कलस्सी 2

1मै त टुन्‍हक लाग, लाउडिकियम रहल मण्‍डलीक लाग, ओ म्‍वार मुह नैद्‌याखल विश्‍वासीन्‍हक लाग मरिमेट्‌क काम कैरख्‍नु। यी बात टुह्र बुझो कना म्‍वार चाहना बा। 2हुँक्र अर्थात् म्‍वार मुह नैद्‌याखल मनै साहस पाइ सेकहीँ ओ प्रेमक बन्‍धनम सँगसँग रह्‍हीँ कैक मै असिक कर्नहुँ। तब हुँक्र आत्‍मिक रूपले एकदम धनी होक परमेश्‍वरक सन्‍देश बुझ सेकहीँ ओ परमेश्‍वरक रहस्‍य ख्रीष्‍टह पूरा हिसाबले चिन्‍ह सेकहीँ। 3उहाँकम जो परमेश्‍वरक सारा ज्ञान ओ बुद्धिक भण्‍डार बाटन। 4उहओर्से मै टुँहन यी बात कहटुँ, कि जत्रा असल लग्‍लसे फे झूटा बातले कुई फे टुँहन छल कर जिन पाए। 5शरीरम टुँहनसे दूर रलसे फे आत्‍मम त मै टुन्‍हकसँग पलिबाटुँ। ख्रीष्‍टम टुन्‍हक विश्‍वास एकदम अरगर देख्‍क महीह धेर खुशी लागरहल।

ख्रीष्‍टम जीवनक पूर्णता

6जसिक टुह्र ख्रीष्‍ट येशूह प्रभु कैक स्‍वीकार कैरख्‍लो ओसहेँक टुह्र उहाँम जिटीरहो। 7उहाँकभित्तर गहिँरसे जर टेक्‍क परिपक्‍व होओ। टुह्र आपन जीवन उहाँम निर्माण करो ओ टुँहन सिखाइल अनुसार विश्‍वासम अरगर होक उहाँह धन्‍यवाद देटिरहो। 8जागा रहो, नकि त मनैन्‍हक छली ज्ञानबुद्धिक कारण सुख्‍लम रप्‍टबो। असिन बात ख्रीष्‍टसे आइल नैहो तर मनैन्‍हक परम्‍परा ओ संसारक शिक्षासे आइल हो।

9काकरकि ख्रीष्‍टम जो परमेश्‍वरक सारा स्‍वर्गीय स्‍वरूप शरीरिक रूपम बास करल बा। 10ख्रीष्‍ट सारा राज्‍य ओ आत्‍मक शिर हुइट। उहाँम टुन्‍हक जीवन पूरा होरहल। 11टुह्र ख्रीष्‍टम रना जो जाट्‍टिक खतना कैजिना हो। मनैद्वारा शरीरम कैजिना खतना नाहीँ तर ख्रीष्‍टद्वारा खतना कैजिना हो। यी खतना त टुह्र पाप स्‍वभावक शक्तिसे छुट्‌कारा पैना बात हो। 12काकरकि बप्‍तिस्‍मा लेहबेर टुह्र ख्रीष्‍टकसँग गारगैलो ओ मुवलमसे ख्रीष्‍टह जीवित पर्ना परमेश्‍वरक शक्तिम टुह्र विश्‍वास कर्लकओर्से टुह्र फे ख्रीष्‍टकसँग जियागैरलो।#रोम ६:४

13टुह्र पाप कर्लक कारण ओ व्‍यवस्‍था अनुसार खतना नैकर्ना गैरयहूदी मनै हुइलकओर्से एक समयम टुह्र आत्‍मिक रूपम मुवल रलहो। तर आब त परमेश्‍वर टुँहन ख्रीष्‍टकसँग जियारख्‍ल ओ हमार सब पाप क्षमा कैदेरख्‍ल।#एफि २:१-५ 14उहाँ हमार विरोधम लिख्‍गैल् सब तमसुक उहिँम रहल कानूनी दाबीसहित रद्द कैदेल। उहाँ ओहीह क्रूसम कील्‍ला ठोक्‍क नाश कैदेल।#एफि २:१५ 15ओ ख्रीष्‍ट अपन्‍हे उह क्रूसम आत्‍मिक शासक ओ शक्तिह जित्‍ल। उहाँ हुँकन खुल्‍लमखुल्‍ला तमाशा बनादेल।

16उहओर्से खानपिनक, पवित्र दिन मन्‍ना-नैमन्‍ना, औँसी मन्‍ना-नैमन्‍ना या बिसैना दिनिक विषयम कुई फे नियम बनाइ नैपरट्‍।#रोम १४:१-६ 17यी सब बात पाछ अइना बातक छैह्‍याँ केल हो। सक्‍कली बात त ख्रीष्‍ट जो हुइट। 18झूट नम्रता देखैटी “हम्र दर्शन पारख्‍ली” कैक स्‍वर्गदूतन्‍हक पूजा कर्ना ओ अपन्‍हेह महान सम्‍झना मनै बाट। हुँकन्‍हक असिन छली बातम फँस्‍क टुह्र अप्‍न पाइपर्ना इनाम जिन गुमाओ। असिन मनै बिना कारण पाप स्‍वभावक ज्ञानले फुलल् रठ। 19हिँक्र त आपन शिर ख्रीष्‍टसे अलग बाट। उह ख्रीष्‍टक अधीनम रह्‍क सब जोर्नी ठीकसे मिल्‍लसे केल पूरा शरीर पुष्‍ट हुइठा ओ परमेश्‍वरक चाहना अनुसार बहर्टी-बहर्टी जैठा।#एफि ४:१६

20टुह्र त ख्रीष्‍टकसँग मुक यी संसारक आत्‍मसे छुट्‌कारा पारख्‍लो। काजे टुह्र यी संसारक नियम मन्‍टी जिठो? 21जस्‍त: “यी जिन खाओ, उ जिन चिखो, उ जिन छुव” कना? 22यी चिज त प्रयोग कर्लसे नाश होजैठा। यी त मनैन्‍हक बनाइल नियम ओ शिक्षा केल हो। 23धर्मकर्म कर्ना, देखावटी नम्र हुइना ओ जोगीअस जिना, यी सब बुद्धिमान देखपर्ठा। तर यी आपन पाप स्‍वभावक इच्‍छह अधीनम ढर्ना कामम कुछु सहायता नैदेहट्‍।

Currently Selected:

कलस्सी 2: thl

Highlight

Copy

Compare