२ तिमोथी 4
4
1परमेश्वरक सामनेम ओ ख्रीष्ट येशूक सामनेम, जे आपन राज्य स्थापना कर अउइयाबाट ओ जिटीह ओ मुवल मनैन्हक न्याय करुइयाबाट कना बात ध्यानम ढैक मै टुँहीन कर्रा आज्ञा देहटुँ, कि 2परमेश्वरक वचन सुनाओ। ब्यालम फे, कुब्यालम हुइलसे फे परमेश्वरक वचन सुनाइ जिन छोरो। धीरजी होक मनैन सम्झाबुझा पारो, चेताउनी देओ ओ हुँकन्हक हिम्मत बह्रादेओ। 3काकरकि असिन समय आइटा, उ समयम मनै ठीक शिक्षा फे नैसहनेहुइट, बेनसे हुँकन मन परल बात केल सुनैना हुँकन्हक इच्छालागल धेर शिक्षकहुँकन कुह्रेइहीँ। 4हुँक्र सत्य बातह इन्कार करहीँ, तर बट्कोहीक पाछ लगहीँ। 5तर टुँ सब परिस्थितिम सचेत रहो, कष्ट उठाओ, खुशीक खबर सुनैना कामम लग्लरहो ओ आपन सेवक कामकर्तव्य सब पूरा करो।
6काकरकि, मै त बलिक रूपम अर्पण हुइक लाग बाटुँ ओ म्वार बिदा हुइना ब्याला आस्याकल। 7मै मजासे लडाइँ कैरख्नु, आपन दौड पूरा कैरख्नु ओ विश्वासह जोगैलबाटुँ। 8आब परमेश्वर म्वार जीवन देख्क खुशी हुइलकओर्से म्वार लाग मुकुट ढैरख्ल। उ मुकुट ठीकसे न्याय कर्ना प्रभु उ दिन महीह देहुइयाबाट, महीह केल नाही, तर प्रेमपूर्बक उहाँक अइना दिनिक बट्या हेर्ना सबजहन देहुइयाबाट।
व्यक्तिगत बात
9म्वारठे झट्ट अइना कोसिस करो। 10डेमास यी संसारक मोहम फँस्क महीह छोर्क थेसलोनिका सहरम गैरहल। क्रेसेन्स गलातिया क्षेत्रम ओ तीतसजुन दलमातिया क्षेत्रम गैरल।#कल ४:१४; फिले २४; २ कोर ८:२३; गला २:३; तीत १:४ 11लूका केल म्वारसँग बाट। मर्कूसह आपनसँग लेक अइहो, काकरकि ऊ म्वार कामम धेर सहायता कर सेक्नेबाट।#कल ४:१४; फिले २४; प्रे १२:१२,२५; १३:१३; १५:३७-३९; कल ४:१० 12मै तुखिकसह एफिसस सहरम पठारख्नु।#प्रे २०:४; एफि ६:२१-२२; कल ४:७-८
13त्रोआसम कार्पसकठे म्वार छ्वारल कम्रा टुँ आइबेर आन्देहो। उहाँ रहल किताब आन्देहो, विशेष कैक छालावाला किताबभर बिनाबिस्रैल आन्देहो।#प्रे २०:६
14तमटा अलेक्जेन्डर म्वार भारी हानि कैराखल। प्रभु ओहीह वाकर काम अनुसार बद्ला लेहुइयाबाट।#१ तिमो १:२०; भज ६२:१२; रोम २:६ 15ऊ हमार करल प्रचारक भारी विरोध कैराखल। टुँ फे ओहीसे होसियार रहो।
16पैल्हक फ्यारा म्वार मुद्दा चलबेर म्वार पक्षम कौनोजन फे नैबोल्ल, सबजन महीह छोरदेल। यी बातक दोष हुँकन जिन लाग। 17तर प्रभु म्वार साथम रहक शक्ति देलकओर्से मै सब जातिक मनैन खुशीक खबर पूरा रूपले सुनैना मौका पैनु। ओ परमेश्वर महीह सिंहक मुहमसे बचैल। 18प्रभु महीह सारा खराबीमसे बचैहीँ, ओ उहाँक स्वर्गक राज्यम सुरक्षासाथ लैजहीँ। सड्डभर उहाँक महिमा ह्वाए। आमेन।
आखिरी अभिवादन
19प्रिस्किला, अकिलास ओ ओनेसिफरसक घरपरिवारन फे म्वार अभिवादन कैदेहो।#प्रे १८:२; २ तिमो १:१६-१७ 20इरास्तस कोरिन्थ सहरम रहगैल, त्रोफिमसह मै मिलेटस सहरम बेराम अवस्थम छोर्क आरनु।#प्रे १९:२२; रोम १६:२३; प्रे २०:४; २१:२९ 21हिउँद सुरु हुइनासे आघ अइना कोसिस करहो। युबुलस, पुडेस, लिनस, क्लौडिया ओ और सक्कु भैयहुँक्र टुँहीन अभिवादन कैरख्ल।
22प्रभु टुँहार साथम पलरहीँ ओ टुह्र सबजन्हकम प्रभुक कृपा पलरह।
Currently Selected:
२ तिमोथी 4: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
