२ तिमोथी 3
3
अन्त्यक दिन
1तर अन्त्यक दिनम दुःखकष्टक समय अइनेबा कना बात बुझ्लरहो। 2उ ब्याला मनै स्वार्थी, रूप्या-पैँसक लोभी, घमण्डी, ढिट्गर, औरजन्हक बदनाम कर्ना, डाई-बाबन्हक मतलब नैकर्ना, बैगुनी ओ अपवित्र हुइनेबाट। 3केक्रोप्रति प्रेम नैरहल, निर्दयी, चिब्लीचिब्लक बात बट्वैना, छाडा, क्रूर ओ असल बातह मन नैपरैना हुइनेबाट। 4हुँक्र विश्वासघाती, मनपरी कर्ना, घमण्डले फुलल्, परमेश्वरक सटाहा सुखविलासह मन परैना हुइनेबाट। 5हुँक्र भक्तिक भेष ढर्ठ तर वाकर शक्तिह इन्कार कर्ठ। असिन मनैनसे दूरऽ रहो।
6हुँक्रमध्ये कत्रा मनै घर-घरम जाक पापक बोझले दबल, किसिम-किसिमक खराब इच्छक वशम परल, कमजोर महिलन आपन अधीनम पर्ठ। 7ओसिन महिलन सिख्ना त सिक्ठ, तर सत्य ज्ञानसम कबु नैपुगसेक्ट। 8यान्नेस ओ याम्ब्रेस मोशक विरोध करअस, यी मनै फे सत्यक विरोध कर्ठ। हिँकन्हक भ्रष्ट दिमाग ओ नक्कली विश्वास बाटन।#प्रस ७:११ 9तर हिँक्र धेर टिक सेकुइया नैहुइट, काकरकि यान्नेस ओ याम्ब्रेसकअस हिँकन्हक मूर्खता सबजन्हक सामनेम प्रकट हुहीन।
सत्य शिक्षा
10तर टुँ म्वार शिक्षा, म्वार चालचलन, म्वार जीवनक लक्ष्य, म्वार विश्वास, म्वार धैर्य, प्रेम ओ स्थिरता देखरख्लो। 11एन्टिओखिया, आइकोनियन ओ लुस्त्रा सहरम म्वार भ्वागल दुःखकष्ट टुँ मजासे बुझ्लबाटो। मै कसिन-कसिन सतावट सहनु, तर फे प्रभु महीह उ सब आपत्विपत्मसे बचैल।#प्रे १३:१४-५२; १४:१-७,८-२० 12ख्रीष्ट येशूक मनै होक असल जीवन जिय खोज्ना मनैन्हकम सतावट त अवस्य फे अइनेबा। 13तर दुष्ट ओ ठग्गाहुँक्र औरजहन ठग्टी ओ ठग्वापैटी झन्-झन् दुष्ट हुइटी जैनेबाट।
14तर टुँ आपन सिखल ओ पूरा मनले विश्वास करल शिक्षम स्थिर पलरहो, काकरकि यी बात टुँ केहि-केहीसे सिख्लहो उ बात टुँहीन थाहँ बा। 15छोटीहसे टुँ धर्मशास्त्रक बात जानरख्लो। यिह बातले ख्रीष्ट येशूम विश्वास कर्लसे मुक्ति पाजैना बारेम बुझ्ना ज्ञान देठा। 16परमेश्वरक सारा वचन परमेश्वरक प्रेरणाद्वारा रचगैल् हो। यी हमन सत्य बात सिखाइक लाग ओ हमार गल्ती हमन महसुस कराइक लाग उपयोगी बा। यी हम्र गल्ती करल ब्याला हमार सुधार कर्ठा ओ असल जीवन बिताइक लाग हमन सिखैठा। 17परमेश्वर यिह वचन प्रयोग कैक आपन मनैन हरेक असल कामक लाग पूर्ण रूपले तयार पर्ठ।
Currently Selected:
२ तिमोथी 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
