हिब्रू 2
2
मुक्ति सम्बन्धम चेताउनी
1उहओर्से हम्र आपन सुनल सत्य बातम एकदम मजासे ध्यान देहपर्ठा, तब हम्र सत्य बातमसे नैरप्टनेहुइटी। 2स्वर्गदूतहुँक्रद्वारा बोलगैल् परमेश्वरक सन्देश अटल रह ओ उ सन्देश नैमनुइयन ओ नैटेरुइयन उचित सजाय पैल। 3तब हम्र अत्रा महान् मुक्तिक वास्ता नैकर्ली कलसे हम्र कसिक उम्कबी? यी मुक्ति त सबसे पैल्ह प्रभु येशू अपन्हे प्रचार कर्लह, ओ उहाँक वचन सुन्ना मनै हमार लाग पक्का साबित कैदेल। 4परमेश्वर फे धेर चिन्ह देखाक, धेर किसिमक अचम्म ओ शक्तिशाली काम कैक, ओ आपन इच्छा अनुसार पवित्र आत्मक विभिन्न वरदान देक यी मुक्तिह सत्य ठहरैल।
मनैन मुक्ति देहक लाग ख्रीष्ट मनैया हुइलक
5हम्र बात बट्वैटी अइलक उ पाछ अइना संसारह परमेश्वर स्वर्गदूतन्हक अधीनम नैकरैल। 6धर्मशास्त्रम एक ठाउँम असिक कैगिल् बा,
“मनैया का हो ओ अप्न वाकर फिक्री कर्ठी?
अथवा मनैयक छावा का हो ओ अप्न वाकर वास्ता कर्ठी?
7अप्न ओहीह स्वर्गदूतनसे डान्चे टर पारदेली।
अप्न ओहीह महिमा ओ आदरक मुकुट पहिरारख्ली।
8अप्न सब चिज वाकर पौलीक टर पारदेली।”
परमेश्वर सब चिज मनैयक अधीनम करादेल। याकर मतलब वाकर अधीनम नैरहल चिज कुछु फे नैहो। तर यी वर्तमान समयम सब चिज मनैयक अधीनम रहल हम्र नैदेख्टी।#भज ८:४-६ 9तर हम्र येशूह देख्ठी, उहाँ स्वर्गदूतनसे डान्चे टर पारगैल। परमेश्वरक अनुग्रहक कारण, उहाँ सबजन्हक लाग मुल। उहाँ हमार लाग मृत्युक दुःख भोग्लक कारणले, उहाँ आब महिमा ओ आदरक मुकुट पहिरागैल।
10सृष्टिक सब चिज परमेश्वरद्वारा ओ परमेश्वरक लाग बनल हो। धेर सन्ताननसे आपन महिमा बाँडचुँड कर्ना परमेश्वरक लाग हुँकन मुक्ति देना येशूह दुःख-भोगद्वारा सिद्ध पर्ना उचित रह। 11मनैन पवित्र बनुइया येशू ओ पवित्र बनागैल सबजन्हक बाबा एक्कठो परमेश्वर हुइट। उहओर्से अपन्हे पवित्र बनाइल मनैन येशू “भैयौ” कह शरम नैमन्ट। 12उहाँ कल,
“मै आपन भैयौन्हक माझम
अप्नक नाउँक घोषणा करम।
मै मण्डलीक बीचम
अप्नक स्तुति करम।”#भज २२:२२
13फेदोस्र उहाँ कल,
“मै परमेश्वरम जो भरोसा करम।”
ओ फेदोस्र कल,
“हेरो, मै त, परमेश्वर महीह देलक
यी छाई-छावन्हकसँग बाटुँ।”#यशै ८:१७-१८
14उ छाई-छावन मास ओ रगतक शरीर रलकओर्से येशू फे हुँकन्हकअस मास ओ रगत रहल मनैया हुइल। उहाँ अपन्हे मृत्यु भोग्क मृत्युक शक्ति रहल शैतानह नाश पर्ल, 15ओ मुवपर्ठा कना डरले जीवनभर बन्धनम परल मनैन छुट्कारा देल। 16उहाँ त स्वर्गदूतन सहायता करक लाग नाहीँ तर अब्राहामक सन्तानन सहायता करक लाग अइलह। 17उहओर्से सब बातम उहाँह आपन भैयन्हकअस बनपर्लन। असिक परमेश्वरक सेवम उहाँ दयालु ओ विश्वासयोग्य प्रधान पूजारी हुइल, ओ मनैन पाप क्षमा देहक लाग उहाँ बलिदान हुइल। 18उहाँ अपन्हे फे परीक्षम पर्क दुःख भोग्लकओर्से आब परीक्षम पर्ना मनैन उहाँ सहायता करसेक्ठ।
Currently Selected:
हिब्रू 2: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
