१ थेसलोनिकी 5
5
1हेरो भैयौ, प्रभु कैह्या ओ कत्राजुन अइहीँ कना बारेम टुन्हक लाग लिखदेहपर्ना आवश्यक नैहो। 2काकरकि प्रभुक अइना दिन त रात्क चोर्वा आइअस सुटुक्क अउइया बा कैक टुँहन पूरा थाहाँ बा।#मत्ती २४:४३; लूक १२:३९; २ पत्र ३:१० 3मनै “शान्ति ओ सुरक्षा” कटीरहल समयम, गर्भवती जन्नीमनैयह व्याथा लागअस, हुँकन्हकम विपत्ति एकचोट्टे अउइयाबाटन, ओ हुँक्र उम्क नैपैनेहुइट! 4तर हेरो भैयौ, टुह्र यी बातक बारेम अन्धकारम नैहुइटो। उहओर्से प्रभु अइना दिन टुँहन चोर्वाअस चकित नैपर्नेहो। 5काकरकि टुह्र सबजन अजरारक ओ दिनक सन्तान हुइटो। हम्र रातिक ओ अन्धकारक सन्तान नैहुइटी।#५:५ यी सन्दर्भम अजरार कलक धार्मिकता, ज्ञान, मुक्ति या परमेश्वर हुइसेकी। 6उहओर्से हम्र औरजन्हकअस सुत नैपरट, तर जागा रहपर्ठा ओ अपन्हेह अनुशासनम ढरपर्ठा। 7सुतुइयन रात्क सुत्ठ ओ मत्वरेन फे रात्क जो मत्वार हुइठ। 8तर हम्र त दिनक सन्तान हुइलकओर्से, हम्र अनुशासनम पलरही। विश्वास ओ प्रेमह छातीपाताअस, ओ मुक्तिक आशह टोपअस पहिर्क सुरक्षित रही।#यशै ५९:१७; एफि ६:१३-१७ 9काकरकि परमेश्वर हमारम आपन रिस झारक लाग नाहीँ, तर प्रभु येशू ख्रीष्टद्वारा हमन मुक्ति देहक लाग रोज्लह। 10येशू हमार लाग मुल ताकि हम्र चाहा जिटीह रही, चाहा मुवल रही, हम्र उहाँकसँग जियपाई। 11उहओर्से एक-औरजहन उत्साह देना ओ विश्वासम बलगर बनैना काम करो, जौन काम टुह्र कर्टी फे बाटो।
आखिरी सल्लाह ओ बिदाइ
12हेरो भैयौ, हम्र बिन्ती करटी, कि टुन्हक बीचम दिलोज्यानले प्रभुक काम कर्ना ओ टुँहन निर्देशन देना अगुवन आदर करो। 13हुँकन्हक कर्लक कामक लाग हुँकन प्रेमसे धेर आदर ओ सम्मान करो। ओ एक-आपसम मेलमिलापम रहो।
14हेरो भैयौ, अल्छी मनैन चेताउनी देओ, हरेस खैना मनैन साहस देओ, कमजोर मनैन सहायता करो, ओ सबजहनसे सहनशीलता देखाओ कैक हम्र टुँहनसे बिन्ती करटी। 15खराबीक बद्ला खराबी कुई फे जिन कर, तर एक-औरजन्हक ओ सबजन्हक भलाइ कर्ना कोसिस करो।
16सड्ड आनन्दित रहो। 17प्रार्थना कर्टिरहो। 18सब परिस्थितिम धन्यवाद चह्राओ, काकरकि टुह्र ख्रीष्ट येशूम विश्वास करुइयन्हक लाग परमेश्वरक इच्छा यिह हो।
19पवित्र आत्मक कामह जिन रोको। 20अगमवाणीह हेल्हा जिन करो। 21तर सब कहल बातक जाँच करो ओ असल बातह पक्रलरहो। 22सब किसिमक खराबीमसे अलग रहो।
23शान्ति देहुइया परमेश्वर अपन्हे टुँहन सम्पूर्ण हिसाबले पवित्र बनैहीँ, ओ हमार प्रभु येशू ख्रीष्ट फेदोस्र नैआइटसम टुन्हक आत्मा, प्राण#५:२३ आत्मा, प्राण: बाइबलम आत्मा ओ प्राण अल्गैना मुस्किल बात हो। उ दुनु चिजह सँगसँग व्यक्तिक एकठो द्याख नैसेक्जिना भागक रूपम बुझ सेक्जिठा। ओ शरीर निर्दोष ह्वाए कना हमार आशा बा। 24परमेश्वर जो यी सब करुइयाबाट, काकरकि टुँहन बलुइया परमेश्वर विश्वासयोग्य बाट।
25हेरो भैयौ, हमार लाग फे प्रार्थना कैदेहो। 26सबजहन पवित्र प्रेमले अभिवादन करहो।
27मै टुँहन प्रभुक नाउँम आज्ञा देहटुँ, कि यी चिठी पहर्क सबजहन सुनादेहो।
28हमार प्रभु येशू ख्रीष्टक अनुग्रह टुन्हकसँग पलरह।
Currently Selected:
१ थेसलोनिकी 5: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
