२ थेसलोनिकी 1
1
1हमार परमेश्वर बाबा ओ प्रभु येशू ख्रीष्टक थेसलोनिकम रहल मण्डलीह हम्र पावल, सिलास ओ तिमोथी यी चिठी लिखटी।#प्रे १७:१ 2परमेश्वर बाबा ओ प्रभु येशू ख्रीष्ट टुँहन अनुग्रह ओ शान्ति देहीँ।
येशू ख्रीष्टक कर्ना न्याय
3हेरो भैयौ, हम्र टुन्हक लाग परमेश्वरह धन्यवाद देहहीपर्ठा। ओ यी ठीक फे हो, काकरकि टुन्हक विश्वास एकदम धेर बाह्रल बा ओ एक-आपसम टुह्र हरेकजन्हक प्रेम फे झन्-झन् बहर्टीगैरहल। 4उहओर्से हम्र टुन्हक बारेम परमेश्वरक और मण्डलीम गर्व कैक बोल्ठी। हम्र खासकैक सतावट ओ दुःखकष्टम टुन्हक सहना शक्तिक ओ विश्वासक बारेम गर्व कर्ठी।
5परमेश्वर यिह दुःखकष्टह प्रयोग कैक आपन न्याय प्रमाणित करुइयाबाट। उहाँ टुँहन परमेश्वरक राज्यम जैना योग्य बनैटीबाट। ओक्र लाग त टुह्र दुःख भ्वागटो। 6परमेश्वर ठीकसे न्याय कर्ठ, उहाँ टुँहन दुःख देहुइयन दुःख देहुइयाबाट, 7ओ टुह्र दुःख भोगुइयन ओ हमन सुख देहुइयाबाट। यी काम तब हुई, जब प्रभु येशू आपन शक्तिशाली स्वर्गदूतन्हकसँग आगीक लहरम स्वर्गमसे देखपरहीँ। 8परमेश्वरह नैचिह्न्ना मनैन ओ हमार प्रभु येशू ख्रीष्टक बारेम सुनागैल खुशीक खबरह नैटेर्ना मनैन उहाँ दण्ड देहुइयाबाट। 9हुँक्र प्रभुक उपस्थिति ओ उहाँक शक्तिशाली तेज अजरारमसे निक्रावापैहीँ ओ सड्डभरिक लाग नाश कैजहीँ।#यशै २:१० 10यी तब हुई, जब प्रभु येशू फेदोस्र अइहीँ। उ दिन उहाँ आपन पवित्र मनैनसे ओ सारा विश्वासीनसे आदर ओ प्रशंसा पउइयाबाट। उ बगालम टुह्र फे रबो, काकरकि टुह्र हमार कहल बातम विश्वास कर्लो।
11उहओर्से हम्र टुन्हक लाग प्रार्थना कैदेटीरठी। परमेश्वर टुँहन जौन जीवनक लाग बलैल, उहाँ टुँहन वाकर योग्य बनैहीँ, ओ उहाँक शक्तिले हरेक असल उद्देश्य ओ विश्वासक काम करक लाग सहायता करहीँ कैक हम्र उहाँसे कठी। 12तब टुन्हक चालचलनक कारण हमार प्रभु येशूक नाउँक आदर हुउइया बाटन, ओ टुह्र फे उहाँकसँग आदर पउइयाबाटो। हमार परमेश्वर ओ प्रभु येशू ख्रीष्टक अनुग्रहक कारणले यी सब सम्भव बा।
Currently Selected:
२ थेसलोनिकी 1: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.