१ थेसलोनिकी 4
4
ख्रीष्टियन जीवनक बारेम
1आखिरम, हेरो भैयौ, टुन्हक जीवन झन्-झन् असल हुइटीजाए कैक प्रभु येशूक नाउँम हमार जोड्दार बिन्ती बा। परमेश्वरह मनपर्ना हिसाबले कसिक जिएपर्ठा कैक हम्र टुँहन सिखारख्ली, ओ हमार सिखाइलअस टुह्र जिटी फे बाटो। 2काकरकि हम्र प्रभु येशूसे पाइल अधिकारले टुँहन देहल निर्देशन टुह्र जन्लबाटो। 3परमेश्वर टुह्र पवित्र हुइल् चहठ, उहओर्से व्यभिचारसे अलग रहो। 4पवित्र ओ आदरणीय तरिकाले आपन गोसिन्यसे जीवन बितैना बात हरेक व्यक्ति जानपर्ठा।#४:४ ग्रीक भाषक स्रोतमसे यी पदह अनुवाद कर्ना और सम्भावित तरिका: पवित्र ओ आदरणीय तरिकाले आपन शरीरह अधीन कर्ना बात हरेक व्यक्ति जानपर्ठा। 5परमेश्वरह नैचिन्हल मनैन्हकअस कामवासनक खराब विचार जिन करो। 6असिन खराब काम कैक कुई फे विश्वासीकमसे नाजायज फाइदा जिन लुटहो। परमेश्वर असिक करुइयनसे बद्ला लेठ। हम्र यी बातक बारेम टुँहन पैल्हहेँ गम्भीर चेताउनी देरख्ली। 7काकरकि परमेश्वर हमन अपवित्र नाहीँ, तर पवित्र जीवन बिताइक लाग बलैलह। 8उहओर्से यी निर्देशनह इन्कार करुइयन, मनैन नाहीँ, परमेश्वरह इन्कार कर्ठ, जौन परमेश्वर आपन पवित्र आत्मा टुँहन देठ।
9एक-आपसम प्रेम कर्ना बारेम टुँहन लिखपर्ना आवश्यक नैहो, काकरकि एक-आपसम प्रेम करपर्ठा कैक त टुह्र परमेश्वरसे सिखरख्लो। 10वास्तवम, टुह्र सारा माकेडोनियक विश्वासीहुँकन प्रेम कर्ठो। तर फे, हेरो भैयौ, आकुर धेर प्रेम कर्टीजाओ कैक हम्र टुँहनसे बिन्ती करटी। 11हम्र टुँहन पैल्हहेँ देहल निर्देशन अनुसार, शान्त जीवन बितैना, आपन-आपन कामम ध्यान देना, ओ आपनऽ हाँठले कमैना धेर से धेर कोसिस करो। 12यदि टुह्र असिक कर्बो कलसे, ख्रीष्टम विश्वास नैकरुइयन फे टुन्हक आदर करहीँ, ओ टुँहन केक्रोम फे भर पर नैपरी।
येशू ख्रीष्टक आगमनक बारेम
13हेरो भैयौ, मुस्याकल विश्वासीन का हुहीन् कना बारेम टुह्र बात बुझल हम्र चहठी, ताकि टुँहन आशा नैरना मनैन्हकअस शोक कर नैपरी। 14काकरकि हम्र येशू मुल ओ फेदोस्र जियागैल कैक विश्वास कर्ठी, ओ येशू फेदोस्र अइहीँ त, मुनासे आघ येशूम विश्वास करल मनैन परमेश्वर फेदोस्र जियादेहुइयाबाट ओ उहाँकसँग अनुइयाबाट। 15प्रभुक देहल वचन हम्र टुँहन देठी, कि प्रभु फेदोस्र अइना दिनसम हम्र जिटीह रहुइयन उ मुवल मनैनसे आघ उहाँह नैभेटैनेहुइटी।#१ कोर १५:५१-५२ 16काकरकि प्रभु अपन्हे हुकुम गुञ्ज्रटी स्वर्गसे अउइयाबाट। उह समयम मुख्य स्वर्गदूतक बरा आवाज अउइया बा ओ परमेश्वरक तुरही बजैलक आवाज सुन्जउइया बा। ख्रीष्टम विश्वास कैक मुवुइयन सबसे आघ जियाजउइयाबाट। 17तब हुँकन्हक सँगसँग प्रभुह आकाशम भेटाइक लाग हम्र जिटीह रहुइयन बद्रीम उठाजउइयाबाटी। असिक हम्र सड्डभर प्रभुकसँग रहुइयाबाटी। 18उहओर्से यी वचनले एक-औरजहन हौसला देटिरहो।
Currently Selected:
१ थेसलोनिकी 4: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
