२ तिमोथी 2
2
1उहओर्से हेरो तिमोथी, म्वार छावा, ख्रीष्ट येशूक देहल अनुग्रहम बलवान होओ। 2मै धेर मनैन्हक सामुन्नेम सिखाइबेर टुँ ज्या सुन्लो, उ बात औरजहन फे सिखाइ सेक्ना विश्वासयोग्य मनैन जिम्मा देओ। 3ख्रीष्ट येशूक असल सिपाहीअस दुःख उठैना कामम हमारसँग सहभागी होओ। 4सेनाम भर्ना हुइल् सिपाही और कामम अल्झल नैरट, काकरकि आपन सेनापतिह खुशी पर्ना हुँकन्हक लक्ष्य रठन। 5खेलम भाग लेना खेलाडी नियम अनुसार नैख्यालट् कलसे इनाम फे नैपाइस्यकट्। 6पसना बहाक खेती करुइया किसानक जो बालीक पहिल भाग पैना अधिकार रठस। 7म्वार कहल बातह मजासे विचार करो, काकरकि यी सब बात बुझक लाग प्रभु टुँहीन सहायता करहीँ।
8मुवलमसे जियल दाऊद वंशक येशू ख्रीष्टह याद करो, म्वार प्रचार करल खुशीक खबर यिह हो। 9यिह खुशीक खबर सुनैलक कारण मै जेलम अपराधीअस सिक्रीले बाहान्गैल् बाटुँ। तर परमेश्वरक वचन त कुछु चिजले बान्ध नैसेक्जाइट्। 10उहओर्से मै परमेश्वरक र्वाजल मनैन्हक हितक लाग सब चिज सहठुँ, कि हुँक्र फे ख्रीष्ट येशूम रहल मुक्ति प्राप्त कर सेकहीँ ओ अनन्तसम्मक महिमम सहभागी हुइसेकहीँ। 11यी बात सत्य हो,
यदि हम्र उहाँकसँग मुली कलसे,
हम्र उहाँकसँग जिने फे बाटी।
12हम्र धीरज कैक दुःखकष्ट सहबी कलसे,
उहाँकसँग राज्य फे कर्नेबाटी।
हम्र उहाँह अस्वीकार कर्बी कलसे,
उहाँ फे हमन अस्वीकार कर्नेबाट।#मत्ती १०:३३; लूक १२:९
13हम्र विश्वासयोग्य नैरलसे फे,
उहाँ विश्वासयोग्य पलरनेबाट,
काकरकि उहाँ आपन स्वभावक विरोधम जाइ नैसेक्नेहुइट।
ग्रहणयोग्य कामदार
14विश्वासीहुँकन यी बात सम्झादेओ, ओ शब्दक विषयम बिना अर्थक वादविवाद जिन करहीँ कैक परमेश्वरक आघ चेताउनी देओ जौन बातले केक्रो भलाइ नैकरट् बेनसे सुन्ना मनैन हानि केल पुगैठा। 15लजाइ नैपर्ना ओ सत्य शिक्षह ठीकसे उपयोग कर्ना कामदारअस आपन जीवनह परमेश्वरक आघ ग्रहणयोग्य बनैना पूरा कोसिस करो। 16परमेश्वरक अपमान कर्ना बिना कामक बकवाससे दूर रहो, काकरकि असिन बकवासले त झन्-झन् परमेश्वरसे दूर लैजिठा। 17असिन बकवास करुइन्हक शिक्षा त भित्र-भित्र कुह्टी जैना सइन खाटीअस रठन। हुमेनियस ओ फिलेतसक शिक्षा फे अस्तहेँ बाटन। 18हुँक्र सत्य बातसे दूर गैरल। हुँक्र मुवलमसे जिना काम होस्याकल आब नैहुइकरट् कैक कत्राजन्हक त विश्वासऽ खलबलादेरख्ल। 19तर फे परमेश्वरक आपन बैसाइल जग सड्डभर अटल बाटन, ओ उहिँम यिह लिखल छाप लागल बा, “प्रभु आपन मनैन चिह्न्ठ,” ओ “अपन्हेह प्रभुक मनै कहुइयन सबजन खराब कामसे दूर रहीँ।”#गन्ती १६:५
20कौनो बरा घरम स्वान ओ चाँदीक भाँरा केल नैरटन, तर माटी ओ कट्ठोक भाँरा फे रठन। कुछु भाँरा विशेष कामक लाग चलाजैठा त कुछु भाँरा साधारण कामक लाग चलाजैठा। 21यदि कौनो मनैया अपन्हेह नैमजा कामसे शुद्ध ढर्ठा कलसे, ऊ असल कामक लाग एकठो व्यक्ति बन्नेबा, ओ ऊ च्वाखापारल ओ मालिकक् प्रयोगक लाग उपयोगी ओ हरेक असल काम करक लाग तत्पर हुइनेबा।
22उहओर्से जवानीक लालसासे दूर भागो, ओ शुद्ध हृदयले प्रभुह पुकारा करुइयन्हकसँग धार्मिकता, विश्वास, प्रेम ओ शान्तिक पाछ लागो। 23तर बिना अर्थक उटपट्याङ वादविवादसे दूर रहो, टुँहीन थाहाँ बा कि असिन विवादले झग्रा केल पर्ठा। 24प्रभुक सेवा कर्ना मनै झग्राहा नैहुइपरट्, बेनसे सबजहन दया कर्ना, सबजहनसे मिल्ना, औरजहन सिखाइ सेक्ना ओ सह सेक्ना हुइपर्ठा। 25आपन विरोधीहुँकन नम्र होक सम्झाइपर्ठा, सायद परमेश्वर हुँकन पापी मन परिवर्तन कर्ना मौका देठ, ओ सत्यह चिन्ह सेक्ना बुद्धि देठ कि। 26असिक हुँक्र होसम आक शैतानक फान्दमसे उम्कनेबाट। काकरकि शैतान आपन इच्छा पूरा करक लाग हुँकन आपन कब्जम ढर्ल बा।
Currently Selected:
२ तिमोथी 2: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
