कलस्सी 3
3
लौव जीवन जिना शिक्षा
1टुह्र फे ख्रीष्टकसँग जियाक उठागैरलो, उहओर्से आब स्वर्गक बात खोजी करो, जहाँ ख्रीष्ट परमेश्वरक दाहिन पाञ्जर बैठलबाट।#भज ११:१ 2पृथ्वीक बातम नाहीँ तर स्वर्गक बातम मन लगाओ, 3काकरकि टुन्हक पुरान जीवन त मुरहल ओ टुन्हक लौव जीवनजुन परमेश्वरम ख्रीष्टकसँग नुकल बा। 4टुन्हक वास्तविक जीवन त ख्रीष्ट जो हुइट ओ उहाँ प्रकट हुइहीँ त टुह्र फे उहाँकसँगसँग प्रकट हुइबो ओ उहाँक महिमम सहभागी हुइबो।
5संसारम टुह्र आपन शरीरक इच्छह मुवादेओ, जस्त: व्यभिचार कर्ना इच्छा, अशुद्ध बात, छाडा चाहना, गलत विचार, ल्वाभ आदि, काकरकि ल्वाभ फे मूर्तिपूजा जो हो। 6यिह बातक कारण जो परमेश्वरक रिस उहाँक आज्ञा नैमनुइयन्हकम पर्ठा। 7टुन्हक जीवन फे एक समयम अस्तह रह ओ टुह्र यिह हिसाबले चलो। 8तर आब टुह्र रिस, क्रोध, डाहा, निन्दा, ओ आपन मुहमसे निस्कना फुहर बोली हटाओ। 9टुह्र आपन पुरान जीवन ओ बानीबेहोरा सब छोररख्लो, उहओर्से किहुह लभर्ना काम जिन करो।#एफि ४:२२ 10आब त टुह्र लौव स्वभाव पारख्लो। टुह्र परमेश्वरक पूर्ण ज्ञान पाइसेको कैक सृष्टिकर्ता आपन रूपम यी स्वभावह लौव बनैटीबाट।#उत १:२६; एफि ४:२४ 11उहओर्से यिहाँ ग्रीक ओ यहूदी, खतना करल ओ नैकरल, असभ्य, अशिक्षित, कमारा ओ फुक्का केक्रो भेदभाव नैरहट् तर महत्वपूर्ण बात ख्रीष्ट केल हुइट ओ उहाँ जो सबजन्हकम बाट।
12टुह्र त परमेश्वरक र्वाजल प्रिय ओ पवित्र जन हुइटो। उहओर्से टुह्र करुणा, दया, नम्रता, स्वाझपन, ओ सहनाशक्तिह लुगाअस लगैलरहो।#एफि ४:२ 13टुह्र एक-औरजहन सह्क बैठो, कुई टुन्हक चित्त दुखादेराखल कलसे क्षमा करो। प्रभु टुँहन क्षमा करलअस टुह्र फे एक-औरजहन क्षमा करो।#एफि ४:३२ 14यी सब गुणसे बहुत प्रेमह अपनाओ, काजेकलसे प्रेम जो सब बातह पूरा एकतम अन्ठा। 15ख्रीष्टक शान्तिह टुन्हक हृदयम राज्य करदेओ। यिह शान्तिक लाग परमेश्वर टुँहन एकठो शरीरम बलैलह। यी बातम टुह्र धन्यवादी हुइपर्ठा। 16ख्रीष्टक वचनले टुन्हक हृदय भरिभराउ बनाओ। आपन सारा ज्ञान-बुद्धिले एक-औरजहन सिखैना ओ सल्लाह देना काम करो। ओ हृदयसे परमेश्वरप्रति धन्यवादी होक भजन, स्तुतिप्रशंसा ओ आत्मिक गीत गाओ।#एफि ५:१९-२० 17टुह्र ज्या बोल्लसे फे, ज्या कर्लसे फे सब चिज प्रभु येशूक नाउँम करो ओ उहाँद्वारा जो परमेश्वर बाबह धन्यवाद देओ।
परिवार सम्बन्धी
18टुह्र गोसिन्यहुँक्र, प्रभुह मनपर्ना हिसाबले आपन-आपन गोस्यन्हक अधीनम रहो।#एफि ५:२२; १ पत्र ३:१
19टुह्र गोस्यहुँक्र, आपन-आपन गोसिन्यन प्रेम करो, हुँकहीनसे नम्र व्यवहार करो।#एफि ५:२५; १ पत्र ३:७
20टुह्र छाई-छावन, सड्डभर आपन डाई-बाबक कहल मानो, काकरकि असिक कर्लसे परमेश्वर खुशी हुइठ।#एफि ६:१ 21टुह्र बाबहुँक्र, आपन छाई-छावन दिक्क जिन लगाओ, नकि त हुँक्र निराश होजहीँ।#एफि ६:४
22टुह्र कमाराहुँक्र, आपन-आपन मालिकन्हक कहल सब बात मानो। मालिकह खुशी पर्ना विचारले केल आँखिक आघ नाहीँ तर प्रभुक डर मान्क स्वाझ मनले काम करो।#एफि ६:५-८ 23टुह्र ज्या काम कर्लसे फे, मनैन्हक लाग करअस नाहीँ, तर प्रभुक लाग करअस दिलोज्यानले करो 24काकरकि प्रभुक प्रतिज्ञा करल हक इनामक रूपम टुह्र पउइयाबाटो कना बात टुँहन थाहँ बा। प्रभु ख्रीष्ट जो टुन्हक मालिक हुइट। 25गलत काम करुइया जे हुइलसे फे दण्ड भोगुइया बा। परमेश्वर केक्रो पक्षपात नैकर्ट।#व्य १०:१७; एफि ६:९
Currently Selected:
कलस्सी 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
