१ पत्रुस 2
2
1उहओर्से सारा खराब व्यवहार, सब छलछाम, कपट, डाहा ओ फुहर बोलीमसे मुक्त होओ। 2भक्खर जन्मलक लर्का शुद्ध दूधक चाहना करअस टुह्र सत्य वचनक चाहना करो। असिक टुह्र बहर्टीजैबो ओ मुक्ति पैबो। 3काकरकि प्रभु दयालु बाट कना बात टुह्र अनुभव कैरख्लो।#भज ३४:८
जीवित पत्थ्रा ओ पवित्र जाति
4ख्रीष्टकठे आओ, उहाँ परमेश्वरक मन्दिरक जीवित पत्थ्रा हुइट। मनै उहाँह काम नैलग्ना कैक इन्कार कर्ल, तर परमेश्वर उहाँह महान सम्मान देहक लाग रोज्ल। 5ओ टुह्र फे जिती पत्थ्रा हुइटो, परमेश्वर टुँहन प्रयोग कैक आपन आत्मिक मन्दिर बनैटीबाट। टुह्र येशू ख्रीष्टक सहायताले परमेश्वरह मनपर्ना आत्मिक बलिदान चह्रैना पवित्र पूजारी हुइटो। 6काकरकि धर्मशास्त्रम लिखल बा,
“हेरो, मै सियोनम#२:६ सियोन कलक यरूशलेमक और नाउँ हो। एकठो पत्थ्रा ढरटुँ,
जे बरा सम्मानक लाग रोजगैल् बाट।
उहाँकम विश्वास करुइया
कुई फे निराश हुइनेनैहो।”#यशै २८:१६
7टुह्र विश्वास करुइयन्हक लाग उहाँ बहुमूल्य बाट। तर विश्वास नैकर्ना मनैन्हक लाग उहाँ असिन बाट,
“घर बनुइयन रद्दी ठह्राक फाँकल पत्थ्रा त
कोनोक मुख्य पत्थ्रा बनल।”#भज ११८:२२
8ओ,
“उहाँ यिह पत्थ्रा हुइट,
उहिँम धेर जहन ठ्यास लगहिन,
उहाँ यिह चट्टान हुइट,
उहिँम मनै उस्टनेबाट।”#यशै ८:१४-१५
काकरकि परमेश्वरक वचनह विश्वास नैकरुइयन ठ्यास लग्ठन कैक तोकगैल् रह।
9तर टुह्र त परमेश्वरक र्वाजल मनै हुइटो। टुह्र राजकीय पूजारी, पवित्र जाति, परमेश्वरक आपन मनै हुइटो। उहाँ टुँहन अन्धकारमसे अचम्मक अजरारम अन्ल। आब टुह्र उहाँक करल अचम्मक कामक बयान औरजन्हकठे करपर्ठा।#प्रस १९:५-६; यशै ४३:२०-२१; व्य ४:२०; ७:६; १४:२; तीत २:१४; यशै ९:२ 10पैल्ह टुह्र परमेश्वरक आपन मनै नैरलहो, तर आब परमेश्वरक आपन मनै होरलो। पैल्ह टुह्र परमेश्वरक दया नैपैलरलहो, तर आब परमेश्वरक दया पारख्लो।#होशे २:२३
11प्रियहुँक्र, यी संसारम टुह्र विदेशी ओ परदेशीअस बाटो। उहओर्से मै टुँहन का बिन्ती करटुँ, कि आपन स्वार्थी चाहना पूरा कर्ना कामम जिन लागो। असिन चाहना टुन्हक आत्मक विरोधम युद्ध कर्ठा। 12गैरयहूदी मनैन्हक बीचम टुन्हक चालचलन असल हुइपर्ठा। हुँक्र टुँहन “खराब काम करुइयन” कैक दोष लगैलसे फे हुँक्र टुन्हक करल असल काम देखहीँ, ओ परमेश्वर न्याय कर अइना दिनम हुँक्र उहाँक महिमा करहीँ।
सरकारी अधिकारीन्हक अधीनम रना
13प्रभुक आदरक लाग सब सरकारी अधिकारीन्हक अधीनम रहो। सबसे उच्च राजक अधीनम, 14ओ हाकिमन्हक अधीनम फे रहो। हुँक्र खराब काम करुइयन दण्ड देहक लाग ओ असल काम करुइयन प्रशंसा करक लाग राजक खटाइल मनै हुइट। 15हुइना त मूर्ख मनै टुँहन दोष लगाइक लाग बात बिना बुझ्ल ब्वालसेक्ठ। तर परमेश्वरक इच्छा का बाटन कलसे, टुन्हक करल असल कामले हुँकन्हक बोलीह चूप लगाइपर्ठा। 16टुह्र स्वतन्त्र रलसे फे परमेश्वरक कमारन हुइटो। उहओर्से आपन स्वतन्त्रतह खराब कामक लाग प्रयोग जिन करो। 17सब मनैन आदर करो। ख्रीष्टम विश्वास कर्ना दादुभैयन प्रेम करो। परमेश्वरक डर डराओ। राजक मान करो।
कमारन्हक काम
18कमाराहुँक्र, सारा आदरसहित आपन मालिकन्हक अधीनम रहो। टुन्हक भलो चितैना ओ दया कर्ना मालिकन्हक केल नाहीँ, तर खट्ठाहा मालिकन्हक अधीनम फे रहो। 19यदि परमेश्वरह समझ्क टुह्र ठीक काम कर्लो ओ धीरजी होक अन्याय फे सहलो कलसे, परमेश्वर टुँहनसे खुशी हुइठ। 20यदि कुई खराब काम कैक चूपचाप दण्ड भ्वागल कलसे, ऊ कहाँसे स्याबासी पाई? तर यदि कुई असल काम कर्टीकर्टी फे चूपचाप दण्ड भ्वागल कलसे, परमेश्वर ओहीसे खुशी हुइठ। 21काकरकि दुःख हुइलसे फे टुह्र भलाइक काम कर्टीरहपर्ठा कैक परमेश्वर टुँहन रोज्लह। ख्रीष्ट फे टुन्हक लाग दुःख भोग्लह, ओ उहाँ एकठो उदाहरण होरल। आब टुह्र उहाँक देखाइल डगरम चलपर्ठा।
22उहाँ ना त कबु पाप कर्ल,
ना त छलकपटक बात बटोइल।#यशै ५३:९
23उहाँ आपन अपमान हुइबेर बद्ला नैलेल, दुःख भ्वागबेर धम्की नैदेल, तर ठीक न्याय कर्ना परमेश्वरम भर पर्ल।#यशै ५३:७ 24हम्र पापक लाग मुव सेकी ओ असल कामक लाग जिय सेकी कैक ख्रीष्ट आपन शरीरम हमार पाप बोक्क क्रूसम मुल। उहाँह लागल च्वाटले टुह्र चोखारलो।#यशै ५३:५ 25टुह्र हेराइल भेँरीअस रलहो, तर आब टुह्र येशूकठे घुम्क आरलो। गोठाला भेँरीन्हक रक्षा करअस उहाँ टुन्हक रक्षा कर्ठ।#यशै ५३:६
Currently Selected:
१ पत्रुस 2: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
