हिब्रू 4

वास्‍तविक विश्राम

1हमन विश्राम देहम कैक परमेश्‍वरक करल प्रतिज्ञा आम्‍ही फे पलबा। उहओर्से होस करी ओ उ विश्राम पैना ठाउँम पैँठ नैपैना टुह्र कुई फे जिन ह्‍वाए। 2काकरकि पुर्खनअस हमन फे खुशीक खबर सुनागैल् बा। तर हुँकन देगैल् खुशीक खबर हुँकन्‍हक लाग बेकार हुइल् काकरकि हुँक्र आपन सुनल वचनम विश्‍वास नैकर्ल। 3आब हम्र विश्‍वास करुइयनजुन परमेश्‍वरक प्रतिज्ञा करल उ विश्राम पैना ठाउँम जैठी। जसिन कि उहाँ विश्‍वास नैकरुइयन्‍हक बारेम कल,

“उहओर्से मै त रिसक झ्‍वाँकम किर्‍या खाक कनु,

‘मै विश्राम देना ठाउँम हुँक्र कबु फे जाइ नैपैहीँ।’”

विश्राम पैना ठाउँक बन्‍दोबस्‍त कैगिल् नैरह कना बात नैहो, काकरकि सृष्‍टि कैगैल् समयम जो परमेश्‍वरक सारा काम पूरा हुइलकओर्से उहाँ विश्राम कर्लह।#भज ९५:११ 4धर्मशास्‍त्रम कौनो ठाउँम सृष्‍टिक सातवाँ दिनिक बारेम असिक कैगिल् बा, “सारा काममसे परमेश्‍वर सातवाँ दिनम विश्राम लेल।”#उत २:२ 5ओ यी बात चर्चा कैगिल् ठाउँम परमेश्‍वर फेदोस्र कल, “मै विश्राम देना ठाउँम हुँक्र कबु फे जाइ नैपैहीँ।”#भज ९५:११

6अघट्‌टे खुशीक खबर सुनल मनै अट्‌टेरी हुइलकओर्से विश्राम पैना ठाउँम जाइ नैपैल। तर आब और जन फे बाट, जे उ विश्राम पैना ठाउँम जैनेबाट। 7उहओर्से परमेश्‍वर उहाँक विश्राम पैना ठाउँम जाइक लाग और दिनह “आज” कैक फेदोस्र तोक्‍ल। उहाँ आघ ब्‍वालल् बात धेर समय पाछ राजा दाऊदद्वारा कल,

“आज टुह्र उहाँक आवाज सुन्‍बो कलसे,

टुह्र कठोर जिन होओ।”#भज ९५:७-८

8यदि यहोशू इस्राएलीहुँकन परमेश्‍वरक प्रतिज्ञा करल वास्‍तविक विश्राम पैना ठाउँम पुगैट कलसे, परमेश्‍वर पाछसे और दिनिक बातऽ नैबटोइनेरलह।#व्‍य ३१:७; यहो २२:४

9असिक हम्र देख्‍ठी, कि परमेश्‍वर सातवाँ दिनम विश्राम लेहलअस उहाँक मनैन्‍हक लाग तयार पारगैल् विश्राम बाँकी पलबा। 10परमेश्‍वर आपन काम सेक्‍क विश्राम लेहलअस विश्राम पैना ठाउँम पैँठुइयन फे आपन-आपन काममसे विश्राम पैठ।#उत २:२ 11उहओर्से उ विश्राम पैना ठाउँम पैँठक लाग स्‍याकलसम कोसिस करी। यदि हम्र इस्राएलीन्‍हकअस अट्‌टेरी हुइना हो कलसे त हम्र नाश होजैबी।

12काकरकि परमेश्‍वरक वचन त जीवित ओ काम कर्टिरना हिसाबक बा। यी त दुनुओर धार रहल तरवालसे फे धर्‍यार बा। यी भित्तर पुग्‍क प्राण ओ आत्‍मह रेट्‌क जोर्नी ओ हड्डीक गुदीह समेत छिङ्‍टिछिङ्‍टा पारदेठा। परमेश्‍वरक वचन मनैन्‍हक हृदयक विचार ओ चाहनह एक-एक कैक जाँच कर्ठा। 13परमेश्‍वरक नजरम सृष्‍टिक कौनो चिज फे नुकल नैरहट्। उहाँक आघ सब चिज खुल्‍ला बा ओ छर्लङ्‌ग देखपर्ठा। उहाँह जो हम्र सबजन आपन करल कामक हिसाबकिताब बुझाइपर्ठा।

येशू महान् प्रधान पूजारी

14स्‍वर्गम गैलक परमेश्‍वरक छावा येशू जो हमार महान् प्रधान पूजारी हुइलकओर्से हम्र आपन विश्‍वास करल बात पक्‍कासे पक्रलरही। 15हमार प्रधान पूजारी हमार कमजोरी बुझ नैसेक्‍ना पूजारी नैहुइट। पापम फँसैना हरेक उपायद्वारा हमारअस सब बातम उहाँक परीक्षा हुइलन, तर उहाँ पाप नैकर्ल। 16उहओर्से आब हम्र निर्धक्‍क होक अनुग्रही परमेश्‍वरक सिंहासनक आघ जाई, ओ खाँचो परल समयम सहायतक लाग हम्र उहाँसे कृपा ओ अनुग्रह पैनेबाटी।

Currently Selected:

हिब्रू 4: thl

Highlight

Copy

Compare