२ तिमोथी 1

1परमेश्‍वरक इच्‍छाद्वारा ख्रीष्‍ट येशूक प्रेरित हुइक लाग रोजगैल् मै पावल यी चिठी लिखटुँ। परमेश्‍वरक करल प्रतिज्ञक बारेम औरजहन सुनाइक लाग मै रोजगैनु। ओ उ प्रतिज्ञा यी हो कि ख्रीष्‍ट येशूम विश्‍वास करुइयन अनन्‍त जीवन पैठ। 2म्‍वार प्रिय छावा तिमोथीह यी चिठी लिखटुँ। परमेश्‍वर बाबा ओ हमार प्रभु ख्रीष्‍ट येशू टुँहीन अनुग्रह, दया ओ शान्‍ति देहीँ।#प्रे १६:१

धन्यवाद ओ उत्‍साह

3मै प्रार्थना करबेर रातदिन टुँहीन सम्‍झटीरठुँ, ओ परमेश्‍वरह धन्यवाद देठुँ। जसहेँक म्‍वार पुर्खाहुँक्र परमेश्‍वरक सेवा कैरख्‍ल ओसहेँक मै फे शुद्ध विवेकले उहाँक सेवा कर्ठुं, ओ टुँहार लाग उहाँह धन्यवाद देठुँ। 4टुँहार आँस गिराइल बात सम्‍झठुँ त टुँहीन भ्‍याँट कर्ना भारी इच्‍छा जग्‍ठा। टुँहीनसे भ्‍याँट कर पैलसे कत्रा खुशी लग्‍नेरह। 5मै टुँहार सक्‍कली विश्‍वासक सम्‍झना कर्ठुं। यी विश्‍वास पैल्‍ह टुँहार नानी लोइस ओ टुँहार डाई युनिसकम रलहन, ओ यी विश्‍वास आब टुँहारम फे बा कना बातम म्‍वार कुछु शङ्‍का नैहो।#प्रे १६:१ 6उहओर्से मै टुँहीन सम्‍झना दिलाइटुँ, कि मै टुँहारम हाँठ ढैदेक परमेश्‍वर टुँहीन देहल वरदानक पूरा सदुपयोग करो। 7काकरकि परमेश्‍वर हमन डरक आत्‍मा नाही, तर शक्ति, प्रेम ओ अपन्‍हेह अधीनम ढर सेक्‍ना आत्‍मा देरख्‍ल।

8उहओर्से हमार प्रभुक साक्षी देना कामम शरम जिन मानो, ओ मै कैद पर्लकम फे शरम जिन मानो, बेनसे परमेश्‍वरक शक्तिम खुशीक खबर सुनैना कामम टुँ म्‍वारसँग दुःख भ्‍वागक लाग तयार होओ। 9परमेश्‍वर हमन बचाक आपन मनै हुइक लाग बलैल। हमार करल कामक आधारम नाही, तर उहाँक आपन इच्‍छा ओ अनुग्रहक आधारम हो। यी अनुग्रह परमेश्‍वर युगौँयुगसे ख्रीष्‍ट येशूक माध्‍यमसे हमन देरख्‍लह। 10तर हमन मुक्ति देहुइया ख्रीष्‍ट येशू अइल त यी बात प्रकट हुइलक हो। उहाँ मृत्‍युह जित्‍क नाश नैहुइना जीवनह खुशीक खबरक माध्‍यमसे प्रकाशम अन्‍ल। 11यिह खुशीक खबर सुनाइक लाग परमेश्‍वर महीह प्रचारक, प्रेरित ओ शिक्षक हुइक लाग नियुक्त कर्लह।#१ तिमो २:७ 12उहओर्से मै यी दुःख भोग्‍टीबाटुँ। तर मै यी बातम नैशर्मैटुँ, काकरकि मै क्‍याकरम विश्‍वास कैरख्‍नु उ बात महीह थाहाँ बा। जौन बात मै उहाँह सुम्‍परख्‍नु#१:१२ मै उहाँह सुम्‍परख्‍नु: याकर और अर्थ यी फे हुइसेक्‍ठाः उहाँ महीह सुम्‍परख्‍ल।, उ बात उहाँ आपन अइना दिनसम सुरक्षित ढर सेक्‍नेबाट कना मै ढुक्‍क बाटुँ।

13महीसे टुँ ज्‍या शिक्षा सिख्‍लो, उ सत्‍य शिक्षक सही नमुना मानो। ख्रीष्‍ट येशूम रहल विश्‍वास ओ प्रेमम स्‍थिर रहक सब मनैन सिखाओ। 14टुँहारम जिम्‍मा लगागैल् असल बातह हमारम बास कर्ना पवित्र आत्‍मक सहायताले सुरक्षित ढर्लरहो।

15टुँहन थाहँ बा एशियम बैस्‍ना सक्‍कुजन महीह छोर्क गैल, हुँक्रमध्‍ये फुगेलस ओ हर्मोगेनस फे हुइट।

16ओनेसिफरसक घरपरिवारन प्रभु दया करहीँ। काकरकि ऊ महीह धेर फ्‍यारा हौसला देलह, ओ मै झेलखानम रहबेर म्‍वार हाँठम बान्‍धल सिक्रीक फे हुँकहीन शर्म नैलग्‍लन। 17तर ऊ रोमम अइल त महीह नैभेटाइटसम दिलोज्‍यानले म्‍वार खोजी कर्ल। 18प्रभुक अइना दिनम हुँकहीन प्रभु कृपा करहिन। एफिससम हुँकहार करल सेवा त टुँहीन थाहँ बा।

Currently Selected:

२ तिमोथी 1: thl

Highlight

Copy

Compare