२ पत्रुस 1
1
1प्रभु येशू ख्रीष्टक कमारा ओ प्रेरित मै सिमोन पत्रुस यी चिठी लिखटुँ। हमार परमेश्वर ओ मुक्ति देहुइया येशू ख्रीष्टक धार्मिकताद्वारा हमारअस बहुमूल्य विश्वास पाइल सबजहन मै चिठी पठाइटुँ। 2परमेश्वर ओ हमार प्रभु येशूक ज्ञानम टुह्र बहर्टीगैलकओर्से उहाँ टुँहन अनुग्रह ओ शान्ति प्रशस्त मात्रम देहीँ।
परमेश्वरह खुशी लग्ना जीवन
3परमेश्वर आपन शक्तिले हमन उहाँह खुशी लग्ना जीवन जियक लाग आवश्यक पर्ना सब चिज देरख्ल। आपन महिमा ओ भलाइद्वारा हमन बलुइया परमेश्वरह चिन्हलकओर्से हम्र यी सब चिज पारख्ली। 4उहाँक महिमा ओ असल स्वभावद्वारा उहाँ हमन महान ओ बहुमूल्य चिज देना प्रतिज्ञा कैरख्ल। यी सब चिज पैलकओर्से हम्र उहाँक ईश्वरीय स्वभावम सहभागी हुइसेक्ठी, ओ संसारम रहल खराब चाहना ओ भ्रष्ट प्रभावमसे उम्कसेक्ठी।
5उहओर्से आब आपन विश्वास बलगर बनाइक लाग स्याकलसम असल व्यवहार करो। असल व्यवहार कर्ना केल नाहीँ, ज्ञानम फे बहर्टीजाओ। 6ज्ञानम बहर्टी जैना केल नाहीँ, तर अपन्हेह नियन्त्रण कर्ना फे होओ। अपन्हेह नियन्त्रण कर्ना केल नाहीँ धीरजी फे होओ। धीरजी हुइना केल नाहीँ परमेश्वरह खुशी लग्ना जीवन फे जिओ। 7परमेश्वरह खुशी लग्ना जीवन जिना केल नाहीँ, एक-औरजन्हक वास्ता फे करो। एक-औरजन्हक वास्ता प्रेमिलो भावनाले करो। 8यदि टुन्हकम यी गुण बहर्टीगैल् कलसे, हमार प्रभु येशू ख्रीष्टह चिन्हल बात टुन्हक जीवनक लाग उपयोगी हुइठा ओ टुन्हक जीवनह अर्थपूर्ण बनादेठा। 9तर यदि टुन्हकम यी गुण नैहो कलसे, टुह्र दूरीक बात नैदेख्ना आन्धर मनैअस हुइटो। ओसिन मनै त आघ करल पापमसे शुद्ध हुइलक बात फे बिस्रारख्ठ।
10उहओर्से हेरो भैयौ, परमेश्वर टुँहन बलैल ओ रोज्ल कना बात आपन जीवनम प्रमाणित करक लाग स्याकलसम कोसिस करो। यदि टुह्र यी सब बात कर्बो कलसे, विश्वासमसे पाछ नैहट्ने हुइटो। 11तब हमार प्रभु ओ मुक्ति देहुइया येशू ख्रीष्ट आपन अनन्त राज्यम भव्य स्वागत करुइयाबाट।
भरोसायोग्य परमेश्वरक वचन
12हुइना त टुँहन यी सब बात थाहाँ बा, ओ टुँहन सिखागैल् सत्य बातम टुह्र अरगरसे अर्यैलबाटो, तर फे मै टुँहन यी सब बात घरीघरी सम्झैटीरहम। 13मै यी शरीररूपी ड्यारम जियट्सम टुँहन यी बात सम्झैटीरह परी जसिन लग्ठा, 14काकरकि मै यी शरीरह हाली छ्वार परी कना बात महीह थाहाँ बा। यी बात हमार प्रभु येशू ख्रीष्ट महीह पैल्हहेँ देखादेरख्ल। 15मै मुक जाजैम त फे टुह्र यी बात सम्झलरबो कैक मै स्याकलसम कोसिस कर्टिबाटुँ।
16हमार प्रभु येशू ख्रीष्ट शक्तिसहित घुम्क अउइयाबाट कैक हम्र टुँहन ज्याकरत्याकर सिर्जाइल बातक भरम नैकली। हम्र आपनऽ आँखिले उहाँक चमकदार महिमा देख्लही। 17महिमामय परमेश्वरसे “यी म्वार प्रिय छावा हुइट। हिँकहीनसे मै धेर खुशी बाटुँ” कना आवाज आइल त, उहाँ परमेश्वर बाबसे आदर ओ सम्मान पैल। 18हम्र उहाँकसँग पवित्र पर्वत्वम रहल समयम स्वर्गसे आइल उ आवाज हम्र अपन्हे सुन्लही।#मत्ती १७:१-५; मर्क ९:२-७; लूक ९:२८-३५
19उ अनुभवक कारणले अगमवक्तन्हक ब्वालल् वचन सत्य हो कना बातम हम्र झन् पक्का होरली। हुँकन्हक कहल वचनम टुह्र मजासे ध्यान देहपर्ठा, काकरकि उ वचन अन्धार ठाउँम दिया चम्कअस हो। बिहानिक अजरार नैहुइट्सम, बिहानिक तोरैँया ख्रीष्ट टुन्हक हृदयम नैचम्कट्सम टुह्र उ वचनम ध्यान देटीरहपर्ठा। 20टुह्र सबसे पैल्ह बुझपर्ना बात का हो कलसे, धर्मशास्त्रम लिख्गैल् अगमवाणी मनै आपन हिसाबले अर्थ लगैना बात नैहो, 21काकरकि अगमवाणी केक्रो कल्पना कैक सिर्जाइल बात नैहो। तर अगमवक्ताहुँक्र पवित्र आत्मक अगुवाइ पाक परमेश्वरक तर्फसे ब्वालँट्।
Currently Selected:
२ पत्रुस 1: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
