गलाती 5
5
ख्रीष्टम स्वतन्त्र हुइना
1ख्रीष्ट हमन स्वतन्त्र बनैलह। उहओर्से टुह्र आब स्वतन्त्र बाटो ओ आपन स्वतन्त्रता जोगैलरहो। फेदोस्र व्यवस्थक कमारा ह्वाए जिन घुमो। 2सुनो, मै पावल अपन्हे टुँहन कहटुँ, टुह्र खतना कर्ना रीति मन्ठो कलसे टुन्हक लाग त ख्रीष्टक कुछु काम नैहुइल्। 3खतना करपर्ठा कैक कहुइयन मै कहटुँ, हुँकन सम्पूर्ण व्यवस्था मान कर लग्ठन। 4व्यवस्था मान्क परमेश्वरक सामुन्नेम धर्मी ठह्र खोजुइयन ख्रीष्टसे अलग होरलो। परमेश्वरक अनुग्रहसे दूर होरलो। 5हम्र ख्रीष्टम विश्वास कर्लक कारण पवित्र आत्मा हमन परमेश्वरक सामुन्नेम धर्मी ठह्रना आशक बट्या ह्यार लगैठ। 6खतना कर्लसे फे, नैकर्लसे फे ख्रीष्ट येशूम कुछु फरक नैपरट। तर चहना बात त प्रेमद्वारा काम कर्ना विश्वास हो।
7हुइना त टुह्र ठीक हिसाबले दौरटलहो। सत्य बात पालन करबेर टुँहन के र्वाकल? 8यी काम त टुँहन बलुइया परमेश्वर नैकर्ल। 9जसहेँक डान्चे खमिरले सानल सारा पीठह फुल्ना बनैठा, ओसहेँक खमिरअसक झूटा शिक्षाले टुन्हक विश्वासक असल बातह खराब बनाई।#१ कोर ५:६ 10हम्र सबजन प्रभुम रलकओर्से टुन्हक मनम और विचार नैअइनेहो कना म्वार पूरा विश्वास बा। टुँहन अल्मल्याक गलत डगरम लैजैना जे हुइलसे फे परमेश्वर ओहीह सजाय देहुइयाबाट। 11भैयौ, यदि मै कत्राजन्हक कहलअस खतना करपर्ठा कैक प्रचार कर्ठुं कलसे, काजे म्वारम यी सब सतावट अइठा? यदि मै क्रूसक बलिदानद्वारा पैना मुक्तिक प्रचार नैकर्टुं कलसे, कुई फे म्वार विरोध कर्ने नैरह। 12टुँहन अलमलम पर्ना मनै त खतना केल काजे कर्ना, बेनसे पूरा अङ्ग कट्लसे होगैल् नि।
पवित्र आत्मसे अइना जीवन
13भैयौ, टुह्र त स्वतन्त्र हुइक लाग बलागैल् मनै हुइटो। तर यी स्वतन्त्रतह पाप स्वभावक लाग प्रयोग जिन करो। तर प्रेमम एक-औरजन्हक भलाइ करो, 14काकरकि सारा व्यवस्थक सार त एकठो आज्ञम बा, “आपन छिमेकीन अपन्हेहअस प्रेम करो।”#लेवी १९:१८ 15तर टुह्र त अप्न-अप्न जङ्गली पशअस दाँत कट्ना ओ चिथोर्ना कर्ठो कलसे होस करो, नकि त अप्न-अप्न खतम होजैबो।
16उहओर्से मै कहटुँ, पवित्र आत्मक अगुवाइ अनुसार चल्ना मनै आपन शारीरिक लालसा पूरा कर्नाओर नैलग्ट। 17काकरकि पाप स्वभावक इच्छा त पवित्र आत्मक विरोधम ओ पवित्र आत्मक इच्छाजुन पाप स्वभावक विरोधम रठा। यी दुनु एक-औरजन्हक शत्रु हुइट ओ टुह्र कर ख्वाजल बात हुइ नैपाइट।#रोम ७:१५-२३ 18तर यदि टुह्र पवित्र आत्मक अगुवाइ अनुसार चल्ठो कलसे, टुह्र व्यवस्थक अधीनम नैहुइटो।
19पाप स्वभावक काम का-का हो कलसे: व्यभिचार कर्ना, अशुद्ध विचार कर्ना, छाडा हुइना, 20मूर्तिपूजा कर्ना, मन्त्रतन्त्र कर्ना, दुश्मनी कर्ना, झैझग्रा कर्ना, ईर्ष्या कर्ना, रिस कर्ना, आपन केल भलाइ चितैना, फूट अन्ना, गुटबन्दी कर्ना, 21डाहा कर्ना, मत्वारऽ रना, मोजमज्जा कर्ना ओ अस्तह-अस्तह और काम कर्ना। असिन काम करुइयन परमेश्वरक राज्यक हकदार हुइ नैपैहीँ कैक मै पैल्ह फे चेताउनी देनहुँ ओ आब फे देहटुँ।
22तर पवित्र आत्मक फाराजुन: प्रेम कर्ना, आनन्दित हुइना, शान्तिम रना, धीरजी हुइना, दया कर्ना, भलाइ कर्ना, भरपर्दो हुइना, 23नम्र हुइना, अपन्हेह अधीन कर्ना हो। असिन बातक विरोधम कौनो व्यवस्था नैहो। 24तर ख्रीष्ट येशूक मनै आपन इच्छा ओ मायामोहह आपन पाप स्वभावक सँगसँग क्रूसम टङ्गाक मुवादेठ।
25पवित्र आत्मा हमारम रलकओर्से, हम्र उहाँक अगुवाइ अनुसार जो चली। 26हम्र घमण्ड कर्ना, रिस उठैना ओ डाहा कर्ना काम नैकरी।
Currently Selected:
गलाती 5: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
