हिब्रू 3
3
मोशसे येशू महान्
1उहओर्से परमेश्वरक बोलावट पाइल पवित्र दादुभैयहुँक्र, हमार स्वीकार करल प्रेरित ओ प्रधान पूजारी येशूह विचार करो। 2मोशा परमेश्वरक घरम विश्वासयोग्य होक सेवा करलअस येशू फे परमेश्वरक जिम्मा देहल बातम विश्वासयोग्य होक सेवा कर्ल।#गन्ती १२:७ 3घरसे त घर बनुइयक इज्जत बरा रहलअस मोशसे त येशू कहाँ हो कहाँ महान गौरवमय ठहर्ल। 4काकरकि हरेक घर केक्रो ना केक्रो बनाइल रठा, तर वास्तवम सब चिज बनुइया त परमेश्वर जो हुइट। 5मोशा त परमेश्वरक घरम कमारक रूपम विश्वासयोग्य होक सेवा कर्ल। हुँकहार करल कामले भविष्यम प्रकट हुइना सत्य बातक गवाही देहल। 6तर ख्रीष्ट त घरक अधिकार पाइल छावक रूपम विश्वासयोग्य होक सेवा कर्ल। यदि हम्र आपन आशम अन्तिमसम भरोसा ओ गर्व कर्टिरली कलसे, परमेश्वरक घर हम्रहे हुइटी।
कठोर नैहुइना चेताउनी
7उहओर्से पवित्र आत्मक कहल बात असिक लिखल बा,
“आज टुह्र उहाँक आवाज सुन्बो कलसे,
8उजार ठाउँम टुन्हक पुर्खाओँ
परमेश्वरक परीक्षा कैक विरोध करलअस
टुह्र कठोर जिन होओ।
9टुन्हक पुर्खाओँ चालीस वर्षसम
म्वार करल काम देख्क फे नैपत्यैल
ओ म्वार जाँच कर्ल।
10उहओर्से उ मनैनसे महीह भारी रिस लागल,
ओ मै त कैदेनु, ‘हुँकन्हक हृदय जैह्या फे टेँर्ह्कल रठन,
हुँक्र म्वार कलक मन्बोमन्बोनैकर्ट।’
11उहओर्से मै त रिसक झ्वाँकम किर्या खाक कनु,
‘मै विश्राम देना ठाउँम हुँक्र कबु फे जाइ नैपैहीँ।’”#भज ९५:७-११
12भैयौ, होश करो, टुह्रमध्ये कुई फे जीवित परमेश्वरसे दूर लैजैना दुष्ट हृदयक ओ अविश्वासी जिन होओ। 13“आझुक दिन” कना समय रहट्सम हरेक दिन एक-औरजहन उत्साह देटिरहो, तब पापक छलछामले टुह्र कठोर नैहुइबो। 14यदि हम्र सुरुम ख्रीष्टम भरोसा करलअस अन्तिमसम भरोसा कर्टिबाटी कलसे, हम्र ख्रीष्टकसँग साझ्या हकदार होरली। 15धर्मशास्त्रम लिखल बा,
“आज टुह्र उहाँक आवाज सुन्बो कलसे,
टुन्हक पुर्खाओँ विरोध करलअस
टुह्र कठोर जिन होओ।”#भज ९५:७-८
16परमेश्वरक आवाज सुन्क फे उहाँक विरोध करुइयन के रलह? मोशक अगुवाइम मिश्रदेशमसे निकार्क आनल मनै जो नैरलह का? 17परमेश्वर चालीस वर्षसम केहीसे रिसैल? पाप कर्टिरना उह मनैनसे नैहो का, जे उजार ठाउँम सखाप पारगैलह? 18“मै विश्राम देना ठाउँम हुँक्र कबु फे जाइ नैपैहीँ” कैक परमेश्वर क्याकर बारेम किर्या खैलह? उहाँ यी बात उह अट्टेरी मनैन्हक बारेम नैकलह का?#गन्ती १४:१-३५ 19आब हम्र देख्ठी, कि विश्वास नैकर्लक कारण हुँक्र विश्राम पैना ठाउँम जाइ नैपैल।
Currently Selected:
हिब्रू 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
