प्रकाश 11

दुइठो साक्षी

1तबदोस्र नप्‍ना डण्‍डीअस एकठो लट्‍ठी महीह देगैल् ओ एक जन महीह कल, “उठो, परमेश्‍वरक मन्‍दिर ओ वाकर वेदी नापो, ओ मन्‍दिरम आराधना करुइयन गनो।#इज ४०:३; जक २:१-२ 2मन्‍दिरसे बाहर रहल अङ्‌ग्‍नाभर जिन नापो काकरकि उ त और जातिक मनैन देगैल् बा ओ हुँक्र बयालीस मैन्‍हासम पवित्र सहरह कच्‍याककुचुक परहीँ।#लूक २१:२४ 3ओ भङ्‌ग्रक लुगा लगाइल म्‍वार दुइठो साक्षीहुँकन एक हजार दुइ सय साठी दिनसम अगमवाणी बोल्‍ना अधिकार देहम।”

4उ दुइठो साक्षी त जैतूनिक दुइठो रूख्‍वा ओ पृथ्वीम राज्‍य कर्ना प्रभुक सामुन्‍ने रना दुइठो सामदान हो।#जक ४:३,११-१४ 5कुई हुँकन नाश कर खोजी कलसे हुँकन्‍हक मुहमसे आगी निकर्क उ शत्रुन नाश कर्नेबा। ओ हुँकन हानि कर खोज्‍ना सबजन मुवापैहीँ। 6हुँक्र परमेश्‍वरक वचन सुनाइट्‍सम पानी जिन परस कैक आकाश बन्‍द कर्ना हुँकन्‍हक शक्ति बाटन। पानीक मूलह रगत बनैना ओ पृथ्वीम हुँक्र चाहल अनुसार किसिम-किसिमक महामारी फैलैना समेत हुँकन्‍हक शक्ति बाटन।#१ राज १७:१; प्रस ७:१७-१९; १ शमू ४:८

7हुँक्र साक्षी देना काम सेक्‍लसे पाछ उ अतल कुण्‍डमसे निक्रना जनावर उ दुइ जहनसे लडाइँ कर्नेबा, ओ हुँकन जित्‍क मुवादेनेबा।#दान ७:७,२१; प्रका १२:५-७; १७:८ 8हुँकन्‍हक लाश त हुँकन्‍हक प्रभुह क्रूसम टङ्‌गाक मुवागैल उ बराभारी सहरक डगरिम लब्‍डाइल रहुइया बा, जौन सहरह आहानक रूपम सदोम वा मिश्रदेश कैजैठा।#यशै १:९-१० 9साह्रे तीन दिनसम हरेक देश, कुल, भाषा ओ जातिक मनै हुँकन्‍हक लाश हेरहीँ ओ उ लाश गार नैदेहीँ। 10यी दुइठो साक्षी मुलकम संसारक मनै खुशी मनैहीँ। हुँक्र आनन्‍द मनैहीँ ओ एक-आपसम उपहार साटासाट करहीँ काकरकि यी दुइठो अगमवक्ताहुँक्र संसारक मनैन धेर दुःख देरख्‍लह। 11तर साह्रे तीन दिन बितल त परमेश्‍वरसे जीवन देना साँस उ दुइजन्‍हकम पैँसल ओ हुँक्र आपन ग्‍वारम ठह्र्‍यैल। उ देख्‍क मनै भारी कर्रसे डरैल।#इज ३७:१० 12उ दुइठो अगमवक्ताहुँक्र स्‍वर्गसे एकठो असिन बराभारी आवाज सुन्‍ल, “यिहाँ उप्‍पर आओ।” तब सब दुश्‍मन हेर्टीहेर्टी उ दुइ जन बद्रीम स्‍वर्गओर गैल।#२ राज २:११

13तबहेँ कर्रसे भुइँचाल गैल् ओ उ बराभारी सहरक दशौँ भाग ढलगैल्। यी भुइँचालम सात हजार मनै मुल ओ बाँकी रहल मनै डरले कायल हुइल ओ स्‍वर्गम विराजमान रहल परमेश्‍वरक महिमा कर्ल।#प्रका ६:१२; १६:८ 14द्वासर विपत्ति बितल। आब तीसर विपत्ति आइक लाग बा!

सातवाँ तुरही

15तबदोस्र सातवाँ स्‍वर्गदूत आपन तुरही फुक्ल त स्‍वर्गम बराबरा आवाज असिक गुञ्‍जल,

“पृथ्वीम राज्‍य कर्ना अधिकार आबठेसे

हमार प्रभु ओ उहाँक ख्रीष्‍टक हो

ओ उहाँ जो सड्‌डभर राज्‍य करहीँ।”#प्रस १५:१८; दान २:४४; ७:१४,२७

16तबदोस्र परमेश्‍वरक आघ आपन-आपन सिंहासनम बैस्‍ना उ चौबीस धर्मगुरुहुँक्र परमेश्‍वरक पाउ पर्क दण्‍डवत् कर्ल ओ असिक कैक उहाँक जयजयकार कर्ल,

17“हे सर्वशक्तिमान् परमप्रभु परमेश्‍वर,

जे बाट ओ जे रलह, हम्र अप्‍नह धन्‍यवाद चह्रैठी,

काकरकि अप्‍न आपन महान अधिकार लेरख्‍ली

ओ आपन राज्‍य सुरु कैरख्‍ली।

18जाति-जातिक मनै रिसाइल बाट,

तर अप्‍नक क्रोध देखैना ब्‍याला होरहल

ओ मुवल मनैन्‍हक न्याय कर्ना ब्‍याला आरहल।

अप्‍न सेवकहुँकन अर्थात् अप्‍नक अगमवक्ताहुँकन,

पवित्र जनहुँकन ओ अप्‍नक नाउँ मन्‍ना छोटीबरा सबजहन इनाम देना,

ओ पृथ्‍वी नाश करुइयन नाश कर्ना ब्‍याला आरहल।”#भज २:५; ११०:५; ११५:१३

19तब स्‍वर्गम परमेश्‍वरक पवित्र मन्‍दिर उघारगैल् ओ बाचा करल सन्‍धूक देखपरल। तबदोस्र बिज्‍ली चम्‍कल, डरलग्‍टिक आवाज आइल् ओ गड्याङ्-गुडुङ सुनगैल्, भुइँचाल गैल्, ओ बराबरा पत्‍थ्रा वर्षल।#प्रका ८:८; १६:१८-२१

Currently Selected:

प्रकाश 11: thl

Highlight

Copy

Compare