१ पत्रुस 1
1
1येशू ख्रीष्टक प्रेरित मै पत्रुस यी चिठी लिखटुँ। टुह्र पोन्टस, गलातिया, कापाडोकिया, एशिया ओ बिथिनिया क्षेत्रम परदेशीअस तितरबितर हुइल् परमेश्वरक र्वाजल मनैन यी चिठी पठाइटुँ। 2परमेश्वर बाबा आपन आघहेँक योजना अनुसार टुँहन रोज्ल, ओ उहाँक आत्मले टुँहन पवित्र बनारख्ल। उहओर्से टुह्र येशू ख्रीष्टक आज्ञापालन कर्लो ओ उहाँक रगतले शुद्ध हुइलो। परमेश्वर टुँहन धेर से धेर अनुग्रह करहीँ ओ शान्ति देहीँ।
जिती आशा
3हमार प्रभु येशू ख्रीष्टक परमेश्वर ओ बाबक प्रशंसा ह्वाए। येशू ख्रीष्टह मुवलमसे फेदोस्र जियाक उहाँ आपन महान दयाले हमन लौव जन्म देल। आब हम्र जीवित आशा पारख्ली। 4परमेश्वर हमार लाग कबु नाश नैहुइना, नैबिग्रना, नैबिलैना आशिष स्वर्गम साँचदेरख्ल। 5टुह्र विश्वास कर्लकओर्से परमेश्वर आपन शक्तिले टुँहन मुक्तिक लाग सुरक्षा कर्ठ। यी मुक्ति आखिरी समयम प्रकट हुउइया बा। 6यिह बातम टुह्र आनन्दित होओ। हुइना त, आब टुँहन कुछ समयक लाग विभिन्न किसिमक दुःख भ्वागपरटा। 7यी दुःखले टुन्हक विश्वास सक्कली हो कना बात देखुइयाबा। स्वान आगीले खार्क शुद्ध बनाजैठा, तर फे नाश हुइठा। टुन्हक विश्वास त स्वानसे धेर मूल्यवान बा, ओ ओहीह शुद्ध बनाइक लाग दुःखकष्टद्वारा वाकर जाँच हुइठा। उहओर्से धेर दुःखकष्ट सहक फे टुन्हक विश्वास बलगर पलरही कलसे, येशू ख्रीष्ट प्रकट हुइल् समयम टुह्र धेर प्रशंसा, सम्मान ओ इज्जत पैबो। 8टुह्र उहाँह कबु देख्ल नैहुइटो, ओ आब फे नैदेख्टो, तर फे टुह्र उहाँह प्रेम कर्ठो ओ उहाँकम भरोसा कर्ठो। बयान कर नैसेक्जिना गौरवमय खुशीले टुह्र आनन्दित बाटो, 9काकरकि उहाँकम विश्वास कर्लक कारण टुह्र आत्मक मुक्ति पैटीबाटो।
10टुन्हक लाग तयार पारगैल् यिह मुक्तिक बारेम अगमवक्ताहुँक्र खोजतलास कैक जान खोज्लह। परमेश्वर टुँहन देना अनुग्रहक बारेम हुँक्र आघहेँ बट्वारख्लह। 11जब हुँकन्हकम रहल ख्रीष्टक आत्मा ख्रीष्टह दुःख भ्वाग परहीन ओ पाछ उहाँ महान आदर पउइयाबाट कैक हुँकन आघहेँ देखादेल, तब हुँक्र यी बात कैह्या ओ कसिक हुई कैक जान खोज्ल। 12तब हुँक्र आपन नाहीँ, तर टुन्हक सेवा कर्टिरलह कना बात परमेश्वर हुँकन प्रकट कैदेल। अगमवक्तन्हक ब्वालल् वचन, आब स्वर्गसे पठागैल् पवित्र आत्मक शक्तिम खुशीक खबर प्रचार करुइयन टुँहन स्पष्ट रूपले सुनैल। यी सब बात बुझक लाग त स्वर्गदूतहुँक्र फे धेर चाहना कर्ठ।
पवित्र रहनसहन
13उहओर्से काम करक लाग आपन मन तयार पारो, ठीकसे विचार करो, ओ येशू ख्रीष्ट अइहीँ त पाजैना अनुग्रहम पूरा आशा करो। 14परमेश्वरक आज्ञाकारी सन्तान होक चलो, पैल्हक अन्जान अवस्थक खराब चाहना अनुसार जिन चलो। 15टुँहन रोजुइया परमेश्वर पवित्र रहलअस टुह्र फे आपन सब रहनसहनम पवित्र होओ। 16धर्मशास्त्रम लिखल बा, “पवित्र होओ, काकरकि मै पवित्र बाटुँ।”#लेवी ११:४४-४५; १९:२
17टुह्र परमेश्वरह बाबा कैक पुकारा कर्ठो, ओ उहाँ केक्रो पक्षपात नैकर्ट। उहाँ मनैन्हक करल काम अनुसार न्याय कर्ठ। उहओर्से पृथ्वीम परदेशीअस जियट्सम परमेश्वरक डरम रहक जीवन बिताओ। 18परमेश्वर म्वाल तिर्क टुन्हक पुर्खासे चल्तीआइल बेकार परम्परामसे टुँहन छुट्कारा देलह कना बात टुह्र जन्ठो। यी म्वाल स्वान या चाँदीजसिन नाश हुइना चिजले तिरल नैहो, 19तर ख्रीष्टक बहुमूल्य रगतले तिरल हो। उहाँ खोट या दाग नैरहल बलि हुइना पठ्रू रलह। 20परमेश्वर टुन्हक म्वाल तिरक लाग संसारक सृष्टि कर्नासे आघहेँ उहाँह रोज्लह, तर टुन्हक लाग यी आखिरी समयम उहाँह प्रकट करैल। 21ख्रीष्टद्वारा टुह्र परमेश्वरम भरोसा कैरख्लो। परमेश्वर उहाँह मृत्युमसे जीवित पर्ल ओ उहाँह महिमा देल। उहओर्से टुह्र परमेश्वरम विश्वास ओ आशा कैरख्लो।
22टुह्र सत्य बात पालन कैक आपन पापमसे शुद्ध हुइलो ओ आपन दादुभैयन पवित्र प्रेम कर्टिबाटो। आब आपन सारा हृदयले एक-औरजहन सक्कली प्रेम देखाओ। 23परमेश्वरक जीवित ओ सड्डभर रना वचनद्वारा टुह्र लौव जन्म पारख्लो। टुह्र नाश हुइना बाबक सन्तान नाहीँ, तर नाश नैहुइना बाबक सन्तान हुइटो। 24काकरकि धर्मशास्त्रम लिखल बा,
“सब मनै घाँसअसक बाट,
ओ हुँकन्हक गौरव फे घाँसक फूलाअस बा।
घाँस सुखजैठा, फूला झरजैठा,
25तर प्रभुक वचन सड्डभर पलरठा।”#यशै ४०:६-८
यिह वचन टुँहन प्रचार कैगिल् खुशीक खबर हो।
Currently Selected:
१ पत्रुस 1: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
