१ तिमोथी 1

1हमन मुक्ति देना परमेश्‍वर ओ आशा देना ख्रीष्‍ट येशूक आज्ञा अनुसार नियुक्त हुइल् मै पावल, ख्रीष्‍ट येशूक प्रेरित, यी चिठी 2म्‍वार साँचो आत्‍मिकी छावा तिमोथीह लिखटुँ। परमेश्‍वर बाबा ओ हमार प्रभु ख्रीष्‍ट येशू टुँहीन अनुग्रह, दया ओ शान्‍ति देहीँ।#प्रे १६:१

झूटा शिक्षासे होसियार रहपर्ना बात

3मै माकेडोनिया जाइबेर टुँहीन एफिसस सहरम रहक लाग कनहुँ ओ आब फेदोस्र कहटुँ, कि टुँ उहँ पलरहो ओ झूट शिक्षा सिखैना मनैन कर्रा आज्ञा देओ। 4हुँक्र अर्थनाबर्थक बट्‌कोहीम ओ कबु नैओरैना वंशावलीम जिन अलमलैहीँ कैक हुँकन आज्ञा देओ। ओसिन बातले वादविवाद केल अनैठा, ओ परमेश्‍वरम विश्‍वास कर्लक जीवन जियक लाग किहुह कुछु सहायता नैकरट्‍। 5म्‍वार देहल निर्देशनक उद्देश्‍य त सब विश्‍वासीहुँक्र प्रेम करहीँ कना हो, जौन प्रेम शुद्ध हृदय, असल विवेक ओ सक्‍कली विश्‍वाससे उत्‍पन्‍न हुइठा। 6तर कत्रा जन यी सब बात छोर्क फोगट्‌या गफम अलमलाइल बाट। 7हुइना त हुँक्र मोशक व्‍यवस्‍था सिखैना गुरु हुइखोज्‍ठ, तर हुँक्र अप्‍न खूब जन्‍नाहाअसक कर्लसे फे, आपन बट्‌वाइल बात अपन्‍हे नैजन्‍ट।

8ठीकसे चलैलसे व्‍यवस्‍था असल हो कना बात हमन थाहाँ बा। 9हमन यी फे थाहाँ बा, कि व्‍यवस्‍था असल मनैयक लाग बनल नैहो, तर कानून उल्‍लङ्‍घन करुइयन्‍हक लाग ओ अपराधीन्‍हक लाग, परमेश्‍वरह नैमनुइयन्‍हक लाग ओ पापीन्‍हक लाग, दुष्‍ट ओ अधर्मीन्‍हक लाग, आपन डाई-बाबक हत्‍या करुइयन्‍हक लाग, औरजन्‍हक हत्‍या करुइयन्‍हक लाग बनल हो। 10अत्र केल नैहोक, व्‍यवस्‍था त व्‍यभिचारीन्‍हक लाग, समलिङ्‌गीन्‍हक लाग, मानव बेचबिखन करुयन्‍हक लाग, झूट बोलुइयन्‍हक लाग, झूट किरिया खउइयन्‍हक लाग, ओ सत्‍य सिद्धान्‍तक विरोधम हुइना और कौनो कामक लाग फे बनल हो। 11सत्‍य सिद्धान्‍त यिह हो, जौन परमधन्य परमेश्‍वर महीह सुम्‍पलक महिमित खुशीक खबर अनुसार बा।

पावलह प्रभुक अनुग्रह

12म्‍वार कामम महीह बल देना हमार प्रभु ख्रीष्‍ट येशूह मै धन्यवाद देठुँ। उहाँ महीह विश्‍वास कैक जो आपन कामम लगैलह। 13हुइना त मै पैल्‍ह प्रभुक अनादर कर्नु ओ एक्‍को फे दया नैकैक उहाँक मनैन सतैनु, तर परमेश्‍वर महीह दया कर्ल, काकरकि उ ब्‍याला मै विश्‍वास नैकर्लरनहुँ ओ यी सब काम मै अनजानम कर्नहुँ।#प्रे ८:३; ९:४-५ 14ओ हमार प्रभु ख्रीष्‍ट येशू अत्रा अनुग्रही रलह, कि उहाँ महीह विश्‍वास ओ प्रेमले भरिपूर्ण बनैल। 15यी सत्‍य वचन हो, ओ सबजन यहीह स्‍वीकार करपर्ठा: ख्रीष्‍ट येशू पापी मनैन बँचाए जो यी संसारम अइलह। ओ सबसे पापी मै हुइटुँ। 16तर मै सबसे पापी रलसे फे परमेश्‍वर महीह दया कर्ल ओ ख्रीष्‍ट येशू महीह महान धैर्य देखैलक एकठो उदाहरण महीह हुइदेल। और जन फे ख्रीष्‍टम विश्‍वास करहीँ ओ अनन्‍त जीवन पैहीँ कैक उहाँ यी काम कर्ल। 17परमेश्‍वरह सारा आदर ओ महिमा सड्‌डभर ह्‍वाए। उहाँ अनन्‍तकालसम रना राजा हुइट, जे कबु नैमुट, ओ नैदेखपर्ट। उहाँ केल परमेश्‍वर हुइट। आमेन।

18म्‍वार छावा तिमोथी, टुँहार बारेम पैल्‍हहेँ कैगिल् अगमवाणी अनुसार मै टुँहीन यी निर्देशन देहटुँ। यदि टुँ यी निर्देशन पालन कर्बो कलसे, प्रभुक युद्धम टुँ मजासे लडाइँ कर सेक्‍बो। 19विश्‍वासयोग्य होओ ओ असल विवेक कायम करो। कुई-कुई मनै विवेक अनुसार नैचल्‍लक कारण आपन विश्‍वास गुमाडर्ल। 20हुँक्रमध्‍ये दुइ जन त हुमेनियस ओ अलेक्‍जेन्‍डर हुइट। हुँक्र परमेश्‍वरक बदनाम कर छोरहीँ कैक मै हुँकन शैतानक हाँठम सुम्‍पदेरख्‍नु।

Currently Selected:

१ तिमोथी 1: thl

Highlight

Copy

Compare