१ तिमोथी 2

आराधना कर्ना बारेम शिक्षा

1आब सबसे पैल्‍ह मै कहटुँ, कि सारा मनैन्‍हक लाग बिन्‍तीभाउ, प्रार्थना, अन्‍तरबिन्‍ती ओ धन्यवाद परमेश्‍वरह चह्रैना काम करपर्ठा। 2राजा ओ सरकारक मनैन्‍हक लाग फे प्रार्थना करो, तब हम्र परमेश्‍वरक आराधना ओ आदर कर्टी सुखशान्‍तिम जीवन बिताइ पैबी। 3असिक प्रार्थना कर्ना मजा हो ओ हमन मुक्ति देना परमेश्‍वर फे यिह मन परैठ। 4परमेश्‍वर सारा मनै मुक्ति पाइल ओ सत्‍य बात बुझल चहठ। 5काकरकि परमेश्‍वर एकठो केल बाट ओ परमेश्‍वरक ओ मनैन्‍हक बीचम मध्‍यस्‍थकर्ता फे एकठो केल बाट। उ मनैया ख्रीष्‍ट येशू हुइट। 6उहाँ सबजहन छुट्‌कारा देना म्‍वाल तिरक लाग अपन्‍हेह बलिदानक रूपम देल। परमेश्‍वर यी गवाही संसारह ठीक समयम देल। 7यिह बातक प्रचार करक लाग परमेश्‍वर महीह एकठो प्रचारक ओ प्रेरित हुइक लाग रोज्‍लह। गैरयहूदीहुँक्र येशूम विश्‍वास करहीँ कना उद्देश्‍यले हुँकन सत्‍य बात सिखाइक लाग उहाँ महीह पठैलह। मै बढाइचढाइ नैकरठुइटुँ, सत्‍य बात केल कहटुँ।#२ तिमो १:११

8आराधना कर्ना हरेक ठाउँम, पुरुषहुँक्र रिस ओ वादविवाद बिना कर्ल आपन पवित्र हाँठ स्‍वर्गओर उठाक प्रार्थना करल मै चहठुँ।

9ओसहेँक महिलाहुँक्र फे सिदासादा पहिरणम रहल मै चहठुँ। हुँक्र सुहैना हिसाबले लुगा लगाइपर्ठा, ठिस पार्क झोँटी पर्ना, स्‍वान, मोतीक गरगहना ओ दामी-दामी लुगा लगाक अपन्‍हेह आकर्षित नैपारपरट्‍।#१ पत्र ३:३ 10तर असल कामले अपन्‍हेह सँप्राइपर्ठा। यिहिँले परमेश्‍वरक भक्ति कर्ठुं कना महिलाहुँकन सुहावन बनैठा।

11महिलाहुँक्र अधीनम रह्‍क चूपचाप सिखपर्ठा। 12महिलाहुँक्र पुरुषहुँकन सिखैना ओ अधिकार जमैना बातम मै अनुमति नैदेटुँ। हुँक्र चूप रहपर्ठा। 13काकरकि परमेश्‍वर पैल्‍ह आदमह बनैलह, तबदोस्र हव्‍वह बनैलह।#उत २:७,२१-२२ 14शैतानक छलम आदम नैपर्ल, तर छलम पर्क परमेश्‍वरक आज्ञा भङ्‌ग करुइया त हव्‍वा जो रलही।#उत ३:१-६ 15तर फे, यदि महिलाहुँक्र नम्र होक विश्‍वासम, प्रेमम ओ पवित्रताम पलरह्‍हीँ कलसे, लर्का जन्‍माइबेर हुँक्र मुक्ति पैहीँ।#२:१५ सायद यी पद उत्‍पत्ति ३:१५ से सम्‍बन्‍धित बा। हव्‍वा त सारा मानव जातिन्‍हक (येशू ख्रीष्‍टक समेत) डाई रलही (उत्‍पत्ति ३:१५)। उह येशूद्वारा सारा मनैन्‍हक लाग मुक्ति आइल्। उहाँ कलबरीक क्रूसम शैतान, पाप ओ मृत्‍युह नाश पर्ल।

Currently Selected:

१ तिमोथी 2: thl

Highlight

Copy

Compare