१ थेसलोनिकी 3
3
तिमोथीह थेसलोनिकम पठैलक
1आखिरम हम्र टुँहनसे दूर होक रह नैस्याकलग्ली त, एथेन्सम सिलास ओ मै रना विचार कर्ली,#प्रे १७:१५ 2ओ तिमोथीहजुन टुन्हकठे पठैली। ऊ हमार भैया हुइट ओ परमेश्वरक सेवकक् रूपम ख्रीष्टक बारेम खुशीक खबर प्रचार कर्ठ। हम्र टुँहन विश्वासम बलगर कराइक लाग ओ हौसला देहक लाग हुँकहीन पठैलही। 3दुःख पैलकम टुह्र कुई फे हरेस जिन खैहो कना हमार चाहना रह। दुःख त हम्र विश्वासीन्हक जीवनम अइबोकर्ठा कना बात टुह्र जन्लबाटो। 4काकरकि टुन्हकसँग रहल समयम हम्र सबजन दुःख पउइयबाटी कैक घरीघरी कलही। हमार कहल बात ठ्याक्क लागल। यी त टुँहन थाहाँ बा। 5उहओर्से, मै एक्को रह नैस्याक लग्नु त, टुह्र विश्वासम बलगर पलबाटो कि नाहीँ कैक बुझक लाग मै तिमोथीह टुन्हकठे पठैनहुँ। परीक्षा करुइया शैतान कहोँ टुँहन फे फँसाक हमार परिश्रम खर्बास कैदेहल कि कैक मै डरारनहुँ।
तिमोथीक आनल उत्साहजनक खबर
6तर आब त तिमोथी टुन्हकठेसे घुम्क यिहाँ आरल ओ टुन्हक विश्वास ओ प्रेमक बारेम खुशीक खबर हमन सुनैल। टुह्र हमन सड्ड प्रेमसे सम्झठो, ओ हम्र टुँहन भेँट्ना धेर चाहना करलअस टुह्र फे हमन भेँट्ना धेर चाहना कर्लबाटो कना खबर ऊ देल।#प्रे १८:५ 7उहओर्से, हेरो भैयौ, टुन्हक विश्वासक खबर सुन्क हम्र आपन सारा दुःखकष्टम फे हौसला पारख्ली। 8काकरकि टुह्र प्रभुम स्थिर बाटो कैक हम्र सुन्ली त, हमन लौव जीवन पाइलअस लागल। 9टुन्हक लाग हम्र परमेश्वरह जत्रा धन्यवाद देलसे फे नैपुगट! टुन्हक कारणले हम्र परमेश्वरक सामुन्ने धेर आनन्दक अनुभव कर्ठी। 10टुँहनसे फेदोस्र भ्याँट कैक टुँहन आकुर सिकाइसेकी ताकि टुन्हक विश्वासम ज्या-ज्या बातक कमी बा, उ पूरा हुई कना उद्देश्यले हम्र रातदिन जोड्दार प्रार्थना कर्ठी।
11आब हमार परमेश्वर ओ बाबा अपन्हे ओ हमार प्रभु येशू हम्र टुन्हकठे जैना डगर हमार लाग बनादेहीँ, 12ओ जौन हिसाबले हम्र टुँहन प्रेम कर्ठी, उह हिसाबले प्रभु टुँहन एक-आपसम ओ सबजहनसे प्रेमम झन्-झन् बह्रैटीरहीँ ओ भर्क फल्कना बनैहीँ कना हमार प्रार्थना बा। 13उह प्रेमले टुन्हक मन अडिग हुई ताकि जब हमार प्रभु येशू आपन सारा पवित्र मनैन्हकसँग फेदोस्र अइहीँ, तब टुह्र हमार परमेश्वर ओ बाबक सामुन्ने निर्दोष ओ पवित्र हुइबो कना हमार प्रार्थना बा।
Currently Selected:
१ थेसलोनिकी 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
