१ थेसलोनिकी 2
2
थेसलोनिकम पावलक सेवा
1हेरो भैयौ, टुन्हकठे हमार करल भेटघाट बिनकामक नैरह कैक त टुह्र अपन्हे जन्लबाटो। 2टुन्हकठे जैनासे आघ हम्र फिलिप्पी सहरम दुःख पैलक ओ अपमानित हुइलक बात फे टुँहन थाहाँ बा। तर धेर विरोध हुइटी-हुइटी फे हम्र टुँहन खुशीक खबर प्रचार करक लाग परमेश्वरसे धेर साहस पैली।#प्रे १६:१९-२४; १७:१-९
3काकरकि हमार देहल अर्तीउपदेशम गल्ती बात, खराब विचार या कुछु छलकपट नैरह। 4तर परमेश्वर हमन योग्य मान्क त खुशीक खबर प्रचार कर्ना जिम्मा देलह। उहओर्से हम्र मनैन खुशी बनाइक लाग नाहीँ तर हमार मनक जाँच करुइया परमेश्वरह खुशी बनाइक लाग बोल्ठी। 5हम्र टुन्हकठे कुछु चापलुसी बात नैबटोइली कैक टुह्र जन्लबाटो। कुछु पैना ल्वाभले हम्र टुन्हक लग्घक मनै हुइ नैखोज्ली कना बातक साक्षी त परमेश्वर पलबाट। 6हम्र मनैनसे आदर नैखोज्ली, ना त टुँहनसे, ना और कौनोजहनसे। हुइना त ख्रीष्टक प्रेरित हुइलकओर्से हम्र टुन्हकम आपन अधिकार प्रयोग कर सेक्नेरलही, 7तर लर्कोर्या डाई आपन लर्कक् वास्ता करअस हम्र टुँहनसे नम्र व्यवहार कर्ली। 8हम्र टुँहन धेर प्रेम कर्ली। उहओर्से हम्र आनन्दित होक टुँहन परमेश्वरक खुशीक खबर प्रचार केल नैकर्ली, तर टुह्र हमार लाग अत्रा प्रिय होरलहो, कि हम्र आपन प्राणसमेत देहक लाग तयार रलही।
9हेरो भैयौ, हम्र टुँहन परमेश्वरक खुशीक खबर प्रचार करबेर किहुह फे भार नैपारी, तर आपन खर्च अपन्हे कमाइ कैक रातदिन खट्क काम कर्लक बात त टुह्र सम्झलबाटो।
10टुह्र विश्वासीन्हकठे रहल समयम हमार व्यवहार स्वच्छ, ठीक ओ निर्दोष रह। यी बातक साक्षी परमेश्वर ओ टुह्र अपन्हे बाटो। 11ओ डाई-बाबा आपन छाई-छावनसे करअस, हम्र टुह्र हरेकजहनसे व्यवहार कर्ली। यी बात टुँहन थाहँ बा। 12टुन्हक चालचलन परमेश्वरक नजरम योग्य ह्वाए कना उद्देश्यले हम्र टुँहन अर्तीउपदेश, उत्साह, ओ आदेश देटीरली। काकरकि परमेश्वर आपन राज्य ओ महिमम टुँहन सहभागी हुइक लाग बलैठ।
13ओ हम्र परमेश्वरह धन्यवाद चह्रैटीरठी, काकरकि हम्र टुँहन परमेश्वरक वचन सुनैली त, टुह्र उ वचनह मनैन्हक वचनअस नाहीँ, तर जाट्टीसे परमेश्वरक वचन मान्क स्वीकार कर्लो। हुइना फे उ परमेश्वरकऽ वचन हो, ओ उ वचन टुह्र विश्वास करुइयन्हक जीवनम काम कर्टिरठा।
14यी बात हमन थाहाँ बा, हेरो भैयौ, काकरकि टुन्हकम जौन बात परिआइल उह बात यहूदिया क्षेत्रम रहल परमेश्वरक मण्डलीम अर्थात् ख्रीष्ट येशूम विश्वास करल मनैन्हकम परिअइलन। हुँक्र आपनऽ जाति यहूदीनसे सँतावा पैलह, ओ ओसहँक, टुह्र फे आपनऽ जातिक मनैनसे सँतावा पैलो।#प्रे १७:५ 15उह यहूदी जातिक मनै अगमवक्तन मुवैलह। प्रभु येशूह मुउइयन ओ हमन सँतुइयन फे हुँक्रहे हुइट। हुँक्र परमेश्वरह मन नैपर्ना काम कर्ठ ओ सारा मनैन्हक विरोधीअस बाट।#प्रे ९:२३,२९; १३:४५,५०; १४:२,५,१९; १७:५,१३; १८:१२ 16गैरयहूदीहुँकन मुक्तिक सन्देश सुनैना हमार कामम हुँक्र बाधा पुगैल। असिक हुँक्र टिस्लहार हुइट्सम आपन पापक उप्पर पाप थप्टीरठ। तर आखिरम परमेश्वरक रिस हुँकन्हकम पररलन।
थेसलोनिका जैना पावलक इच्छा
17हेरो भैयौ, हमन एक घरिक लाग टुँहनसे दूर हुइ परल, तर फे हमार मन त टुन्हक्केसँग बा। टुँहन आमने-सामने देख्ना हमार एकदम धेर चाहना रलकओर्से हम्र टुन्हकठे जाइक लाग स्याकलसम कोसिस कर्ली। 18हम्र त टुन्हकठे जाइक लाग रलही, वास्तवम मै पावल झन् घरीघरी कोसिस कर्नु, तर शैतान हमन छेकदेहल। 19काकरकि जब हमार प्रभु येशू अइहीँ, तब आशा ओ आनन्द कर्ना, ओ मुकुट#२:१९ पावलक समयम असिन मुकुट विशेष किसिमक वनस्पतिले बनाजाए ओ खेलकुदम जितल मनैयह पुरस्कारक रूपम पहिराजाए। पैलकम गर्व कर्ना कारण का हुई? का यी टुह्रहे नैहुइटो? 20जाट्टीसे हमार गौरव ओ आनन्द टुह्रहे हुइटो।
Currently Selected:
१ थेसलोनिकी 2: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
