१ यूहन्ना 1
1
जीवन देहुइया वचन
1हम्र सुरुसे रहुइयक बारेम टुँहन प्रचार कर्ठी। हम्र उहाँक बात सुनरख्ली, उहाँह आपन आँखिले देखरख्ली, निहारक हेररख्ली, ओ हाँठले छुरख्ली। उहाँ मनैन जीवन देहुइया वचन हुइट।#यूह १:१ 2उ जीवन देहुइया प्रकट हुइल। हम्र उहाँह देखरख्ली ओ उहाँक बारेम साक्षी देठी, ओ उ अनन्त जीवनक बारेम टुँहन प्रचार कर्ठी। उहाँ सुरुसे परमेश्वर बाबकसँग रलह ओ हमारठे प्रकट हुइल।#यूह १:१४ 3हमारसँग टुन्हक सङ्गति हुइस्याक कैक हम्र आपन द्याखल सुनल व्यक्तिक बारेम टुँहन प्रचार कर्ठी। हमार सङ्गति त परमेश्वर बाबा ओ उहाँक छावा येशू ख्रीष्टकसँग बा। 4हमार धेर से धेर आनन्द हुइस्याक कैक हम्र यी बात लिखटी।
ज्योतिम नेङ्ग्ना ओ अन्धकारम नेङ्ग्ना
5हम्र उहाँसे सुनल सन्देश त टुँहन प्रचार कर्ठी। उ का हो कलसे परमेश्वर ज्योति हुइट, ओ उहाँकम एक्को फे अन्धार नैहो। 6यदि हम्र परमेश्वरसे हमार सङ्गति बा कने अन्धकारम नेङ्ग्ने कर्ठी कलसे, हम्र झूट बोल्ठी ओ सत्यम नैचल्टी। 7तर यदि उहाँ ज्योतिम रहलअस हम्र फे ज्योतिम नेङ्ग्ठी कलसे, हम्र एक-औरजहनसे सङ्गति कर्ठी, ओ उहाँक छावा येशूक रगत हमन सब पापमसे शुद्ध पर्ठा।
8यदि हम्र हमार मन पापी नैहो कठी कलसे, हम्र अपन्हेह ध्वाखा देठी ओ हमार मनम सत्य नैरहट्। 9तर यदि हम्र आपन पाप स्वीकार कर्ली कलसे, उहाँ हमार पाप क्षमा कैदेठ ओ हमन सब अधर्मसे शुद्ध पर्ठ, काकरकि उहाँ विश्वासयोग्य ओ न्यायी बाट। 10यदि हम्र पाप कर्ल नैहुइटी कठी कलसे, हम्र उहाँह झूट ठह्रैठी ओ हम्र उहाँक वचनह आपन जीवनम काम कर नैदेटी।
Currently Selected:
१ यूहन्ना 1: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
