़का वो मालो प्लोक्तोङा लेट्पा अङ्गूरकु बिलाम चेम्पा कोक्तेकु फाजीडा मेजु़लु़। जु़ल्लु़ माला वो मे कोक्तेकु फाजी मेरामका पियु़, मा अङ्गूरकु बिलाम हासिमा कोक्तेकु फाजी वो पारिमिम दु़म। 38मेम्मिमका मालो प्लोक्मा अङ्गूरकु बिलाम जो़पा कोक्तेकु फाजीडा जु़ल्मु बासी। 39ङादो आथाम जु़ल्मा अङ्गूरकु बिलाम डुपा मु़चु़ सु़का वो मालो प्लोक्मा अङ्गूरकु बिलाम डुमु मेद्वाकु़। हेङालोने गुका ‘ङादोम अङ्गूरकु बिलाम ङा भ्रपा’ र्वा।”
Currently Selected:
लूका 5: THUL
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
