Matthew 17

1Upluit 6sit nungungmata Jesusim Peter, James nukaalu John mallauqujain majuraqatigiquplugit maniilrumun kingiktumun. 2Tatpaani tapkunani Jesus aallanguqtitaujuq akuliangik qin'ngarnaqpiaqtutun hiqiniktun. Aannuraangillu qakuqtanguqtun qaumaniqtun. 3Aahiin tapkununga Moses, Elijahlu hakjaiktuk uqaqatigiplugu Jesus. 4Peterm Jesus uqallautijaa, “Ataniiq hamaniinnapta nakuuqpiaqtuq pijumaguvin tupiqtuqhungujunga pingahunik atauhirmik ilingnun. Atauhirmik Mosesmun. Atauhirmiglu Elijahmun.” 5Uqaqtillugulu, nuvujam qaumaum uliktain, nipilu nuvujamin tuharnaqhiuk uqaqtumik, “Una irnira nakuugijara akhun. Quviagijara; tamna tuhaahiuk.” 6Malirutaita tamna tuhaagamitku palluqhutik angatjujun iqhitakpiaqhutik. 7Jesusiplu upakhugit aktuqtain uqaqhuni, “Makititti iqhittailuhilu.” 8Peter, James, Johnlu aarluramik takunnaiqtuk Moses Elijahlu, Jesus kihimituaq takunnaqtuq. 9Tapkualu maniilrumin atqautillugit Jesus pitqujain uqaqhuni, “Unniutjittailuhi inungnun takujaffingnik. Inuum Irninga tuqungajunin makitqaaqtinnagu.” 10Talva malirutaita apirijaat, “Huuq titiraqtit ilihautjivat Elijam tikitakhaanik hivulliupluni?” 11Kiujuq, “Elijah tikittukhaujurli tamaita itqaumapkaquplugit. 12Uqautijaraluaffi, Elijah tikihimajugaluaq inuillu ilitaringinamitku ihumamingnik nangittitpagaat. Taimaatuttauq Inuum Irninga naglikhaaqtitauhungujuq tapkunanga.” 13Talva malirutait kangiqhilihaaqtainnaqtun taffuminga. Jesusim John Baptaiqti uqautingmagu tapkununga.

Currently Selected:

Matthew 17: AQ

Highlight

Copy

Compare