२ पत्रुस 2
2
झूटा शिक्षकहुँकन्हक भ्रष्ट जीवन
1तर इस्राएलीन्हक बीचम झूटा अगमवक्ताहुँक्र फे रलह। ओसहेँक टुन्हक बीचम फे झूटा शिक्षकहुँक्र देखपरुइयाबाट। हुँक्र गोप्य रूपले विनाशम लैजैना शिक्षा सिखुइयाबाट, ओ म्वाल तिर्क हुँकन छुट्कारा देना प्रभुह समेत इन्कार करुइयाबाट। असिक हुँक्र अचानक आपनम अपन्हे दण्ड अनुइयाबाट। 2हुँकन्हक देखासिकी कैक धेर जन घिनलग्टिक जीवन जिउइयाबाट। ओ हुँकन्हक कारण और मनै फे सत्य डगरक बदनाम करुइयाबाट। 3ऊ लोभी झूटा शिक्षकहुँक्र बनौटी बात बट्वाक टुँहनसे अनुचित फाइदा उठुइयाबाट। परमेश्वर हुँकन पैल्हहेँ दोषी ठह्रारख्ल, उहाँ पक्का फे हुँकन नाश करुइयाबाट।
4परमेश्वर पाप कर्ना स्वर्गदूतन समेत बाँकी नैरख्ल। उहाँ हुँकन नरकम फाँकदेल। हुँक्र न्याय हुइना दिन सम्मक लाग पातालक अन्धकारम बाहान्गैल् बाट। 5अघट्टे नोअक समयम परमेश्वर संसारभरिक अटेरी मनैन समेत बाँकी नैरख्ल, तर हुँकन जलप्रलय कराक नाश कैदेल। परमेश्वरक धार्मिक न्यायक बारेम नोआ हुँकन चेताउनी देल। उहओर्से परमेश्वर जलप्रलय कराक संसारह नाश करबेर नोअह ओ हुँकहार घरक और सातजहन बचैल।#उत ६:१–७:२४ 6परमेश्वर सदोम ओ गमोरा सहरह भस्म पार्क हुँकन्हक नाउँ निशान मेटादेल। परमेश्वरह नैमन्ना मनैन्हक गति कसिन हुइठा कैक उहाँ हुँकन एकठो उदाहरण बनादेल।#उत १९:२४ 7तर परमेश्वर सदोममसे लोतह बचैल, काकरकि ऊ धर्मी रलह। ऊ छाडा मनैन्हक घिनलग्टिक चालचलनक कारण हुक्क होरलह।#उत १९:१-१६ 8ऊ दुष्ट मनैन्हक समाजम रहँट्, ओ हुँकन्हक करल कुकर्म हरेक दिन देख्क ओ सुन्क व्याकुल हुइँट्, काकरकि ऊ धर्मी रलह। 9असिक असल मनैन आपत्विपत्मसे कसिक बचैना ओ दुष्ट मनैन दण्ड देटी न्यायक दिनसम कसिक बहन्लरना कना बात प्रभु जन्ठ।#२:९ यी वाक्यक अर्थ असिक फे लाग सेकी: दुष्ट मनैन दण्ड देहक लाग न्यायक दिनसम कसिक बहन्लरना कना बात प्रभु जन्ठ। 10ओसिक दण्ड पैना मनै खासकैक घिनलग्टिक छाडा काम कर्ना ओ परमेश्वरक अधिकार इन्कार कर्ना मनै हुइट।
यी झूटा शिक्षकहुँक्र कठोर ओ घमण्डी रठ, ओ स्वर्गीय प्राणीन्हक अपमान कर्ना फे डर नैमन्ट। 11हुइना त स्वर्गदूतहुँक्र शक्ति ओ सामर्थ्यम झूटा शिक्षकहुँकनसे महान बाट, तर फे हुँक्र प्रभुक आघ स्वर्गीय प्राणिन दोष लगैटी अपमान नैकर्ट। 12तर यी झूटा शिक्षकहुँक्र त विवेक नैरहल जनावरअस बाट, हुँक्र आपन स्वभावक इच्छक कब्जम रठ, हुँक्र मार्क मुवापाइक लाग जन्मल् जङ्गली जनावरअस हुइट। हुँक्र आपन नैबुझल बातक निन्दा कर्ठ, ओ जनावरअस नाश हुउइया बाट।
13औरजहन दुःख देलक कारण हुँकन अपन्हे फे दुःख भ्वाग परहीन। दिनऽक भोगविलासम मस्त रना हुँकन्हक लाग आनन्दक बात हुइटन। हुँक्र टुन्हकसँग खानपिन करबेर समेत छलकपट कर्ठ। यी त कत्रा लाजलग्टिक ओ घिनलग्टिक बात हो। 14हुँक्र जौन जन्नीमनैयह देख्ना ओइहेसे व्यभिचार कर खोज्ठ, ओ जत्रा पाप कर्लसे फे नैअघैट। हुँक्र कमजोर मनैन फँसाडर्ठ। ल्वाभ कर्नाम त हुँक्र ढिट्गर रठ। हुँक्र सराप परल मनै हुइट। 15हुँक्र सत्य डगर छोर्क बओरक छावा बालामक देखासिकी कर भिररल। बालाम त खराब काम कैक पैँसा कमैना दाउम रलह। 16तर ऊ आपन पाप कामक कारण हप्कावापैल। ब्वाल नैसेक्ना एकठो गधा मनैन्हक बोली बोल्क ऊ अगमवक्तक होस हेराइल कामसे हुँकहीन रोक्लहन।#गन्ती २२:४-३५
17असिन मनै त सुखल मुहान हुइट, आँधीबौखले उराजैना बद्री हुइट। हुँकन्हक लाग पातालक अन्धकार साँचल बाटन। 18हुँक्र घमण्डी ओ मूर्ख गफ लगैठ, ओ शरीरह लोभैना काम देखाक गलत जीवनशैलीमसे हालसालऽ उम्कल मनैन फेदोस्र फँसैठ। 19हुँक्र औरजहन, “हम्र टुँहन पूरा स्वतन्त्र करैबी” कना त कठ, तर हुँक्र अपन्हे पाप ओ भ्रष्ट बातक कमारा हुइट। काकरकि मनै जौन चिजिक कब्जम पर्ठ, हुँक्र उह चिजिक कमारा हुइठ। 20जब मनै हमार प्रभु ओ मुक्ति देहुइया येशू ख्रीष्टह चिन्ह्ठ, तब हुँक्र संसारक घिनलग्टिक चालचलनमसे उम्कठ। तर यदि हुँक्र फेदोस्र पापम फँसगैल ओ वाकर कब्जम पर्ल कलसे, हुँकन्हक गति पैल्हकसे झन् खराब होजैठन। 21परमेश्वरक धार्मिकतक बात जानजानक फे पवित्र जीवन जिना आज्ञह इन्कार करलसे त, हुँक्र उ बात कबु नैजन्ट कलसे, हुँकन्हक लाग मजा हुइनेरलहन। 22यी उखान हुँकन्हकम ठ्याक्क मिल्ठन, “कुक्कुर घुम्क आक आपन उल्टी खैठ” ओ “लहादेलक सुवर फेदोस्र हिलम लोट्ठ।”#हितो २६:११
Currently Selected:
२ पत्रुस 2: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
