२ पत्रुस 3
3
प्रभुक अइना दिन
1प्रियहुँक्र, टुँहन लिखल यी म्वार द्वासर चिठी हो। दुनु चिठीम मै कत्रा बातक सम्झना कराक टुँहन ठीक प्रकारले विचार करक लाग उत्साहित करैना कोसिस कैरख्नु। 2पवित्र अगमवक्तन्हक ब्वालल् वचन, ओ प्रेरितन्हक मार्फत मुक्ति देहुइया प्रभुक देहल आज्ञह टुह्र सम्झलरहपर्ठा।
3सबसे पैल्ह टुह्र बुझपर्ना बात का हो कलसे, आखिरी दिनम छाडा मनै आपन स्वार्थी चाहना बाहेक और कुछु फे नैसोँचुइया हुइट। हुँक्र टुँहन हियैटी कहहीँ,#यहू १८ 4“का टुन्हक प्रभु फेदोस्र अइम कैक प्रतिज्ञा नैकर्लह? पुर्खाओँ मुगैल, तर संसारक सृष्टिसे चल्तीआइल सब बात जस्तक तस्त पलिबा।” 5परमेश्वर आपन वचनले स्वर्ग ओ पृथ्वी सृष्टि कर्लह कना बात हुँक्र जानजान्क फे मतलब नैकर्ट। पृथ्वी पानीमसे ओ पानीद्वारा बनागैल्।#उत १:६-९ 6उह पानीले उ समयक संसार जलप्रलय होक नाश हुइल्।#उत ७:११ 7परमेश्वर उह वचनले न्याय हुइना दिन सम्मक लाग आबक आकाश ओ पृथ्वी साँचरख्ल। तबदोस्र उ आगीले भस्म पारजउइया बा, ओ अटेरी मनै नाश हुउइया बाट।
8तर प्रियहुँक्र, यी एकठो बात जिन बिस्रैहो, परमप्रभुक लाग एक दिन हजार वर्षअस ओ हजार वर्ष एक दिनअस हो।#भज ९०:४ 9कुई-कुई विचार करअस परमप्रभु आपन करल प्रतिज्ञा पूरा कर ढिल नैकर्ट। तर कुई नाश जिन ह्वाए, बेनसे सबजन आपन-आपन पापी मन परिवर्तन करहीँ कना इच्छा कैक अश्या लग्टिबाट।
10तर प्रभु न्याय कर्ना दिन त चोर्वा आइअस सुटुक्क अउइया बा। उ दिन सारा आकाश भारी आवाज सहित बिलाजउइया बा, दिन, जोन्ह्या लगायत सारा तोरैँया भस्म हुउइया बा, ओ सारा पृथ्वी ओ उहिँम रहल चिज सखाप हुउइया बा।#मत्ती २४:४३; लूक १२:३९; १ थेस ५:२; प्रका १६:१५
11हमार आसपासम रहल सारा चिज असिक नाश हुइना हुइलकओर्से, टुह्र कसिन मनै हुइपर्ना हो? टुन्हक जीवन पवित्र ओ परमेश्वरम समर्पित हुइपर्ठा। 12टुह्र परमेश्वर न्याय कर्ना दिनिक बट्या हेर्ठो, उ दिन झट्ट आए कैक करपर्ना काम पूरा करो। उह दिन सारा आकाश आगीले भस्म हुउइया बा, सारा चिज गलजउइयाबा। 13तर हम्र त परमेश्वरक प्रतिज्ञा करल लौव स्वर्ग ओ लौव पृथ्वीक बट्या हेर्ठी। उहाँ धर्मी मनै केल रठ।#यशै ६५:१७; ६६:२२; प्रका २१:१
14उहओर्से, प्रियहुँक्र, टुह्र यी बातक बट्या हेर्ना हुइलकओर्से परमेश्वरक नजरम शुद्ध ओ दाग नैरहल होक मेलमिलापम जिना कोसिस करो। 15प्रभु मनैन पापमसे मुक्ति पैना मौका देह चहठ, उहओर्से, उहाँ फेदोस्र आइक लाग हतार नैकर्लहुइट कना टुह्र जिन बिस्रैहो। हमार प्रिय भैया पावल फे परमेश्वरसे पाइल बुद्धि अनुसार यिह बात टुँहन लिख्लह। 16पावल आपन सब चिठीम अस्तहेँ बातक बारेम लिख्रख्ल। हुँकहार लिखल कौनो-कौनो बात बुझ्ना मुस्किल फे बा। बात नैबुझल मनै ओ दुइ मन रहल मनै वाकर उल्टा अर्थ लगैठ। हुँक्र धर्मशास्त्रक और खण्ड फे ओस्तहेँक अर्थ लगैठ। असिक हुँक्र आपनम अपन्हे विनाश अन्ठ।
17प्रियहुँक्र, टुह्र यी बात पैल्हहेँ जन्लकओर्से होसियार रहो। तब दुष्ट मनै टुँहन अलमलाई नैपैहीँ, ओ टुह्र अप्न अरगरक ठह्र्याइल ठाउँमसे नैखस्बो। 18तर हमार प्रभु ओ मुक्ति देहुइया येशू ख्रीष्टक अनुग्रह ओ ज्ञानम बहर्टीजाओ। उहाँह आब ओ सड्डभर महिमा ह्वाए। आमेन।
Currently Selected:
२ पत्रुस 3: thl
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
